സംസ്ഥാനത്തെ ഉപതെരഞ്ഞെടുപ്പ് നടക്കുന്ന അഞ്ച് മണ്ഡലങ്ങളില്‍ ഇന്ന് കൊട്ടികലാശം. അഞ്ച് മണ്ഡലങ്ങളിലും വിജയം നേടാനുള്ള അവസാന ഘട്ട തയ്യാറെടുപ്പിലാണ് മൂന്ന് മുന്നണികളും. 21 നാണ് ഉപതെരഞ്ഞെടുപ്പ് . 24 ന് ഫലപ്രഖ്യാപനവും ഉണ്ടാകും. ആഴ്ചകള്‍ നീണ്ട പരസ്യ പ്രചരണത്തിന് ഇന്ന് വൈകിട്ട് ആറിനോടെ സമാപനമാകും.
എറണാകുളം, മഞ്ചേശ്വരം, വട്ടിയൂര്‍ക്കാവ്, കോന്നി , അരൂര്‍, എന്നീ അഞ്ച് നിയമസഭ മണ്ഡലങ്ങളിലും പിന്നീടുള്ള മണിക്കൂറുകള്‍ നിശബ്ദ പ്രചരണത്തിന്റേതാണ്. പരമാവധി വോട്ട് സമാഹരിക്കാനുള്ള തന്ത്രങ്ങള്‍ മെനയാനും ഒപ്പം മുഴുവന്‍ വോട്ടര്‍മാരെയും കാണാനുമാകും മുന്നണികള്‍ ഇനിയുള്ള മണിക്കൂറുകള്‍ വിനിയോഗിക്കുക.

പ്രചാരണ വേളയില്‍ കാണാന്‍ വിട്ടു പോയ വിഭാഗങ്ങളെയും സംഘടനകളെയും കണ്ട് ഒരിക്കല്‍ കൂടി പിന്തുണ ഉറപ്പിക്കാനുമുള്ള അവസാനവട്ട ശ്രമത്തിലാണ് സ്ഥാനാര്‍ത്ഥികള്‍. അവസാനം വരെ ഒപ്പത്തിനൊപ്പം പോരാടിയതിന്റെ ആത്മവിശ്വാസത്തിലാണ് മൂന്ന് മുന്നണികളും. ഇന്ന് നടക്കുന്ന കൊട്ടിക്കലാശം അവസാനവട്ട ശക്തിപ്രകടനമാക്കി മാറ്റുകയാണ് മുന്നണികളുടെ ലക്ഷ്യം