കേരളം കാത്തിരിക്കുന്ന മറ്റൊരു തെരഞ്ഞെടുപ്പാണ് തിരുവനന്തപുരത്തെ വട്ടിയൂര്‍ക്കാവ് ഉപതെരഞ്ഞെടുപ്പ്. കഴിഞ്ഞ തവണ കുമ്മനം രാജശേഖരനെ തോല്‍പ്പിച്ചാണ് കെ. മുരളീധരന്‍ വട്ടിയൂര്‍ക്കാവ് പിടിച്ചത്. എന്നാല്‍ ലോക്‌സഭാ തെരഞ്ഞെടുപ്പില്‍ വടകരയില്‍ പി. ജയരാജനെതിരെ മുരളി മത്സരിച്ച് ജയിക്കുകയും ചെയ്തു. അതേസമയം തിരുവനന്തപുരത്ത് മത്സരിച്ച കുമ്മനം തോല്‍ക്കുകയും ചെയ്തു. ഇതോടെ വട്ടിയൂര്‍ക്കാവ് കുമ്മനം പിടിക്കുമെന്ന തരത്തില്‍ പ്രചാരണം ആരംഭിച്ചു. എന്നാല്‍ വട്ടിയൂര്‍ക്കാവില്‍ ഉടന്‍ ഉപതെരഞ്ഞെടുപ്പ് നടക്കുന്ന ലക്ഷണമില്ല. 

കെ.മുരളീധരനെതിരെ നല്‍കിയ തിരഞ്ഞെടുപ്പ് കേസ് പിന്‍വലിക്കില്ലെന്ന് കുമ്മനം രാജശേഖരന്‍. നാമനിര്‍ദേശ പത്രികയില്‍ ബാധ്യതകള്‍ മറച്ചുവെച്ചു എന്ന് ആരോപിച്ചാണ് കുമ്മനം കേസ് നല്‍കിയത്. ഇതോടെ കെ. മുരളീധരന്‍ രാജിവെച്ച ഒഴിവില്‍ വട്ടിയൂര്‍ക്കാവില്‍ നടക്കേണ്ട ഉപതിരഞ്ഞെടുപ്പ് നീളുമെന്ന് തീര്‍ച്ചയായി. 

കെ.മുരളീധരന്‍ 2016ലെ നിയമസഭ തിരഞ്ഞെടുപ്പില്‍ നാമനിര്‍ദേശ പത്രിക സമര്‍പ്പിച്ചപ്പോള്‍ രണ്ടരക്കോടി രൂപയുടെ ബാധ്യത മറച്ചുവെച്ചു എന്നാണ് കുമ്മനത്തിന്റെ പരാതി. കേസില്‍ വിചാരണ നടത്തി സത്യം പുറത്തുവരണമെന്നാണ് കുമ്മനത്തിന്റെ നിലപാട്. ഇക്കാര്യം അദ്ദേഹം വ്യക്തമാക്കുകയും ചെയ്തു. നേരത്തെ ഹൈക്കോടതിയിലാണ് കുമ്മനം ഹര്‍ജി നല്‍കിയിരുന്നതെങ്കിലും ഇതിനെതിരെ കെ. മുരളീധരന്‍ സുപ്രീംകോടതിയെ സമീപിച്ചിരുന്നു. നിലവില്‍ കേസ് സുപ്രീംകോടതിയുടെ പരിഗണനയിലാണ്. 

വട്ടിയൂര്‍ക്കാവ് എം.എല്‍.എയായിരുന്ന കെ.മുരളീധരന്‍ വടകരയില്‍നിന്ന് ലോക്‌സഭയിലേക്ക് തിരഞ്ഞെടുക്കപ്പെട്ടതോടെയാണ് വട്ടിയൂര്‍ക്കാവില്‍ ഉപതിരഞ്ഞെടുപ്പിന് കളമൊരുങ്ങിയത്. എന്നാല്‍ കെ.മുരളീധരനെതിരെ നല്‍കിയ കേസ് പിന്‍വലിക്കില്ലെന്ന് കുമ്മനം വ്യക്തമാക്കിയതോടെ കേസില്‍ തീര്‍പ്പുകല്‍പ്പിക്കാതെ ഉപതിരഞ്ഞെടുപ്പ് നടത്താനാകില്ല.

