ബസില് നിന്ന് യാത്രക്കാരിയെ തള്ളിയിട്ട സ്വകാര്യബസ് ജീവനക്കാരന് അറസ്റ്റില്
അങ്കമാലിയില് സ്വകാര്യബസ് ജീവനക്കാരനെ പൊലീസ് അറസ്റ്റുചെയ്തു. കാലടി സ്വദേശി സജീവനാണ് അറസ്റ്റിലായത്. ശ്രീമൂലനഗരം സ്വദേശി അന്സി അനീഷിന്റെ പരാതിയില് വിനായക എന്ന സ്വകാര്യബസും പൊലീസ് കസ്റ്റഡിയിലെടുത്തു. യാത്രക്കാരിയെ ബസില്നിന്ന് തള്ളിയിട്ടതായി പരാതി ഉയര്ന്നതിനെ തുടര്ന്നാണ് നടപടി.
വിനായക എന്ന സ്വകാര്യബസിലെ ഡോര് ചെക്കറായ സജീവനാണ് അന്സിയെന്ന യാത്രക്കാരിയെ തള്ളിയിട്ടത്. അങ്കമാലി-കാലടി റൂട്ടില് സര്വീസ് നടത്തുന്ന ബസില് ശ്രീമൂലനഗരത്തുനിന്ന് അന്സി കയറുന്നതിനിടെയാണ് സംഭവം. അന്സിയെ റോഡിലേക്ക് തള്ളിയിടുകയും അസഭ്യം പറയുകയും ചെയ്തുവെന്നുമാണ് പരാതി.
ഡോര് ചെക്കറുടെ ആക്രമണം, വിനായക ബസിന്റെ ഉടമകളുമായി നേരത്തെ തര്ക്കത്തിലേര്പ്പെട്ട ചിലരുടെ ബന്ധുവാണ് അന്സിയെന്ന കാരണത്താലായിരുന്നു. സ്വകാര്യ ബസ്സുകളുടെ മല്സരയോട്ടം പതിവായ മേഖലയില് വിനായക എന്ന ബസിലെ ജീവനക്കാരെ സംബന്ധിച്ച് നേരത്തെ നാട്ടുകാരില് പലരും പരാതി ഉന്നയിക്കുകയും തര്ക്കമുണ്ടാകുകയും ചെയ്തിരുന്നു. ഇതിനിടെയാണ് പുതിയ സംഭവം. സംഭവത്തെത്തുടര്ന്ന് നാട്ടുകാര് ബസ് തടഞ്ഞതോടെയാണ് പൊലീസ് ഇടപെട്ട് ബസ് കസ്റ്റഡിയിലെടുത്തത്. അറസ്റ്റിലായ സജീവനെ പിന്നീട് ജാമ്യത്തില്വിട്ടു.
https://www.facebook.com/Malayalivartha
