കണ്ണൂര്‍ എം.പി എ.പി. അബ്ദുള്ളക്കുട്ടി അവസാനം എത്തേണ്ടിടത്തു തന്നെ എത്തി. നരേന്ദ്ര മോദിയുടെ വികസനങ്ങള്‍ പുകഴ്ത്തിയതിന്റെ പേരില്‍ ആദ്യം സിപിഎമ്മില്‍ നിന്നും ഇപ്പോള്‍ കോണ്‍ഗ്രസില്‍ നിന്നും പുറത്തായിരിക്കുകയാണ്. അവസാനം അബ്ദുള്ള കുട്ടിയെ മോദി വിളിച്ചു വരുത്തി കണ്ടു. അബ്ദുള്ള കുട്ടി ബിജെപിയ്ക്ക് വലിയ നേട്ടങ്ങള്‍ നല്‍കില്ലെങ്കിലും അബ്ദുള്ള കുട്ടിയിലൂടെ അത്ഭുതം കാട്ടാമെന്നാണ് മോദിയുടെ ചിന്ത. ഒന്നാമത് ന്യൂന പക്ഷങ്ങളുടെ എതിര്‍പ്പ് മറികടക്കാം. അബ്ദുള്ള കുട്ടിയിലൂടെ വരുന്ന നിയമസഭാ ഉപതെരഞ്ഞെടുപ്പില്‍ മഞ്ചേശ്വരം, വട്ടിയൂര്‍ക്കാവ്, കോന്നി എന്നിവ പിടിക്കാമെന്നാണ് കണക്കുകൂട്ടല്‍. അങ്ങനെ വരുമ്പോള്‍ ഒന്നു വച്ചാല്‍ നാല് കിട്ടും. അതായത് രാജഗോപാല്‍ ഇപ്പോള്‍ നിയമസഭയിലുണ്ട്. മൂന്ന് പേര്‍ കൂടിയാകുമ്പോള്‍ നാല്. ഇത് ബിജെപിയ്ക്ക് വലിയ നേട്ടമാകും. 

മഞ്ചേശ്വരം തെരഞ്ഞെടുപ്പ് കേസ് ഹൈക്കോടതി അവസാനിപ്പിച്ചതോടെ ഉടന്‍ ഉപതെരഞ്ഞെടുപ്പ് വരും. കെ. സുരേന്ദ്രന്‍ 89 വോട്ടിനാണ് തോറ്റത്. സുരന്ദ്രനെതിരെ മല്‍സരിച്ച് വിജയിച്ച് എംഎല്‍എയായ പി.കെ.അബ്ദുല്‍ റസാഖ് അന്തരിച്ചതോടെയാണ് കേസ് അനിശ്ചിതത്വത്തിലായത്. വ്യാപകമായ കള്ളവോട്ടാണ് തന്റെ പരാജയകാരണമെന്ന് ചൂണ്ടിക്കാട്ടിയായിരുന്നു സുരേന്ദ്രന്റെ ഹര്‍ജി നല്‍കിയത്. ഉപ തെരഞ്ഞെടുപ്പില്‍ ഇനി നിന്നാലും സിപിഎം കാലു വാരും. അതിനാല്‍ മത്സരിക്കുന്നില്ലെന്ന് സുരേന്ദ്രന്‍ നേരത്തെ അറിയിച്ചിരുന്നു. അപ്പോള്‍ മുസ്ലീമായ അബ്ദുള്ള കുട്ടിയെ ബിജെപി ചിഹ്നത്തില്‍ മത്സരിപ്പിച്ച് ബിജെപി വോട്ടും മുസ്ലീം വോട്ടും നേടി വിജയിപ്പിക്കും. 

രണ്ടാമത്തേത് വട്ടിയൂര്‍ക്കാവാണ്. കുമ്മനത്തിന് ഈസിയായി ജയിക്കാമെന്ന് കരുതുന്ന മണ്ഡലം. ഈ മണ്ഡലത്തില്‍ ഉപതിരഞ്ഞെടുപ്പിന് ബിജെപി തയാറെടുപ്പ് തുടങ്ങി. വട്ടിയൂര്‍ക്കാവ് നിയോജക മണ്ഡലത്തിലെ 168 ബൂത്തുകളില്‍ ലോക്‌സഭാ തിരഞ്ഞെടുപ്പിന് കിട്ടിയ വോട്ടുകളുടെ കണക്ക് അടിസ്ഥാനമാക്കിയാണ് ഉപതിരഞ്ഞെടുപ്പിന് ബിജെപി തയാറെടുക്കുന്നത്. ബിജെപി പ്രതീക്ഷിച്ചത് 51,000 വോട്ടാണ്. കുമ്മനം രാജശേഖരന് 50,709 വോട്ട് കിട്ടുകയും ചെയ്തു. ശശിതരൂര്‍ നേടിയത് 53, 545 വോട്ട് . 2,836 വോട്ടിന്റെ ഭൂരിപക്ഷം മാത്രം. ഇത് ഉപതിരഞ്ഞെടുപ്പില്‍ തിരിച്ചുപിടിക്കാനാവുമെന്നു ബിജെപി കരുതുന്നു. 2016 ലെ നിയമസഭാ തിരഞ്ഞെടുപ്പില്‍ യുഡിഎഫിലെ കെ. മുരളീധരന്‍ 7,622 വോട്ടിനാണു കുമ്മനത്തെ തോല്‍പ്പിച്ചത്. അന്ന് മൂന്നാം സ്ഥാനത്തായ ടി.എന്‍. സീമയ്ക്ക് 40,441 വോട്ടു കിട്ടിയിരുന്നു. പക്ഷേ ലോക്‌സഭാ തിരഞ്ഞടുപ്പില്‍ സി.ദിവാകരനു കിട്ടിയത് 29, 414 വോട്ടുമാത്രം. കുമ്മനത്തിന് അവസാനനാളുകളില്‍ ഏറ്റ മാറാട് കലാപ ചര്‍ച്ച അബ്ദുള്ള കുട്ടിയിലൂടെ പരിഹരിക്കാന്‍ കഴിയുമെന്നാണ് കരുതുന്നത്. 