അതേസമയം വട്ടിയൂര്‍ക്കാവ് തെരഞ്ഞെടുപ്പിന് യുഡിഎഫ് സജ്ജമായി. വോട്ടര്‍ പട്ടികയില്‍ പേരു ചേര്‍ക്കാനുള്ള നടപടികളിലേക്ക് കടക്കാന്‍ പ്രതിപക്ഷ നേതാവ് രമേശ് ചെന്നിത്തലയുടേയും ഉപനേതാവ് എം കെ മുനീറിന്റേയും സാന്നിധ്യത്തില്‍ ചേര്‍ന്ന വട്ടിയൂര്‍ക്കാവിലെ യുഡിഎഫ്‌നേതാക്കളുടെ യോഗത്തില്‍ ധാരണയായി. തിരുവനന്തപുരം ഡിസിസി ഓഫീസിലായിരുന്നു യോഗം.

തെരഞ്ഞെടുപ്പ് തീയതി പ്രഖ്യാപിച്ചില്ലെങ്കിലും വട്ടിയൂര്‍ക്കാവില്‍ അരയും തലയും മുറുക്കി രംഗത്തിറങ്ങുകയാണ് യുഡിഎഫ്. സിറ്റിംഗ് എംഎല്‍എ കെ മുരളീധരന്‍ വടകര എംപി യായതിനെ തുടര്‍ന്ന് ഒഴിവു വന്ന വട്ടിയൂര്‍ക്കാവ് കോണ്‍ഗ്രസിന് അഭിമാന പോരാട്ടമാണ്. പ്രതിപക്ഷ നേതാവ് രമേശ് ചെന്നിത്തലയും ഉപനേതാവ് എംകെ മുനീറും വട്ടിയൂര്‍ക്കാവിലെ പ്രാരംഭ പ്രവര്‍ത്തനങ്ങള്‍ മണ്ഡലത്തിലെ യുഡിഎഫ് നേതാക്കള്‍ക്കൊപ്പം വിലയിരുത്തുകയും നിര്‍ദേശങ്ങള്‍ നല്‍കുകയും ചെയ്തു . വട്ടിയൂര്‍ക്കാവ് നിലനിര്‍ത്താന്‍ യു ഡി എഫ് സര്‍വസജ്ജമെന്ന് തിരുവനന്തപുരം ഡിസിസി അധ്യക്ഷന്‍ നെയ്യാറ്റിന്‍കര സനല്‍ പറഞ്ഞു.

2014ലെ ലോക്‌സഭാ തെരഞ്ഞെടുപ്പില്‍ 13,000 വോട്ടിനു വട്ടിയൂര്‍ക്കാവില്‍ ബിജെപി മുന്നിലായിരുന്നെങ്കില്‍ ഇത്തവണ 2836 വോട്ടിന് ഇവിടെ കോണ്‍ഗ്രസ് സ്ഥാനാര്‍ത്ഥി ശശി തരൂരാണ് മുന്നിട്ടു നിന്നത്. കഴിഞ്ഞ നിയമസഭാ തെരഞ്ഞെടുപ്പില്‍ കോണ്‍ഗ്രസിന്റെ ഭൂരിപക്ഷം 7622 വോട്ടിനായിരുന്നു. അന്ന് രണ്ടാമതെത്തിയത് ബിജെപിയാണ്. ഇതുകാരണം ബിജെപിയ്ക്ക് പ്രതീക്ഷയും നല്‍കുന്നു.