ഇന്ന് ജനങ്ങള്‍ ഏറ്റവുമധികം ചര്‍ച്ച ചെയ്യുന്ന വിഷയമാണ് റോഡ് നിയമം ലംഘിക്കുന്നവര്‍ക്ക് വലിയ പിഴ ഈടാക്കുന്നു എന്നത്. റോഡില്‍ എന്ത് കാട്ടിയാലും രക്ഷപ്പെടും എന്ന ചിന്ത ഇനി നടക്കില്ല. ഇതില്‍ ഏറെ പെട്ടുപോയിരിക്കുന്നത് ടു വീലര്‍ യാത്രക്കാരാണ്. ഹെല്‍മറ്റ് ഇല്ലാതെ വണ്ടിയോടിക്കുന്ന ആളുകള്‍ക്ക് ഇരുട്ടടിയാണ് ഉണ്ടായിരിക്കുന്നത്. നേരത്തെയാണെങ്കില്‍ വീടിനടുത്തോ കല്യാണത്തിനോ മറ്റോ പോകുമ്പോള്‍ മിക്കവരും ഹെല്‍മറ്റ് എടുക്കാറില്ല. 100 രൂപ പിഴയെങ്കില്‍ കുഴപ്പമില്ല. അടയ്ക്കും. ഇനിയിപ്പോള്‍ ഹെല്‍മറ്റില്ലെങ്കില്‍ 1000 രൂപ മുതല്‍ 2000 രൂപവരെയാണ് പിഴ. അതായത് ഒരു ഹെല്‍മറ്റ് വാങ്ങുന്നതിനേക്കാള്‍ കൂടുതല്‍ പണം പോകും. ശരിക്കും സാധാരണക്കാരന്റെ രണ്ട് ദിവസത്തെ ശമ്പളം.

കാര്യങ്ങള്‍ ഇങ്ങനെ പുരോഗമിക്കുമ്പോള്‍ ഒരു ബോധവത്ക്കരണമാണ് ചര്‍ച്ചയാകുന്നത്. അതും തൃശ്ശൂര്‍ സിറ്റി പോലീസ് കമ്മീഷണര്‍ ജിഎച്ച് യതീഷ് ചന്ദ്രയുടെ ബോധവത്ക്കരണം. ഹെല്‍മെറ്റ് വെക്കാതെ വന്ന് കമന്റടിച്ച ബൈക്ക് യാത്രികര്‍ക്കാണ് യതീഷ് ചന്ദ്രയുടെ മാസ് ഡയലോഗ്‌സ് കിട്ടിയത്. സെപ്റ്റംബര്‍ ഒന്നു മുതല്‍ ഗതാഗത നിയമ ലംഘനത്തിന് പിഴയായി വന്‍ തുക ഈടാക്കുമെന്ന നിയമം വന്നതോടെയാണ് നിരത്തിലിറങ്ങി ജനങ്ങളെ ബോധവത്കരിക്കാന്‍ പോലീസ് ഉദ്യോഗസ്ഥര്‍ ഇറങ്ങിയത്. ആദ്യ ഘട്ടത്തില്‍ പലരെയും ഉപദേശിച്ച് വിടുകയാണ് ചെയ്തത്. വീണ്ടും ആവര്‍ത്തിച്ചാലാണ് കനത്ത പിഴ ഈടാക്കുന്നത്.

എല്ലാ രീതിയിലുള്ള നിയമ ലംഘനങ്ങള്‍ക്കും കനത്ത പിഴയാണ് ഈടാക്കുന്നത്. മദ്യപിച്ച് വാഹനം ഓടിച്ചാല്‍ 10,000 രൂപയാണ് പിഴ ഈടാക്കുന്നത്. ഇങ്ങനെയുള്ളയുള്ള കാര്യങ്ങള്‍ പറഞ്ഞ് ഉപദേശിച്ച് വിടുകയാണ് പോലീസുകാര്‍. യതീഷ് ചന്ദ്രയും യാത്രക്കാരെ ഉപദേശിച്ചു കൊണ്ടിരിക്കുകയായിരുന്നു. ആദ്യം എത്തിയത് ഹെല്‍മറ്റ് ബൈക്കില്‍ തൂക്കിയിട്ട ചുമട്ടു തൊഴിലാളിയായിരുന്നു. ഇതെന്തിനെന്ന് സ്‌നേഹത്തോടെ യതീഷ് ചന്ദ്ര ചോദിച്ചു. ചിരിയോടെ നിന്ന ചുമട്ട് തൊഴിലാളിയെ ഹെല്‍മറ്റ് നിര്‍ബന്ധപൂര്‍വം വെപ്പിച്ച് താക്കീത് ചെയ്തു വിട്ടയച്ചു. പിന്നാലെ ഹെല്‍മറ്റില്ലാതെ വന്ന യുവാവിനെയും കാര്യങ്ങള്‍ പറഞ്ഞ് ബോധ്യപ്പെടുത്തി പറഞ്ഞുവിട്ടു.

