മുഖ്യമന്ത്രി വി.ഡി. സതീശനെതിരെയുള്ള രണ്ടാംവിവാഹ ആരോപണത്തില്‍ റിപ്പോര്‍ട്ടര്‍ ചാനല്‍ മാനേജിംഗ് ഡയറക്ടര്‍ക്കെതിരെ പൊലീസ് കേസെടുത്തു. റിപ്പോര്‍ട്ടര്‍ ചാനല്‍ മാനേജിംഗ് ഡയറക്ടര്‍ ആന്റോ അഗസ്റ്റിനെ ഒന്നാംപ്രതിയാക്കിയാണ് കേസെടുത്തിരിക്കുന്നത്. മുഖ്യമന്ത്രിയെ പൊതുസമൂഹത്തില്‍ അപമാനിച്ചതിനാണ് കേസ്. ആന്റോ അഗസ്റ്റിനും മറ്റു രണ്ടുപേരും ഗൂഢാലോചന നടത്തിയെന്നും അറിഞ്ഞുകൊണ്ട് വ്യാജരേഖ സൂക്ഷിച്ചുവെന്നും എഫ്.ഐ.ആറില്‍ പറയുന്നു. കെ.പി.സി.സി വക്താവ് രാജു പി.നായര്‍ നല്‍കിയ പരാതിയില്‍ കേസെടുക്കാന്‍ ഡി.ജി.പി നേരത്തെ നിര്‍ദ്ദേശിച്ചിരുന്നു.

ദിവസങ്ങള്‍ക്ക് മുന്‍പ് ഒരു ചടങ്ങില്‍ വച്ചാണ് ആന്റോ അഗസ്റ്റിന്‍ മുഖ്യമന്ത്രിക്കെതിരെ പരാമര്‍ശം നടത്തിയത്. മുഖ്യമന്ത്രി രണ്ടാം വിവാഹം രജിസ്റ്റര്‍ ചെയ്തതിന്റെ രേഖകള്‍ രണ്ട് യുവാക്കള്‍ കൊണ്ടുവന്നുവെന്നും കോടികള്‍ വിലമതിക്കുന്ന വാര്‍ത്തയായിരുന്നു അതെന്നുമായിരുന്നു ആന്റോ അഗസ്റ്റിന്റെ പരാമര്‍ശം. മുഖ്യമന്ത്രിക്കെതിരെ വ്യാജ രേഖകള്‍ ചമച്ച് സര്‍ക്കാരിനെ അട്ടിമറിക്കാനുള്ള നീക്കമാണിതെന്നാണ് പരാതിയില്‍ പറയുന്നത്. സംഭവത്തിന് പിന്നിലെ ഗൂഢാലോചന അന്വേഷിക്കണമെന്നും യുവാക്കളെ കണ്ടെത്തണമെന്നും അഗസ്റ്റിന്റെ കൈവശമുണ്ടെന്ന് പറയപ്പെടുന്ന രേഖകള്‍ കണ്ടെടുക്കണമെന്നും പരാതിയില്‍ ആവശ്യപ്പെടുന്നു.

വി ഡി സതീശന്റെ രണ്ടാം കല്യാണവുമായി ബന്ധപ്പെട്ട ചോദ്യത്തിനൊന്നും തന്റെ കൈയില്‍ മറുപടിയില്ലെന്ന് ആന്റോ അഗസ്റ്റിന്‍ മാദ്ധ്യമങ്ങളോടും പറഞ്ഞിരുന്നു. 'മെസി വിവാദത്തിലെ എല്ലാ അന്വേഷണത്തിലും സഹകരിക്കും. അല്ലാതെ ഞങ്ങള്‍ക്ക് ആരാണ് വാര്‍ത്ത ചോര്‍ത്തി തരുന്നത്? എങ്ങനെയാണ് വാര്‍ത്ത ചെയ്യുന്നത്? കോണ്‍ഗ്രസില്‍ നിങ്ങളെ ആരെല്ലാം സപ്പോര്‍ട്ട് ചെയ്യുന്നുണ്ട്? എന്ന ചോദ്യങ്ങള്‍ക്ക് ഞങ്ങളുടെ കൈയില്‍ മറുപടിയില്ല. സത്യസന്ധമായ അന്വേഷണമാണ് നടത്തുന്നതെങ്കില്‍ ഈ നാടകത്തിന്റെ ആവശ്യമില്ല' എന്നായിരുന്നു ആന്റോ അഗസ്റ്റിന്‍ മാദ്ധ്യമങ്ങളോട് പറഞ്ഞത്.