കേരളാ സര്‍വ്വകലാശാല വൈസ് ചാന്‍സലര്‍ വി.പി മഹാദേവന്‍ പിള്ളയെ രാജ്ഭവനിലേക്ക് ഗവര്‍ണര്‍ വിളിച്ചുവരുത്തി
യൂണിവേഴ്‌സിറ്റി കോളജിലെ എസ്.എഫ്.ഐയുടെ അക്രമത്തിനും പരീക്ഷാ ക്രമക്കേടിനും പി.എസ്.സി റാങ്ക് ലിസ്റ്റില്‍ എസ്.എഫ്.ഐ നേതാക്കള്‍ ഉള്‍പ്പെട്ടതും അടക്കമുള്ള ഗുരുതരമായ പ്രശ്‌നങ്ങളില്‍ സംസ്ഥാന ഗവര്‍ണര്‍ ഇടപെടുന്നില്ലെന്നും അദ്ദേഹം പാറക്കല്ല് പോലെ നിരുത്തരവാദിത്തപരമായ സമീപനം തുടരുകയാണെന്നും ബി.ജെ.പി വക്താവ് ആരോപിച്ചതിന് പിന്നാലെ ഗവര്‍ണര്‍ നിലപാട് കടുപ്പിച്ചു. കേരളാ സര്‍വ്വകലാശാല വൈസ് ചാന്‍സലര്‍ വി.പി മഹാദേവന്‍ പിള്ളയെ രാജ്ഭവനിലേക്ക് വിളിച്ചുവരുത്തി. പരീക്ഷാക്രമക്കേട് അടക്കമുള്ള വിഷയങ്ങളുടെ വിശദാംശങ്ങള്‍ ആരാഞ്ഞു. വൈകുന്നേരം നാല് മണിക്കാണ് വി.സി എത്തിയത്. പൊലീസ് കോണ്‍സ്റ്റബിള്‍ ബറ്റാലിയന്‍ നാല് പരീക്ഷയുടെ വിശദാംശങ്ങള്‍ സഹിതം തിങ്കളാഴ്ച കോണ്‍സ്റ്റബിള്‍ പരീക്ഷയുടെ വിശദാംശങ്ങളുമായി എത്താന്‍ പിഎസ്!സി ചെയര്‍മാനും ഗവര്‍ണര്‍ നിര്‍ദ്ദേശം നല്‍കി.
പരീക്ഷാ ക്രമക്കേട് നടന്നിട്ടുണ്ടെന്ന വിവരം പുറത്ത് വന്നതിനെ തുടര്‍ന്ന് ഗവര്‍ണര്‍ വൈസ്ചാന്‍സിലറോട് അടിയന്തര റിപ്പോര്‍ട്ട് തേടിയിരുന്നു. യൂണിവേഴ്!സിറ്റി കോളേജില്‍ അഖില്‍ എന്ന വിദ്യാര്‍ത്ഥിയ കുത്തി കൊലപ്പെടുത്താന്‍ ശ്രമിച്ച ശിവരഞജിത്തിന്റെ വീട്ടില്‍ നിന്നും കോളജ് യൂണിയന്‍ ഓഫീസില്‍ നിന്നും ഉത്തരക്കടലാസുകളും ഫിസിക്കല്‍ എഡ്യൂക്കേഷന്‍ ഡയറക്ടറുടെ സീലും കണ്ടെത്തിയിരുന്നു. ഇതേ കുറിച്ച് ആധികാരികമായ അന്വേഷണം വേണമെന്നാണ് ബി.ജെ.പിയുടെ ആവശ്യം. കോളേജ് സംഘര്‍ഷവും പരീക്ഷാ ക്രമക്കേടുകളും ആധികാരികമായി തെളിഞ്ഞിട്ടും ഗവര്‍ണര്‍ പി.സദാശിവം നടപടി എടുക്കാതെ പാറക്കല്ല് പോലെ ഇരിക്കുന്നത് കുറ്റകരമായ അനാസ്ഥയാണെന്ന് ബിജെപി വക്താവ് ബി ഗോപാലകൃഷ്ണന്‍ ആരോപിച്ചിരുന്നു. അതിന് പിന്നാലെയാണ് വി.സിയെ വിളിച്ചുവരുത്തിയത്.
