നവജാതശിശുക്കളുടെ ഭാരക്കുറവ് ഗൗരവമായി കാണണമെന്ന് മുഖ്യമന്ത്രി... സമ്പുഷ്ട കേരളം സംസ്ഥാനതല ഉദ്ഘാടനം മുഖ്യമന്ത്രി നിര്വഹിച്ചു
സ്ത്രീകളിലേയും കുട്ടികളിലേയും പോഷകക്കുറവ് പരിഹരിക്കാനായി പോഷണ് അഭിയാന്റെ ഭാഗമായി സംസ്ഥാന വനിതാ ശിശുവികസന വകുപ്പ് ആവിഷ്കരിച്ച സമ്പുഷ്ട കേരളം പദ്ധതിയുടെ സംസ്ഥാനതല ഉദ്ഘാടനവും അങ്കണവാടികള്ക്കുള്ള മൊബൈല് വിതരണവും ഐ.സി.ഡി.എസ്.സി.എ.എസ്. സോഫ്റ്റുവെയര് ഉദ്ഘാടനവും തിരുവനന്തപുരം ജവഹര് സഹകരണ ഭവനില് വച്ച് മുഖ്യമന്ത്രി പിണറായി വിജയന് നിര്വഹിച്ചു.
മിക്കവാറും കാര്യങ്ങളില് നാം മുന്നിലാണ് നില്ക്കുന്നതെങ്കിലും നവജാതശിക്കുക്കളുടെ ഭാരക്കുറവ് ഗൗരവമായി കാണണമെന്ന് മുഖ്യമന്ത്രി ഉദ്ഘാടന പ്രസംഗത്തില് പറഞ്ഞു. നവജാത ശിശുക്കളുടെ കുറഞ്ഞ മരണ നിരക്കില് കേരളം മുന്നിലാണെങ്കിലും നവജാതശിക്കുക്കളുടെ ഭാരത്തിന്റെ കാര്യത്തില് നമ്മുടെ തൊട്ടു കിടക്കുന്ന സംസ്ഥാനത്തിന്റെ പുറകിലാണ്. നമ്മളിത് ശ്രദ്ധിക്കേണ്ട കാര്യമാണെന്നും മുഖ്യമന്ത്രി പറഞ്ഞു. കേരളത്തിലുടനീളം സമ്പുഷ്ട കേരളം പദ്ധതി നടപ്പിലാക്കുകയാണ് ലക്ഷ്യമെന്ന് ചടങ്ങില് അധ്യക്ഷത വഹിച്ച ആരോഗ്യ സാമൂഹ്യനീതി വനിത ശിശുവികസന വകുപ്പ് മന്ത്രി കെ.കെ. ശൈലജ ടീച്ചര് പറഞ്ഞു. കുട്ടികളുടേയും അമ്മമാരുടേയും ആരോഗ്യ സംരക്ഷണവുമായി ബന്ധപ്പെട്ട് വളരെ പ്രധാനപ്പെട്ട പദ്ധതിയാണ് സമ്പുഷ്ട കേരളം.
എത്രയോ പദ്ധതികള് ആവിഷ്ക്കരിച്ചിട്ടും കുട്ടികളിലും സ്ത്രീകളിലും എത്താത്തതാണ് അവരുടെ ആരോഗ്യം പൂര്ണമായും സംരക്ഷിക്കാന് കഴിയാത്തത്. അതിനാലാണ് കേന്ദ്ര സര്ക്കാര് പോഷണ് അഭിയാന് പദ്ധതി ആവിഷ്ക്കരിച്ചപ്പോള് മുലയൂട്ടല് പ്രോത്സാഹിപ്പിക്കുക, പൊണ്ണത്തടി കുറയ്ക്കുക തുടങ്ങിയ കാര്യങ്ങള് കൂട്ടിച്ചേര്ത്ത് സമ്പുഷ്ട കേരളം എന്ന വിപുലമായ പദ്ധതി ആവിഷ്ക്കരിച്ചത്. വിവിധ വകുപ്പുകളിലായി ഒട്ടേറെ കാര്യങ്ങള് ഗര്ഭിണികള്ക്കും പിഞ്ചു കുഞ്ഞുങ്ങള്ക്കും മുലയൂട്ടുന്ന അമ്മമാര്ക്കും നടപ്പിലാക്കുന്നുണ്ട്. എന്നാല് ഇങ്ങനെയൊക്കെ ചെയ്തിട്ടും അമ്മമാരുടേയും കുഞ്ഞുങ്ങളുടേയും ആരോഗ്യം പൂര്ണമായും സംരക്ഷിക്കപ്പെടുന്നില്ല എന്ന് ഒട്ടേറെ അനുഭവത്തിലൂടെ കാണുന്നുണ്ട്.