മൂന്നാമത്തെത് കോന്നിയാണ്. അയ്യപ്പന്റെ തട്ടകമായ കോന്നിയില്‍ സുരേന്ദ്രന്‍ ഈസിയായി ജയിക്കുമെന്നാണ് ബിജെപി കരുതുന്നത്. കോന്നിയില്‍ വലിയ ത്രികോണ മത്സരമുണ്ടാകും. എന്‍എസ്എസിന്റെ കൂടി പിന്തുണയോടെ സുരേന്ദ്രന്‍ ജയിക്കുമെന്നാണ് കരുതുന്നത്. 


ഇന്നലെ ഡല്‍ഹിയില്‍ പ്രധാനമന്ത്രി നരേന്ദ്രമോദിയുമായും ബി.ജെ.പി ദേശീയ അദ്ധ്യക്ഷന്‍ അമിത് ഷായുമായും അബ്ദുള്ളക്കുട്ടി കൂടിക്കാഴ്ച നടത്തിയതോടെയാണ് കാര്യങ്ങള്‍ മാറി മറിഞ്ഞത്. നരേന്ദ്രമോദിയുടെ ലോക്‌സഭാ വിജയത്തെ സ്തുതിച്ചതിന്റെ പേരില്‍ കോണ്‍ഗ്രസ് പുറത്താക്കിയ അബ്ദുള്ളക്കുട്ടിയുടെ ബി.ജെ.പി പ്രവേശനം ഉറപ്പായിയി കഴിഞ്ഞു. കേരള നേതാക്കളുമായുള്ള ചര്‍ച്ചയ്ക്കു ശേഷം പ്രഖ്യാപനമുണ്ടാകും.

മോദി സ്തുതിയുടെ പേരില്‍ ആദ്യം സി.പി.എമ്മും പിന്നീട് കോണ്‍ഗ്രസും പുറത്താക്കിയ അബ്ദുള്ളക്കുട്ടി ബി.ജെ.പിയിലേക്ക് നീങ്ങുമെന്ന് സൂചനകളുണ്ടായിരുന്നു. ഇതു ശരിവച്ചുകൊണ്ടാണ് ഇന്നലെ രാവിലെ പാര്‍ലമെന്റിലെ ഓഫീസില്‍ പ്രധാനമന്ത്രി നരേന്ദ്രമോദിയുമായി കൂടിക്കാഴ്ച നടത്തിയത്. ബി.ജെ.പിയിലേക്ക് ചേരാന്‍ പ്രധാനമന്ത്രി ക്ഷണിച്ചതായി അബ്ദുള്ളക്കുട്ടി പറഞ്ഞു. ലോക്‌സഭാ തിരഞ്ഞെടുപ്പ് വിജയത്തിന് മോദിയെ അഭിനന്ദിക്കാനാണ് പോയത്. ന്യൂനപക്ഷങ്ങളെ നന്നായി നോക്കുന്ന സര്‍ക്കാരാണിതെന്ന് മോദി അറിയിച്ചതായി അബ്ദുള്ളക്കുട്ടി പറഞ്ഞു. 

മുസ്‌ളിം വനിതയ്ക്ക് ഗ്യാസ് കണക്ഷന്‍ നല്‍കിയാണ് ഉജ്ജ്വല്‍ യോജ്‌നാ പദ്ധതിയുടെ ഉദ്ഘാടനം നിര്‍വഹിച്ചത്. അമിത് ഷായെയും കാണാന്‍ മോദി നിര്‍ദ്ദേശിച്ചു. ഷായും ബി.ജെ.പിയിലേക്ക് സ്വാഗതം ചെയ്‌തെന്ന് അബ്ദുള്ളക്കുട്ടി അറിയിച്ചു.അബ്ദുള്ളക്കുട്ടി വഴി കേരളത്തില്‍ മുസ്‌ളിം വിഭാഗം അടക്കമുള്ള ന്യൂനപക്ഷങ്ങളുടെ വിശ്വാസം നേടിയെടുക്കുകയാണ് ബി.ജെ.പിയുടെ ലക്ഷ്യം. അതേസമയം അയല്‍ സംസ്ഥാനമായ കര്‍ണാടകയില്‍ പ്രവര്‍ത്തിക്കാന്‍ അബ്ദുള്ളക്കുട്ടി താത്പര്യം പ്രകടിപ്പിച്ചെന്നും അറിയുന്നു. ഇന്നലത്തെ ചര്‍ച്ചകളില്‍ സംസ്ഥാന ബി.ജെ.പി നേതാക്കന്‍മാര്‍ ആരുമുണ്ടായിരുന്നില്ല. കര്‍ണാടകയില്‍ നിന്നുള്ള എം.പിയും മലയാളി വ്യവസായിയുമായ രാജീവ് ചന്ദ്രശേഖര്‍ വഴിയാണ് അബ്ദുള്ളക്കുട്ടി പ്രധാനമന്ത്രിയുമായി കൂടിക്കാഴ്ച നടത്തിയത്.