യുഎഇയില് വണ്ടിച്ചെക്ക് കേസില് തുഷാര് ചക്രശ്വാസം വലിക്കുമ്പോള് തുഷാറിന്റെ രാഷ്ട്രീയ ജീവിതത്തിനുതന്നെ തിരിച്ചടിയാകുന്ന കരുനീക്കങ്ങള് കേരളത്തില്... പിണറായിയുടെ മുന്നില് തുഷാര് തെറ്റുകാരനാണെന്നുള്ളതിന്റെ തെളിവുകള് നിരത്താന് രംഗത്തെത്തി നാസില് അബ്ദുള്ളയുടെ സുഹൃത്തുക്കള്
അങ്ങ് യുഎഇയില് വണ്ടിച്ചെക്ക് കേസില് തുഷാര് ചക്രശ്വാസം വലിക്കുമ്പോള് തുഷാറിന്റെ രാഷ്ട്രീയ ജീവിതത്തിനുതന്നെ തിരിച്ചടിയാകുന്ന കരുനീക്കങ്ങളാണ് കേരളത്തില് നടന്നുകൊണ്ടിരിക്കുന്നത്. തുഷാര് ജയിലിലായി എന്നു കേട്ടപ്പോള് ആദ്യം പറന്നെത്തിയത് കേരളത്തിലെ മുഖ്യമന്ത്രി പിണറായി വിജയനാണ്. അതേ പിണറായിയുടെ മുന്നില് തന്നെ തുഷാര് തെറ്റുകാരനാണെന്നുള്ളതിന്റെ തെളിവുകള് നിരത്താന് രംഗത്തെത്തിയിരിക്കുകയാണ് നാസില് അബ്ദുള്ളയുടെ സുഹൃത്തുക്കള്. പ്രവാസി മലയാളി നാസില് അബ്ദുള്ളക്ക് നീതി ലഭ്യമാക്കണമെന്നാവശ്യപ്പെട്ട് സഹപാഠികളും സുഹൃത്തുക്കളും അടങ്ങുന്ന സംഘം മുഖ്യമന്ത്രിയെ കാണും.
നാസില് പഠിച്ച ഭട്ക്കല് അഞ്ചുമാന് എന്ജിനീയറിംഗ് കോളേജിലെ അലുമ്നി അസോസിയേഷനാണ് അദ്ദേഹത്തിന് നീതി ലഭ്യമാക്കണമെന്നാവശ്യപ്പെട്ട് രംഗത്തെത്തിയത്. നാസിലിനും കുടുംബത്തിനും നീതി കിട്ടാന് മുഖ്യമന്ത്രി ഇടപെടണമെന്ന് ഇവര് ആവശ്യപ്പെട്ടു. നാസില് ഇടതുപക്ഷ അനുഭാവിയാണ്. മുഖ്യമന്ത്രി പക്ഷം പിടിച്ചിട്ടില്ല. തുഷാറിന് വേണ്ടി സഹായം അഭ്യര്ത്ഥിച്ചത് മുഖ്യമന്ത്രിയുടെ വിവേചനാധികാരം മാത്രമാണെന്നും പൂര്വ്വ വിദ്യാര്ത്ഥി സംഘടന നേതാക്കള് വിശദീകരിച്ചു. കോളേജിലെ എല്ലാ പൂര്വ്വ വിദ്യാര്ത്ഥികളും നാസിലിന് പിന്തുണ അറിയിച്ചിട്ടുണ്ടെന്ന് ഇവര് വ്യക്തമാക്കി. കേസ് കോടതിയില് ആയതിനാല് കൂടുതല് കാര്യങ്ങള് വിശദീകരിക്കാനാവില്ലെന്ന നിലപാടിലായിരുന്നു നാസിലിന്റെ സുഹൃത്തുക്കള്. അതേസമയം, തുഷാര് വെള്ളാപള്ളിക്കെതിരായ വണ്ടി ചെക്ക് കേസില് നടത്തിയ ഒത്തു തീര്പ്പ് ചര്ച്ചയും ഫലം കണ്ടില്ല. തുഷാറിന്റെയും പരാതിക്കാരന് നാസിലിന്റേയും സുഹൃത്തുക്കള് തമ്മിലാണ് ചര്ച്ച നടത്തിയത്. ആറുകോടി രൂപവേണമെന്ന നിലപാടില് പരാതിക്കാരന് ഉറച്ചു നിന്നതോടെ ചര്ച്ച തീരുമാനമാകാതെ പിരിഞ്ഞു.