ഈ രാജ്യത്തുടനീളം പരിശോധിക്കുമ്പോള് വലിയ തോതിലുള്ള ശിശുമരണ നിരക്ക് കാണാന് സാധിക്കും. കേരളം ആരോഗ്യ സൂചികയില് പല കാര്യങ്ങളിലും മുന്നിലാണെങ്കിലും കുറേക്കൂടി മെച്ചപ്പെട്ട സൂചകങ്ങളുണ്ടാകാന് പ്രവര്ത്തിക്കേണ്ടതാണ്. മാതൃമരണ നിരക്കും ശിശുമരണ നിരക്കും വലിയ തോതില് കുറയ്ക്കാന് നിരവധി പ്രവര്ത്തനങ്ങള് നടത്തുന്നുണ്ടെന്നും മന്ത്രി കെ.കെ. ശൈലജ ടീച്ചര് വ്യക്തമാക്കി.
എല്ലാ പൗരന്മാരും ഒരുപോലെ ആരോഗ്യ പൂര്ണരായിരിക്കുകയാണ് സര്ക്കാരിന്റെ ലക്ഷ്യമെന്ന് ചടങ്ങില് മുഖ്യാതിഥിയായ കേന്ദ്ര വനിത ശിശു വികസന വകുപ്പ് മന്ത്രി സ്മൃതി ഇറാനി പറഞ്ഞു. മുഖ്യമന്ത്രി ഉദ്ഘാടനം നിര്വഹിച്ച അങ്കണവാടി ജീവനക്കാര്ക്ക് നല്കുന്ന സ്മാര്ട്ട് ഫോണിലൂടെ കാസ് (ഇഅട) സിസ്റ്റം ആവിഷ്ക്കരിക്കുന്നതിലൂടെ ഗുണഭോക്താക്കളെ സംബന്ധിച്ച എല്ലാ വിവരങ്ങളും കേന്ദ്രത്തിനും സംസ്ഥാനത്തിനും കൃത്യമായി അറിയാന് സാധിക്കും. ഇതിലൂടെ സ്ത്രീകളുടേയും കുട്ടികളുടേയും ആരോഗ്യ സ്ഥിതി കൃത്യമായി വിലയിരുത്താന് കഴിയുന്നു. സ്ത്രീകളുടേയും കുട്ടികളുടേയും പോഷകാഹാര കുറവ് പരിഹരിക്കുവാന് രാജ്യത്ത് ആദ്യമായി ആവിഷ്ക്കരിച്ച പോഷന് അഭിയാനിലൂടെ സാധിക്കുന്നതാണ്. ഇതില് കേരളം മികച്ച പ്രവര്ത്തനം നടത്തിയതിനാല് പോഷണ് അഭിയാന് പുരസ്കാരവും നല്കി.
സ്ത്രീകളുടേയും കുട്ടികളുടേയും സുരക്ഷയ്ക്കായി 14 ജില്ലകളിലും വണ്സ്റ്റോപ്പ് സെന്ററുകള് സ്ഥാപിക്കുന്നതാണ്. ഓരോ ഗ്രാമത്തിലും മാസത്തിലൊരിക്കലെങ്കിലും ശുചീകരണപോഷകാഹാര ദിനം ആചരിക്കേണ്ടതാണ്. ഇതിന് മുഖ്യമന്ത്രിയുടെ പ്രത്യേക പിന്തുണയും അഭ്യര്ത്ഥിക്കുകയാണ്. കുട്ടികളുടെ ഭാവി സുരക്ഷിതമാക്കുന്ന പ്രവര്ത്തനങ്ങളില് കേന്ദ്ര സംസ്ഥാനങ്ങളുടെ ഒരുമിച്ചുള്ള പ്രവര്ത്തനം അനിവാര്യമാണെന്നും കേന്ദ്രമന്ത്രി പറഞ്ഞു.
https://www.facebook.com/Malayalivartha