കാലാവധി തീരാന്‍ ഒരു മാസം കൂടിയുള്ള ഗവര്‍ണര്‍ ഒളിച്ചോടാതെ നടപടി എടുക്കണം അല്ലെങ്കില്‍ രാജിവെണമെന്നും ബി.ഗോപാലകൃഷ്ണന്‍ ആവശ്യപ്പെട്ടിരുന്നു. ഗുരുതരമായ ക്രമക്കേടുകള്‍ നടന്നിട്ടും സര്‍വകലാശാല ചാന്‍സലറായ ഗവര്‍ണര്‍ മൗനംപാലിക്കുന്നത് ശരിയല്ല. ഗവര്‍ണര്‍ പല കാര്യങ്ങളിലും കാര്യക്ഷമമായി ഇടപെടുന്നില്ല. യൂണിവേഴ്‌സിറ്റി കോളജ് വിഷയത്തില്‍ മാത്രമല്ല ഭരണഘടന സ്ഥാപനമായ പി.എസ്.സിയിലും ക്രമക്കേടുകള്‍ നടന്നിട്ട് രാജ്ഭവന്‍ ഇടപെട്ടില്ലെന്നും ഗോപാലകൃഷ്ണന്‍ ആരോപിച്ചിരുന്നു. ബി.ജെ.പി ഭരിക്കുന്ന കേന്ദ്രസര്‍ക്കാരാണ് റിട്ടയേഡ് ജസ്റ്റിസ് ആയ സദാശിവത്തെ ഗവര്‍ണറാക്കിയത്. കഴിഞ്ഞ ഉമ്മന്‍ചാണ്ടി സര്‍ക്കാരിന്റെ കാലത്തായിരുന്നു നിയമനം. അതിന് ശേഷം കണ്ണൂരിലെ അക്രമങ്ങള്‍ അടക്കം നിരവധി വിഷയങ്ങളില്‍ ബി.ജെ.പി നേതൃത്വം ഗവര്‍ണറെ സമീപിച്ചിരുന്നെങ്കിലും കാര്യമായ ഇടപെടല്‍ ഉണ്ടായില്ല. കണ്ണൂരിലെ രാഷ്ട്രീയ കൊലപാതകങ്ങളെ തുടര്‍ന്ന് ഒരു തവണ മുഖ്യമന്ത്രി പിണറായി വിജയനെ രാജ്ഭവനില്‍ വിളിച്ചുവരുത്തി വിശദീകരണം തേടിയിരുന്നു.
യൂണിവേഴ്‌സിറ്റി കോളേജിലെ അക്രമസംഭവങ്ങളുടെ പശ്ചാത്തലത്തില്‍ യൂണിവേഴ്‌സിറ്റി കോളേജിന്റെ ചാന്‍സലര്‍ കൂടിയായ ഗവര്‍ണര്‍ അടിയന്തരമായി ഇടപെട്ട് അന്വേഷണം നടത്തണമെന്ന് ബിജെപി ദേശീയ നിര്‍വാഹക സമിതിയംഗം പി.കെ. കൃഷ്ണദാസും ആവശ്യപ്പെട്ടിരുന്നു. യൂണിവേഴ്‌സിറ്റി കോളേജ് മയക്കുമരുന്നിന്റെ കേന്ദ്രമാണ്. യൂണിവേഴ്‌സിറ്റി കോളേജില്‍ നടക്കുന്ന പിഎസ്സി പരീക്ഷകളില്‍ ക്രമക്കേട് നടന്നിട്ടുണ്ടെങ്കില്‍ അതിനെതിരെ നടപടിയെടുക്കണമെന്നും അദ്ദേഹം ആവശ്യപ്പെട്ടു. ഇത്തരത്തിലുള്ള സമ്മര്‍ദ്ദവും കെ.എസ്.യു- യൂത്ത് കോണ്‍ഗ്രസ് പ്രവര്‍ത്തകരുടെ പ്രതിഷേധവും ശക്തമായതോടെയാണ് ഗവര്‍ണര്‍ നടപടികള്‍ വേഗത്തിലാക്കിയത്.
https://www.facebook.com/Malayalivartha