ആദ്യഘട്ടത്തില് സഹായവാഗ്ധാനവുമായി എത്തിയ പല പ്രമുഖരും പിന്മാറിയതും തുഷാര് ക്യാമ്പിന് ക്ഷീണമുണ്ടാക്കി. വരുന്ന മൂന്ന് ദിവസം കോടതി അവധിയായ സാഹചര്യത്തില് കോടതിക്കുപുറത്ത് ഒത്തുതീര്പ്പാക്കാനാണ് ശ്രമം. കേസ് അവസാനിപ്പിക്കാതെ തുഷാറിന് യുഎഇ വിട്ടുപോകാനാവില്ല.അതേസമയം തുഷാര് വെള്ളാപ്പള്ളിക്ക് ജയില്മോചിതനാകാന് ജാമ്യത്തുക നല്കി എന്നതുമാത്രമാണ് ചെക്ക് കേസില് ലുലു ഗ്രൂപ്പ് ചെയര്മാന് എം.എ. യൂസഫലിക്കുള്ള ഏക ബന്ധമെന്ന് അദ്ദേഹത്തിന്റെ ഓഫീസ് അറിയിച്ചു. അതല്ലാതെ യൂസഫലി ഈ കേസില് ഏതെങ്കിലും തരത്തില് ഇടപെടുകയോ ഇടപെടാന് ഉദ്ദേശിക്കുകയോ ചെയ്യുന്നില്ലെന്നും ഓഫീസ് അറിയിച്ചു. തുഷാര് വെള്ളാപ്പള്ളിയുമായി ബന്ധപ്പെട്ട കേസ് യു.എ.ഇ.യിലെ കോടതിയുടെ പരിഗണനയിലിരിക്കുന്ന വിഷയമാണ്. വളരെ ശക്തമായ നിയമസംവിധാനമാണ് യു.എ.ഇ.യില് നിലനില്ക്കുന്നത്. കേസുകളില് ഒരു വിധത്തിലുമുള്ള ബാഹ്യ ഇടപെടലുകള് സാധ്യമാകില്ല. ന്യായത്തിനും നീതിക്കും അനുസരിച്ച് മാത്രമാണ് യു.എ.ഇ.യുടെ നിയമവ്യവസ്ഥ പ്രവര്ത്തിക്കുന്നത്. നിയമം നിയമത്തിന്റെ വഴിക്ക് മാത്രമേ പോകുകയുള്ളൂവെന്നും അദ്ദേഹത്തിന്റെ ഓഫീസ് പ്രതികരിച്ചു.
അതേസമയം തുഷാര് വെള്ളാപ്പള്ളിയോടുള്ള വ്യക്തിപരമായ താത്പര്യത്തിന്റെ പേരിലല്ല അദ്ദേഹത്തിന്റെ ജയില്മോചനത്തിന് ഇടപെട്ടതെന്ന വിശദീകരണവുമായി മുഖ്യമന്ത്രി പിണറായി വിജയന്. തുഷാര് എന്തായിരുന്നുവെന്ന് എല്ലാവര്ക്കുമറിയാം. തുഷാറിനെപ്പോലെയൊരാള് ജയിലില് കിടക്കുമ്പോള് നിയമപരമായി ചെയ്യാന് കഴിയുന്നകാര്യം ചെയ്യണമെന്ന് സംസ്ഥാന സര്ക്കാര് കേന്ദ്രത്തോട് ആവശ്യപ്പെട്ടു. ഇക്കാര്യം നേരത്തേ പുറത്തുവന്നതാണെന്നും അദ്ദേഹം പത്രസമ്മേളനത്തില് പറഞ്ഞു. എന്.ഡി.എ. കണ്വീനര്കൂടിയായ തുഷാറിന്റെ ജയില്മോചനത്തിന് ഇടപെട്ടതു സംബന്ധിച്ച വിമര്ശനങ്ങളോട് പ്രതികരിക്കുകയായിരുന്നു അദ്ദേഹം. ജയിലില്ക്കഴിഞ്ഞ ഒരുപാട് ആളുകളുടെ കാര്യത്തില് ഇടപെട്ടിട്ടുണ്ട്. ഷാര്ജ ഭരണാധികാരി കേരളം സന്ദര്ശിച്ചപ്പോള് അവിടെയുള്ള തടവുകാരില് വിട്ടയക്കാനാകുന്നവരെ വിട്ടയക്കണമെന്ന് ആവശ്യപ്പെട്ടിരുന്നു. അതിന് അനുകൂലമായ നിലപാട് അദ്ദേഹം എടുക്കുകയും ചെയ്തിരുന്നു. വിദേശത്ത് ജയിലില് കിടക്കുന്നവരും കേസ് നേരിടുന്നവരുമായ അളുകള്ക്ക് നിയമസഹായം നല്കുന്നതിന് നിയമസഹായ സെല് രൂപവത്കരിക്കാനുള്ള പ്രവര്ത്തനം സര്ക്കാര് നടത്തിവരുകയാണ് എന്നും മുഖ്യമന്ത്രി പറഞ്ഞു. അതേസമയം ഗോകുലം ഗോപാലന്റെ മകന്റെ മോചനത്തിന് ഇടപെടുമോയെന്ന ചോദ്യത്തിന് 'വരട്ടെ...' എന്നായിരുന്നു മുഖ്യമന്ത്രിയുടെ മറുപടി.
"
https://www.facebook.com/Malayalivartha
