താമരശ്ശേരി കട്ടിപ്പാറയില്‍ വീട്ടുവരാന്തയിലേക്ക് കുതിച്ചെത്തിയ കാട്ടുപന്നിയുടെ ആക്രമണത്തില്‍ ഗൃഹനാഥനു പരുക്ക്. ബുധനാഴ്ച രാവിലെ 6 മണിയോടെയാണ് കാട്ടുപന്നിയുടെ ആക്രമണം ഉണ്ടായത്.

വീട്ടുവരാന്തയില്‍ പത്രം വായിച്ചിരുന്ന കട്ടിപ്പാറ വെട്ടിയൊഴിഞ്ഞ തോട്ടത്തില്‍ എം.കെ.അബ്ദുല്‍ ഖാദറിന് (59) ആണ് ഇതില്‍ പരുക്കേറ്റത്. അപ്രതീക്ഷിതമായി വീട്ടുവരാന്തയില്‍ കുതിച്ചെത്തിയ കാട്ടുപന്നി അബ്ദുള്‍ ഖാദറിന്റെ കാലില്‍ കുത്തുകയായിരുന്നു.

വീട്ടുപറമ്പില്‍ കുറച്ചുനേരെ ഓടിയ കാട്ടുപന്നി തുടര്‍ന്ന് പിന്തിരിഞ്ഞ് കയറിവന്ന ഗേറ്റിലൂടെ തന്നെ പുറത്തേക്കു പോയി. ഇതിന്റെ സിസിടിവി ദൃശ്യങ്ങള്‍ പുറത്തുവന്നു. അബ്ദുള്‍ ഖാദറിനെ താമരശ്ശേരി താലൂക്ക് ആശുപത്രിയില്‍ പ്രവേശിപ്പിച്ചു. മൂന്നു വര്‍ഷം മുന്‍പ് ഈ മേഖലയില്‍ കാട്ടുപന്നി ഓട്ടോറിക്ഷയ്ക്കു കുറുകെ ചാടിയുണ്ടായ അപകടത്തില്‍ ഓട്ടോഡ്രൈവര്‍ മരിച്ചിരുന്നു