കടല്‍ക്ഷോഭ ഭീഷണി നേരിടുന്ന പ്രദേശത്തെ മത്സ്യത്തൊഴിലാളികളെ മാറ്റിപ്പാര്‍പ്പിക്കാനുള്ള പ്രത്യേക പുനരധിവാസ പദ്ധതിക്കു മന്ത്രിസഭായോഗത്തിന്റെ അനുമതി. കടല്‍ത്തീരത്തു നിന്ന് 50 മീറ്ററിനുള്ളില്‍ താമസിക്കുന്ന മത്സ്യത്തൊഴിലാളികള്‍ അവിടെ നിന്ന് സ്വയം ഒഴിയാന്‍ തയ്യാറായാല്‍ അവര്‍ക്ക് വീട് നിര്‍മാണത്തിനായി 10 ലക്ഷം രൂപയോ അല്ലെങ്കില്‍ ഫഌറ്റ് നിര്‍മിച്ചു നല്‍കുകയോ ചെയ്യുന്നതാണ് പദ്ധതി.

സംസ്ഥാന തീരപ്രദേശത്ത് 50 മീറ്ററിനുള്ളില്‍ താമസിക്കുന്ന 18,865 കുടുംബങ്ങള്‍ കടല്‍ക്ഷോഭ ഭീഷണി നേരിടുന്നുണ്ടെന്നാണ് വിലയിരുത്തല്‍. ഇവരെ പുനരധിവസിപ്പിക്കാനായി ഫിഷറീസ് വകുപ്പാണ് പദ്ധതി തയ്യാറാക്കുന്നത്.
ആവശ്യമായ തുക മുഖ്യമന്ത്രിയുടെ ദുരിതാശ്വാസനിധിയില്‍നിന്നു കണ്ടെത്തും. ആരെയും തീരത്തുനിന്ന് നിര്‍ബന്ധിച്ചു കുടിയൊഴിപ്പിക്കേണ്ടതില്ലെന്നാണ് സര്‍ക്കാര്‍ തീരുമാനം. സ്വയം ഒഴിഞ്ഞുപോകാന്‍ തയ്യാറാകുന്നവരെ ആദ്യഘട്ട പദ്ധതിയില്‍ ഉള്‍പ്പെടുത്തും.

ഭൂമി വാങ്ങി വീടുനിര്‍മിക്കാന്‍ തയ്യാറാകുന്നവര്‍ക്കാണ് പത്തുലക്ഷം രൂപ നല്‍കുന്നത്. ഭൂമി വാങ്ങാന്‍ ആറു ലക്ഷവും വീടു നിര്‍മിക്കാന്‍ നാലു ലക്ഷവും ഇതില്‍നിന്ന് ചെലവിടാം. മറ്റുള്ളവരെ ഫിഷറീസ് വകുപ്പ് നിര്‍മിക്കുന്ന ഫഌറ്റുകളില്‍ പുനരധിവസിപ്പിക്കും.