പരാതി അന്വേഷിക്കാനെത്തിയ പൊലീസിനെ ഭയന്ന് വീടിന്റെ ടെറസില്നിന്ന് അടുത്ത വീടുകളിലെ ടെറസുകളിലേക്ക് ചാടി രക്ഷപ്പെടാന് ശ്രമിച്ച യുവാവിന് ദാരുണാന്ത്യം
നിരന്തരം മദ്യപിച്ചെത്തി ഭാര്യയെ മര്ദ്ദിക്കാറുണ്ടെന്ന പരാതി അന്വേഷിക്കാനെത്തിയ പൊലീസിനെ കണ്ട് ഭയന്ന് വീടിന്റെ ടെറസില് നിന്ന് അടുത്ത വീടുകളിലെ ടെറസുകളിലേക്ക് ചാടി രക്ഷപ്പെടാന് ശ്രമിക്കുന്നതിനിടെ വീണു പരിക്കേറ്റ യുവാവ് മരിച്ചു. ചെറിയതുറ ഫിഷര്മെന് കോളനിയില് ശ്രീജയുടെ ഭര്ത്താവ് റൊമാള്ഡെന്ന മണിക്കുട്ടനാണ് (32) മരിച്ചത്. ചെറിയതുറ പുതുവല് പുത്തന് വീട്ടില് ആന്റണി ലില്ലി ദമ്പതികളുടെ മകനായ റൊമാള്ഡ് നിരവധി ക്രിമിനല് കേസുകളില് പ്രതിയാണ്.
ചെറിയതുറ വെടിവയ്പിന് ഇടയാക്കിയ സംഭവത്തിലെ പ്രതിയായ കൊമ്പ് ഷിബുവിന്റെ സഹോദരനാണ് ഇയാള്. ഇന്നലെ അര്ദ്ധരാത്രിയിലാണ് സംഭവം നടന്നത്. വലിയതുറ പൊലീസ് മെഡിക്കല് കോളേജ് ആശുപത്രിയില് പ്രവേശിപ്പിച്ച ഇയാള് ഇന്നലെ പുലര്ച്ചെ മൂന്നുമണിയോടെയാണ് മരിച്ചത്. നഗരസഭയിലെ ശുചീകരണ വിഭാഗത്തില് താത്കാലിക തൊഴിലാളിയായിരുന്നു.
സംഭവത്തെപ്പറ്റി പൊലീസ് പറയുന്നതിങ്ങനെയാണ്... സ്ഥിരമായി മദ്യപിച്ചെത്തി വീട്ടില് വഴക്കുണ്ടാക്കിയ റൊമാള്ഡ് ഭാര്യ ശ്രീജയെ ദേഹോപദ്രവം ഏല്പിക്കുന്നതായി ഭാര്യ മാതാവ് അറിയിച്ചതനുസരിച്ചാണ് വലിയതുറ പൊലീസ് സ്ഥലത്തെത്തിയത്. പൊലീസ് വരുന്നുണ്ടെന്നറിഞ്ഞ റൊമാള്ഡ് വീടിന്റെ ടെറസില് കയറി അടുത്തടുത്തുള്ള വീടുകളുടെ ടെറസുകള്വഴി ചാടി ഓടുകയായിരുന്നു. ഇയാളെ കണ്ടെത്താനായി പൊലീസും വീട്ടുകാരും പരിസരമാകെ തെരഞ്ഞെങ്കിലും ഫലമുണ്ടായില്ല. തിരികെ പോകാന് തുടങ്ങിയ പൊലീസിനോട് റൊമാള്ഡിനെ കൂട്ടിക്കൊണ്ടുപോകണമെന്നും ഇല്ലെങ്കില് വീണ്ടും പ്രശ്നമുണ്ടാക്കുമെന്നും ഭാര്യയും ബന്ധുക്കളും പറഞ്ഞു. തുടര്ന്നു നടത്തിയ അന്വേഷണത്തിലാണ് ചെറിയതുറയിലെ ആളൊഴിഞ്ഞ സ്ഥലത്തെ മതിലിന് സമീപം ഒരാള് പരിക്കേറ്റ് കിടക്കുന്നതായി പ്രദേശവാസി അറിയിച്ചത്.
പൊലീസെത്തിയപ്പോള് കൈത്തണ്ടയില് പരിക്കേറ്റ് ചോര വാര്ന്ന് കിടക്കുകയായിരുന്നു ഇയാള്. വീടിന് മുകളില് നിന്നു ചാടിയപ്പോള് മതിലിലോ മറ്റോ തട്ടി പരിക്കേറ്റതാകുമെന്ന് പൊലീസ് പറഞ്ഞു. ആംബുലന്സ് വരുത്തി ഭാര്യയ്ക്കും അമ്മയ്ക്കുമൊപ്പമാണ് പൊലീസ് ഇയാളെ ഫോര്ട്ട് ആശുപത്രിയിലും പിന്നീട് മെഡിക്കല് കോളേജ് ആശുപത്രിയിലും എത്തിച്ചത്. ബോധം വീണ്ടുകിട്ടിയപ്പോള് വീണ്ടും ബഹളം കൂട്ടിയ ഇയാള്ക്ക് പെട്ടെന്ന് ശ്വാസതടസം അനുഭവപ്പെടുകയും പുലര്ച്ചെ മൂന്നുമണിയോടെ മരിക്കുകയുമായിരുന്നു. മൃതദേഹം മെഡിക്കല് കോളേജ് ആശുപത്രി മോര്ച്ചറിയില് പോസ്റ്റുമോര്ട്ടം നടത്താന് താമസിച്ചെന്നാരോപിച്ച് ബന്ധുക്കള് മോര്ച്ചറിക്ക് മുന്നില് ബഹളം വച്ചു . പോസ്റ്റ്മോര്ട്ടത്തിന് ശേഷം വൈകിട്ട് അഞ്ചോടെ ചെറിയതുറ പള്ളി സെമിത്തേരിയില് സംസ്കരിച്ചു. റൊമാള്ഡ് ശ്രീജ ദമ്പതികള്ക്ക് മൂന്നര വയസുള്ള മകളുണ്ട്.
https://www.facebook.com/Malayalivartha
