കോടിയേരിയുടെ മകനെതിരെയുള്ള മുംബൈ സുന്ദരിയുടെ പരാതി കേരളത്തിലെ മാധ്യമങ്ങള്‍ക്ക് ചോര്‍ത്തി നല്‍കിയത് ഒരു പ്രമുഖ സി പി എം നേതാവുമായി ബന്ധപ്പെട്ടവരെന്ന് സി പി എം ഔദ്യോഗിക പക്ഷത്തിന് സംശയം. 

കോടിയേരിയും പിണറായിയും ചേര്‍ന്ന് ഇല്ലാതാക്കിയ ഒരു പ്രമുഖ നേതാവാണ് ആരും അറിയാതെ രഹസ്യമായി സൂക്ഷിച്ചിരുന്ന അരമന രഹസ്യം അങ്ങാടി പാട്ടാക്കിയത്. മലബാറുകാരനായ നേതാവിനെ സമീപ കാലത്താണ് കോടിയേരിയും പിണറായിയും ചേര്‍ന്ന് ഇല്ലാതാക്കിയത്. മലബാറിലെ ഒരു ജില്ലയില്‍ ജില്ലാ സെക്രട്ടറിയായി വിരാജിച്ചിരുന്ന നേതാവിനെ പൊതു തെരഞ്ഞടുപ്പില്‍ നിര്‍ത്തിയാണ് അവസാനിപ്പിച്ചത്. കോടിയേരിയുടെയും പിണറായിയുടെയും വിശ്വസ്തനായിരുന്ന ഇദ്ദേഹത്തിന് അറിയാത്ത രഹസ്യങ്ങളൊന്നും പാര്‍ട്ടിയില്‍ ഇല്ലെന്നാണ് സി പി എം പ്രവര്‍ത്തകര്‍ പോലും പറയുന്നത്. 

എന്നാല്‍ തലയ്ക്ക് മീതെ അദ്ദേഹം വളര്‍ന്നപ്പോഴാണ് അദ്ദേഹത്തെ ഇല്ലാതാക്കിയത്. മലബാറില്‍ പാര്‍ട്ടിയെ സുശക്തമായി നയിച്ചു വരുമ്പോഴായിരുന്നു ഓപ്പറേഷന്‍ നിഷ്‌കാസനം നടന്നത്. പാര്‍ട്ടിയില്‍ ആല്‍ബവും പാട്ടുമൊക്കെയായി അദ്ദേഹം പുരയ്ക്ക് മുകളിലേക്ക് വളര്‍ന്നു. സി പി എം ആളുകളെ നിഷ്‌കാസിതമാക്കുന്ന ഒരു പ്രത്യേക ശൈലിയുണ്ട്. അതായത് സഖാക്കള്‍ക്ക് പ്രയോജനകരമാകുമെന്ന് നാട്ടുകാര്‍ക്ക് തോന്നിക്കുന്ന വിധത്തില്‍ പെരുമാറും. അതിന് പിന്നാലെ അയാളെ വെട്ടി നിരത്തും. എല്ലാവരെയും വെട്ടി നിരത്തുന്നത് പോലെയല്ല മുതിര്‍ന്ന നേതാക്കളെ വെട്ടുന്നത്. 

അതിനിടെ മറ്റൊരു തര്‍ക്കവും കണ്ണൂരില്‍ നടക്കുന്നുണ്ട്. പി ജയരാജന്റെ മകന്റെ കല്യാണത്തിന് പോയതു കാരണമാണ് തന്റെ ഭര്‍ത്താവിന് പഞ്ചായത്തു പ്രസിഡന്റായ ഗോവിന്ദന്‍ മാസ്റ്ററുടെ ഭാര്യ പെര്‍മിറ്റ് നിഷേധിച്ചതെന്ന് ആത്മഹത്യ ചെയ്ത പ്രവാസി വ്യവസായി സാജന്റെ ഭാര്യ പത്രസമ്മേളനത്തില്‍ പറഞ്ഞു. ജയരാജനെ പോയി കണ്ടാലോ എന്ന് ആലോചിച്ചപ്പോള്‍ അതിന്റെ പേരില്‍ വീണ്ടും പരിഹാസ്യരാകുമോ എന്ന് സാജന്റെ ഭാര്യ പറഞ്ഞു. അതായത് പി ജയരാജന്‍ ഗോവിന്ദന്‍ മാസ്റ്ററുടെ വിരുദ്ധ പക്ഷത്താണെന്ന് ചുരുക്കം. 

മലബാറില്‍ പാര്‍ട്ടി രണ്ട് വഴിക്കാണ് നീങ്ങുന്നത്. ഇതില്‍ ഒരു വിഭാഗത്തിന്റെ നേതാവാണ് സിപിഎമ്മില്‍ നിന്നും അകലാതെ അകന്നു നില്‍ക്കുന്ന മലബാര്‍ സഖാവ്. മുഖ്യമന്ത്രിയും പാര്‍ട്ടി സെക്രട്ടറിയുമായി തെറ്റിയ സഖാവിനെ പലരും സി പി എമ്മില്‍ തന്നെ സംശയിക്കുന്നുണ്ട്. കോടിയേരി കഴിഞ്ഞാല്‍ അടുത്ത പണി ആര്‍ക്കു വരുമെന്നാണ് പാര്‍ട്ടി കാത്തിരിക്കുന്നത്. അത് മുതിര്‍ന്ന പാര്‍ട്ടി സഖാവിനാണെന്ന് പലരും പറയാതെ പറയുന്നു. 

ഏതായാലും സി പി എമ്മില്‍ വരാന്‍ പോകുന്നത് ആരോപണങ്ങളുടെ പെരുമഴക്കാലമാണ്. അതില്‍ ആരൊക്കെ ഒലിച്ചു പോകുമെന്നാണ് കണ്ടറിയേണ്ടത്. പ്രത്യേകിച്ച് അടുത്തവര്‍ അകലുമ്പോഴും അകന്നവര്‍ അടുക്കുമ്പോഴാണ് സൂക്ഷിക്കണമെന്നാണല്ലോ ചൊല്ല്.