കഴിഞ്ഞ യു.ഡി.എഫ് സര്ക്കാര് മുസ്ലിം തീവ്രവാദികള്ക്ക് പൂര്ണമായും വഴങ്ങിക്കൊടുത്തെന്ന വിവാദപരാമര്ശവുമായി എല്.ഡി.എഫ് കണ്വീനര് എ. വിജയരാഘവന്
കഴിഞ്ഞ യു.ഡി.എഫ് സര്ക്കാര് മുസ്ലിം തീവ്രവാദികള്ക്ക് പൂര്ണമായും വഴങ്ങിക്കൊടുത്തെന്ന വിവാദപരാമര്ശവുമായി എല്.ഡി.എഫ് കണ്വീനര് എ. വിജയരാഘവന്. യുഡിഎഫ് സര്ക്കാരിന്റെ കാലത്ത് ദേശീയപാത വികസനം മുസ്ലിം തീവ്രവാദികളുടെ ഇടപെടലിനെ തുടര്ന്നാണ് സ്തംഭിച്ചത്. മുസ്ലിം തീവ്രവാദികളാണ് അന്ന് ദേശീയപാത വികസനം തടസപ്പെടുത്തിയത്. യുഡിഎഫ് സര്ക്കാരിന്റെ കാലത്ത് ദേശീയപാത വികസനം ഒരിഞ്ച് പോലും മുന്നോട്ട് പോയില്ലെന്നും വിജയരാഘവന് കുറ്റപ്പെടുത്തി. സ്ഥലമെടുപ്പുമായി ബന്ധപ്പെട്ട് ചില മുസ്്ലിംലീഗ് അടക്കമുള്ള ചില സംഘടനകള് സമരം നടത്തിയിരുന്നു. പ്രമുഖ ജൂവലറിയുടെ ഷോപ്പ് ഉള്പ്പെടെ നഷ്ടപ്പെടാതിരിക്കാനാണ് ലീഗ് സമരത്തിനിറങ്ങിയതെന്ന് അന്ന് ആക്ഷേപമുണ്ടായിരുന്നു. ഇടപ്പള്ളി മുതല് മംഗളൂരുവരെയാണ് ദേശീയപാതാ വികസനത്തിന് 45 മീറ്റര് വീതിയില് പാത നിര്മിക്കാനുള്ള സ്ഥലം സര്ക്കാര് ഏറ്റെടുത്ത് നല്കണമെന്നാണ് ദേശീയപാതാ അതോറിറ്റി ആവശ്യപ്പെട്ടത്.
അന്ന് പ്രശ്നപരിഹാരത്തിനായി ഉമ്മന്ചാണ്ടി സര്ക്കാര് ഇടപെടാത്തതില് ദുരൂഹതയുള്ളതായി ദേശാഭിമാനിയില് വാര്ത്ത വന്നിരുന്നു. 45 മീറ്റര് വീതിയിലാണ് റോഡെങ്കില് സ്ഥലവും വീടും നഷ്ടപ്പെടുമെന്ന ആശങ്കയിലാണ് പാതയോരത്ത് താമസിക്കുന്നവര്. മലപ്പുറം ജില്ലയില് കുറ്റിപ്പുറം മുതല് ഇടിമുഴിക്കല് വരെയുള്ള സ്ഥലത്തെ വെട്ടിച്ചിറ, പുത്തനത്താണി, കൊളപ്പുറം, ചേളാരി, യൂണിവേഴ്സിറ്റി, ഇടിമുഴിക്കല് തുടങ്ങിയ ചെറിയ അങ്ങാടികള് ഇല്ലാതാവുന്ന അവസ്ഥയുമുണ്ടാകുമെന്നായിരുന്നു മുസ്്ലിംലീഗിന്റെ അടക്കം ആരോപണം. അതിനെ ഉദ്ദേശിച്ചാണ് തീവ്രവാദികള് ദേശീയപാതാ വികസനത്തിന് തടസ്സം നിന്നതെന്ന് എ. വിജയരാഘവന് ബുധനാഴ്ച കൊച്ചിയില് ആരോപിച്ചത്. ദേശീയപാതാ വികസനം, ഗെയില് പൈപ്പ് ലൈന് തുടങ്ങിയ വിഷയങ്ങളില് മുസ്്ലിംലീഗും മറ്റ് ചില മുസ്്ലിം സംഘടനകളും പിണറായി സര്ക്കാരിന്റെ കാലത്തും സമരം നടത്തിയിരുന്നു.
ലോക്സഭാ തെരഞ്ഞെടുപ്പ് കാലത്ത് പാണക്കാട് ഹൈദരലി ശിഹാബ് തങ്ങളെയും കുഞ്ഞാലിക്കുട്ടിയേയും കാണാന് ചെന്ന ആലത്തൂര് എം.പി രമ്യാഹരിദാസിനെ പ്രചരണത്തിനിടെ വിജയരാഘവന് പരസ്യമായി അധിക്ഷേപിച്ചത് വിവാദമാവുകയും അവര് കോടതിയില് കേസ് നല്കിയിരിക്കുകയുമാണ്. കുഞ്ഞാലിക്കുട്ടിയെ കാണാന് ചെന്ന ആലത്തൂരിലെ യു.ഡി.എഫ് സ്ഥാനാര്ത്ഥിയായ പെണ്കുട്ടിയെ പിന്നെ കാണാനില്ലെന്നാണ് വിജയരാഘവന് പ്രസംഗിച്ചത്. സംഭവം വിവാദമായതോടെ വിജയരാഘവന് ഖേദം പ്രകടിപ്പിച്ചിരുന്നു. സി.പി.എം സംസ്ഥാന സെക്രട്ടറിയേറ്റ് അദ്ദേഹത്തിന് താക്കീതും നല്കി. എന്നാല് തെരഞ്ഞെടുപ്പില് ഇടത്പക്ഷ സ്ഥാനാര്ത്ഥിയും സിറ്റിംഗ് എം.പിയുമായ പി.കെ ബിജുവിന്റെ പരാജയത്തിലേക്ക് അത് നയിച്ചു.
അതിന് പിന്നാലെയാണ് മുസ്്ലിംലീഗിനെ അടക്കം തീവ്രവാദികളെന്ന് അധിക്ഷേപിക്കുന്ന പരാമര്ശനം എല്.ഡി.എഫ് കണ്വീനര് കൂടിയായ എ. വിജയരാഘവന് നടത്തിയിരിക്കുന്നത്. ലോക്സഭാ തെരഞ്ഞെടുപ്പില് മുസ്്ലിംങള് അടക്കമുള്ള ന്യൂനപക്ഷങ്ങള് എല്.ഡി.എഫില് നിന്ന് അകന്ന് നില്ക്കുന്ന സാഹചര്യത്തില് മുസ്്ലിം ലീഗും യു.ഡി.എഫും ഈ പരാമര്ശനം രാഷ്ട്രീയമായ ആയുധമാക്കുമെന്ന് ഉറപ്പാണ്.
https://www.facebook.com/Malayalivartha