കാമുകിയുമായുള്ള വിഡിയോ കോളില്‍ ആത്മഹത്യാരംഗം കാട്ടിയ യുവാവിനെ പോലീസെത്തി ആശുപത്രിയില് എത്തിച്ചു!
അങ്കമാലിയില്‍, പ്രേമ നൈരാശ്യത്തെ തുടര്‍ന്ന് കാമുകിയുമായി വാട്‌സാപ് വിഡിയോ കോള്‍ നടത്തി ആത്മഹത്യാ രംഗങ്ങള്‍ കാണിച്ച ഇരുപതുകാരനായ കോളജ് വിദ്യാര്‍ഥിയെ കൈ ഞരമ്പുകള്‍ മുറിച്ച നിലയില്‍ പോലീസ് കുറ്റിക്കാട്ടില്‍ കണ്ടെത്തി.
എളവൂര്‍ റെയില്‍വേ മേല്‍പാലത്തിനും കറുകുറ്റി റെയില്‍വേ സ്റ്റേഷനും ഇടയില്‍ റെയില്‍വേ ട്രാക്കിനു സമീപത്തുള്ള കുറ്റിക്കാട്ടില്‍ നിന്നും യുവാവ്, കോട്ടയം സ്വദേശിയായ കാമുകിയെ വിഡിയോ കോള്‍ ചെയ്തിരുന്നു. ഞാനിവിടെ കിടന്നു മരിക്കുമെന്ന് അയാള്‍ പറഞ്ഞയുടനെ കോള്‍ അവസാനിപ്പിച്ച യുവതി, പെട്ടെന്നു തന്നെ കോട്ടയം പൊലീസില്‍ വിവരം നല്‍കി. വാട്‌സാപ് വിഡിയോ കോള്‍ ലൊക്കേഷന്‍ മനസ്സിലാക്കിയ അവര്‍ അങ്കമാലി പൊലീസിനെ വിവരം അറിയിക്കുകയായിരുന്നു.
തുടര്‍ന്നു ലൊക്കേഷന്‍ അടിസ്ഥാനമാക്കിയുള്ള അന്വേഷണത്തിലാണ് യുവാവിനെ കണ്ടെത്തിയത്. പൊലീസ് ഇയാളെ ലിറ്റില്‍ ഫ്‌ലവര്‍ ആശുപത്രിയില് പ്രവേശിപ്പിച്ചു. കോട്ടയത്ത് വിദ്യാര്‍ഥിയായ യുവാവ് കാമുകിയെ സന്ദര്‍ശിച്ച ശേഷം ട്രെയിനില്‍ കറുകുറ്റിയില്‍ എത്തുകയായിരുന്നു. ഇതിനു ശേഷമാണ് യുവതിയെ ഫോണില്‍ വിളിച്ചത്.
2 മണിക്കൂര്‍ തെരച്ചിലിനു ശേഷം രാത്രി 8 മണിയോടെയാണ് അവശനിലയില്‍ യുവാവിനെ കണ്ടെത്തിയത്. ഇതിനിടെ ഇയാളുടെ ഫോണിന്റെ ബാറ്ററി തീര്‍ന്നു പോയതും പൊലീസിനു തലവേദനയായി. 2 പ്രാവശ്യം പൊലീസ് ഈ ഭാഗത്തു കൂടി കടന്നുപോയെങ്കിലും യുവാവിനെ കണ്ടെത്താന്‍ കഴിഞ്ഞിരുന്നില്ല. ആള്‍ സഞ്ചാരമില്ലാത്ത ഇവിടെ നിന്നും കറുകുറ്റി റെയില്‍വേ സ്റ്റേഷനിലേക്ക് ഒന്നര കിലോമീറ്റര്‍ ദൂരമുണ്ട്. ഇത്രയും ദൂരം ചുമന്നാണ് യുവാവിനെ പൊലീസ് വാഹനത്തിലേക്ക് എത്തിച്ചത്.
തീവ്രപരിചരണ വിഭാഗത്തില്‍ പ്രവേശിപ്പിച്ച യുവാവ് അപകടനില തരണം ചെയ്തതായി ആശുപത്രി അധികൃതര്‍ അറിയിച്ചു. എസ്‌ഐ സിഐ വില്‍സണ്‍, ഉദ്യോഗസ്ഥരായ ഉണ്ണിക്കൃഷ്ണന്‍, ജിസ്‌മോന്‍, രഞ്ജിത്ത് കുറുപ്പ്, വിമല്‍ എന്നിവരുടെ നേതൃത്വത്തിലുള്ള പൊലീസ് സംഘമാണ് അന്വേഷണം നടത്തിയത്.
https://www.facebook.com/Malayalivartha
