മാധ്യമപ്രവര്‍ത്തകയോട് തട്ടിക്കയറി വിവാദത്തിലായി സിപിഎം എറണാകുളം ജില്ലാ സെക്രട്ടറി സിഎന്‍ മോഹനന്‍. പാലാരിവട്ടം മേൽപ്പാലത്തിലെ നിർമ്മാണത്തിൽ അഴിമതി ആരോപിച്ച് പാർട്ടി സംഘടിപ്പിച്ച പ്രതിഷേധമാർച്ചിനിടെ പ്രതികരണം ആരാഞ്ഞ സ്വകാര്യ ചാനൽ റിപ്പോർട്ടറെയാണ് പാർട്ടിയുടെ എറണാകുളം ജില്ലാ സെക്രട്ടറി ആട്ടിയകറ്റിയത്.

മാർച്ചിനൊപ്പം നടന്നുനീങ്ങിയ വനിതാ മാദ്ധ്യമപ്രവർത്തക ജില്ലാ സെക്രട്ടറിയോട് സമരം എങ്ങനെ മുന്നോട്ട് കൊണ്ട്‌പോകാനാണ് ഉദ്ദേശിക്കുന്നതെന്ന ചോദ്യം ഉന്നയിച്ചു . എന്നാൽ മറുപടി നൽകുന്നതിനു പകരം എന്നാൽ മോഹനൻ മാധ്യമ പ്രവർത്തകയോട് ക്ഷുഭിതനാകുകയായിരുന്നു . ‘ അതൊന്നും ഇപ്പോൾ പറയാൻ പറ്റില്ല ,സമരം നടക്കുമ്പോഴാണോ ബൈറ്റ് എടുക്കാൻ നിൽക്കുന്നത് ,മാറി നിൽക്ക് അങ്ങോട്ട് ‘ എന്നായിരുന്നു ആക്രോശം.

പിണറായി വിജയന്റെ 'കടക്ക് പുറത്ത്' കേരളം ഏറെ ചർച്ച ചെയ്തതാണ്. മുന്‍പ് തിരുവനന്തപുരത്തുണ്ടായ രാഷ്ട്രീയ അക്രമ സംഭവങ്ങളുടെ പശ്ചാത്തലത്തില്‍ ബിജെപി നേതാക്കളുമായി മുഖ്യമന്ത്രി സമാധാന ചര്‍ച്ച നടത്തിയിരുന്നു. ഇത് റിപ്പോര്‍ട്ട് ചെയ്യാനെത്തിയ മാധ്യമപ്രവര്‍ത്തകരെയാണ് കടക്ക് പുറത്ത് എന്ന് ആക്രോശിച്ച് മുഖ്യമന്ത്രി വിരട്ടിയത്. അതിനു പിന്നാലെയാണ് മുഖ്യമന്ത്രിക്ക് ചേര്‍ന്ന പാര്‍ട്ടി സെക്രട്ടറിയാണെന്ന് തെളിയിച്ചുകൊണ്ട് സിഎന്‍ മോഹനന്‍ രംഗത്ത് വന്നിരിക്കുന്നത്.