ഇങ്ങനെ പറഞ്ഞു കൊണ്ടിരിക്കുമ്പോള്‍ മാരുതി 800 കാറില്‍ ഒരു കുടുംബമെത്തി. നാലു പേര്‍ സഞ്ചരിക്കേണ്ട കാറില്‍ എട്ടു പേരാണ് യാത്ര ചെയ്തത്. ഉടനെ തന്നെ യതീഷ് ചന്ദ്ര കാറിന് കൈകാണിച്ച് നിര്‍ത്തിച്ചു. എവിടേയ്‌ക്കോ യാത്ര പോയ സംഘം ഇതുകണ്ട് അമ്പരന്നു. കണ്‍മുമ്പില്‍ ടിവിയില്‍ മാത്രം കണ്ടിട്ടുള്ള യതീഷ് ചന്ദ്ര. കാറിലുണ്ടായിരുന്നവര്‍ പുറത്തിറങ്ങി കമ്മീഷണറുടെ അടുത്തെത്തി. യതീഷ് ചന്ദ്രയുടെ ചിരിച്ചുള്ളതാണെങ്കിലും ചോദ്യം കേട്ട് യാത്രക്കാര്‍ അമ്പരന്നു. ഈ കാറില്‍ എത്ര പേര്‍ക്കു കയറാം നിങ്ങള്‍ എത്ര പേരുണ്ട് എന്നാണ് യതീഷ് ചന്ദ്രയുടെ ചോദ്യം. അവര്‍ പതറുന്നത് കണ്ടപ്പോള്‍ യതീഷ് ചന്ദ്ര തന്നെ എണ്ണി. കുട്ടികള്‍ ഉള്‍പ്പെടെ എട്ടു പേര്‍. അതും ചെറിയൊരു മാരുതി കാറില്‍. നിയമ പ്രകാരം രണ്ട് കാറില്‍ കൊള്ളേണ്ട ആള്‍ക്കാര്‍.

ഇത് പല കുടുംബങ്ങളിലും ഉണ്ടാകുന്നതാണ്. എവിടേയ്‌ക്കെങ്കിലും യാത്രതിരിച്ചാല്‍ വീട്ടിലുള്ളവരെ കൂട്ടണ്ടേ. ഇനി ഗസ്റ്റുണ്ടെങ്കില്‍ അവരെ ബസില്‍ കയറ്റി വിടാന്‍ പറ്റോ? അങ്ങനെ ഉള്ളവര്‍ അഡ്ജസ്റ്റ് ചെയ്ത് മടിയിലൊക്കെ ഇരുന്ന് യാത്ര ചെയ്യും. ഇന്നലെവരെ അങ്ങനെയാണ്. പക്ഷെ ഇന്ന് മുതല്‍ ഇതിനും പിഴയാണ്. സെപ്റ്റംബര്‍ ഒന്നു മുതല്‍ ഇങ്ങനെയുള്ള യാത്രകള്‍ക്ക് 2000 രൂപയാണ് പിഴയീടാക്കുന്നതെന്ന് പറഞ്ഞ് യതീഷ് ചന്ദ്ര അവരെ സന്തോഷത്തോടെ യാത്രയാക്കി. അതായത് വേറൊരു വണ്ടി കൂടി പിടിച്ച് പോകുന്നതിന്റെ നാലിരട്ടി തുക.

ഇതിനിടെ ഹെല്‍മറ്റ് വയ്ക്കാതെ വന്ന വിരുതര്‍ യതീഷ് ചന്ദ്രയോട് വാദിച്ചു. ഹെല്‍മറ്റ് ധരിച്ചാല്‍ മുടി കൊഴിയുമെന്നാണ് ഇവര്‍ പറഞ്ഞത്. എന്നാല്‍ അതിന് തക്കതായ മറുപടിയാണ് യതീഷ് ചന്ദ്ര നല്‍കിയത്. ഹെല്‍മെറ്റ് ധരിച്ചാല്‍ മുടി അല്ലേ പോകൂ. തല പോകിലല്ലോ... ഇത് പറഞ്ഞതോടെ എല്ലാവരും അറിയാതെ ചിരിച്ചുപോയി. യുവാക്കളും ആ ചിരിയില്‍ പങ്കാളികളായി യതീഷ് ചന്ദ്രയോട് തോറ്റ് മടങ്ങി. ഇനി ഹെല്‍മറ്റ് ധരിക്കുമെന്ന ഉറപ്പോടെ.