പലവിധത്തിലുള്ള മര്‍ദനങ്ങള്‍ സോഷ്യല്‍ മീഡിയയില്‍ വരാറുണ്ട്. എന്നാല്‍ ഇതല്‍പം കുടപ്പമാണെന്നാണ് പലരും പറയുന്നത്. റെയില്‍വേ ജീവനക്കാരനെ തലങ്ങും വിലങ്ങും മര്‍ദ്ദിക്കുന്ന ഒരു സ്ത്രീയുടെ ദൃശ്യങ്ങള്‍ കഴിഞ്ഞ ദിവസങ്ങളില്‍ സമൂഹമാധ്യമങ്ങളില്‍ പ്രചരിച്ചിരുന്നത്. മുംബൈ സെന്‍ട്രല്‍ ബുക്കിങ് സെന്ററില്‍ നടന്ന സംഭവത്തിന്റെ ദൃശ്യങ്ങളാണ് പ്രചരിക്കുന്നത്. എന്തായാലും ഒരു ഉദ്യോഗസ്ഥനെ ഇങ്ങനെ ദയയില്ലാതെ തല്ലുന്നതിനെതിരെ ചില പുരുഷ പ്രേമികളും രംഗത്തെത്തിയിരുന്നു. എന്നാല്‍ സംഭവമറിഞ്ഞപ്പോള്‍ രണ്ടെണ്ണം കൂടി കൊടുക്കണമെന്നാണ് അവരും പറഞ്ഞത്. 

റെയില്‍വേ സ്റ്റേഷനില്‍ യുവതി എത്തിയതോടെയാണ് സംഭവങ്ങളുടെ തുടക്കം. റെയില്‍വേ സ്‌റ്റേഷനിലെ ബുക്കിങ് കൗണ്ടറിലെത്തിയ യാത്രക്കാരി ഫോണ്‍ അവിടെവച്ച് മറന്നു. കുറച്ചു കഴിഞ്ഞ് ഫോണിന്റെ കാര്യം ഓര്‍മ്മ വന്നപ്പോള്‍ അവര്‍ തിരികെ കൗണ്ടറിലെത്തി തന്റെ ഫോണ്‍ അന്വേഷിച്ചു. ആ സമയം ബുക്കിങ് ഓഫിസിലുണ്ടായിരുന്ന ഉദ്യോഗസ്ഥന്‍ ഫോണ്‍ അവിടെയില്ല എന്ന് സ്ത്രീയോടു പറഞ്ഞു.

ഉദ്യോഗസ്ഥന്റെ വാക്കുകേട്ട് കുപിതയായ യാത്രക്കാരി ബുക്കിങ് ഓഫിസിനുള്ളില്‍ക്കയറുകയും ഉദ്യോഗസ്ഥന്റെ കസേരയ്ക്കരികില്‍ ഒളിപ്പിച്ചു വച്ച നിലയില്‍ തന്റെ ഫോണിന്റെ കവര്‍ കണ്ടെത്തുകയും ചെയ്തു. ഇതുകൂടി കണ്ടതോടെ കലിമൂത്ത് യാത്രക്കാരി തിരച്ചില്‍ ഊര്‍ജ്ജിതമാക്കി. ഒടുവില്‍ ഉദ്യോഗസ്ഥന്റെ പോക്കറ്റില്‍ നിന്ന് യാത്രക്കാരി തന്റെ ഫോണ്‍ കണ്ടെടുത്തു. ഫോണ്‍ ഒളിപ്പിച്ചു വച്ച ശേഷം തന്നോടു നുണ പറഞ്ഞ ഉദ്യോഗസ്ഥനെ യാത്രക്കാരി തലങ്ങും വിലങ്ങും മര്‍ദ്ദിക്കുകയും സംഭവത്തിന്റെ ദൃശ്യങ്ങള്‍ പകര്‍ത്തി സമൂഹ മാധ്യമങ്ങളില്‍ പോസ്റ്റ് ചെയ്യുകയും ചെയ്തു. വളരെപ്പെട്ടന്നാണ് ഇത് വൈറലായത്.