കേരളത്തിൽ ഇപ്പോൾ ഏറ്റവും ചെലവേറിയിരിക്കുന്നത് മരുന്നുകൾക്കാണ് ..അതിൽ തന്നെ കാൻസർ, കിഡ്‌നി രോഗങ്ങൾ എന്നിവ ഇപ്പോൾ വളരെ കൂടുതൽ ആൾക്കാരെ അലട്ടുന്ന പ്രശ്‌നമായി മാറിയിട്ടുണ്ട്. 1600 രൂപ വിലവരുന്ന അവശ്യ മരുന്ന് വെറും 142 രൂപയ്‌ക്ക് നിങ്ങൾക്ക് കേരളത്തിൽ കിട്ടും, എവിടെയാണെന്ന് അറിയുമോ?

സാധാരണക്കാരായ രോഗികളെ സംബന്ധിച്ച് അവർക്ക് മുന്നിലെ ഏറ്റവും വലിയ വെല്ലുവിളികളിലൊന്നാണ് മരുന്നുകളുടെ വില. പുതിയതായി 390 മരുന്നുകള്‍ക്ക് വിപണി വില നിശ്ചയിച്ചതിലൂടെ ക്യാന്‍സര്‍ ചികിത്സാരംഗത്തെ 91 ശതമാനം മരുന്നുകളും രാജ്യത്ത് വില നിയന്ത്രണ സംവിധാനത്തിന്‍റെ പരിധിയിലായി. ക്യാന്‍സര്‍ ചികിത്സാ രംഗത്ത് 426 തരം മരുന്ന് ബ്രാന്‍ഡുകൾ ഇപ്പോൾ വിപണിയില്‍ ഉണ്ട്. ഇവയിൽ ചില മരുന്നുകൾക്കെങ്കിലും ഇപ്പോഴും സാധാരണക്കാരന് താങ്ങാനാവുന്നതിലും വലിയ വിലയാണ് കൊടുക്കേണ്ടിവരുന്നത് .

18 മുതൽ 98 ശതമാനം വരെ വിലക്കുറവിൽ മരുന്നുകൾ ലഭിക്കുന്നൊരു സർക്കാർ നിയന്ത്രിത സ്ഥാപനം കേരളത്തിലുണ്ടെന്ന് എത്രപേർക്കറിയാം?​ കേരളത്തിന്റെ എല്ലാ ജില്ലകളിൽ നിന്നും ധാരാളം പേര് തിരുവന്തപുരത്തെ മെഡിക്കൽ കോളേജിലും റീജിയണൽ കാൻസർ ഇൻസ്റ്റിറ്റ്യൂട്ടിലും ചികിത്സക്കായി എത്തുന്നുണ്ട്. ദൂരെ നിന്ന് ചികിത്സക്ക് എത്തുന്ന ഇവർക്ക് മരുന്നുകളുടെ അമിതവില താങ്ങാവുന്നതിലും അധികമാണ് .

തിരുവനന്തപുരം മെഡിക്കൽ കോളേജിന് സമീപമുള്ള ഇൻ ഹൗസ് ഡ്രഗ് ബാങ്കിൽ നിന്ന് കുറഞ്ഞ വിലയിൽ മരുന്നുകൾ വാങ്ങാവുന്നതാണ് .1993 മുതൽ ഈ സ്ഥാപനം പ്രവർത്തിക്കുന്നുണ്ട് . ഇതിന് ശേഷമാണ് കാരുണ്യ,​ നീതി,​മാവേലി സ്റ്റോറുകളൊക്കെ വന്നത്. ദൂരെസ്ഥലങ്ങളിൽ നിന്ന് പോലും നിരവധിപേരാണ് ഇവിടെ മരുന്ന് വാങ്ങാനായി വരുന്നത്.

കാൻസർ,​കിഡ്നി രോഗികൾക്കൊക്കെ ഏകദേശം പകുതിവിലയ്ക്കാണ് ഇവിടെ നിന്ന് മരുന്നുകൾ ലഭിക്കുന്നത്.470000 രൂപയുടെ ഒരു മരുന്ന് 220000 രൂപയ്ക്ക് ഇവിടെ നിന്ന് കിട്ടും. കാൻസർ കിഡ്നി രോഗികളൊക്കെ ഉപയോഗിക്കുന്ന 1600 രൂപ വിലവരുന്ന ഒരു മരുന്ന് 142 രൂപയ്ക്ക് ലഭിക്കും.

രോഗികൾ സ്ഥിരമായി ഉപയോഗിക്കുന്ന 470 രൂപ വിലയുള്ള അയൺ ഇഞ്ചക്ഷന് 48 രൂപയാണ് ഇൻ ഹൗസ് ഡ്രഗ് ബാങ്കിലെ വില.ഇടനിലക്കാരെ പൂർണ്ണമായി ഒഴിവാക്കി നേരിട്ട് കമ്പനികളിൽ നിന്ന് വരുന്നത് കൊണ്ടാണ് വിലകുറച്ച് നൽകാൻ സാധിക്കുന്നത്.

വിലക്കുറവിൽ മരുന്നുകൾ ലഭിക്കുമ്പോൾ അതിന്റെ ഗുണമേന്മയുടെ കാര്യത്തിൽ ജനങ്ങൾക്ക് ആശങ്ക ഉണ്ടാകേണ്ട കാര്യമില്ല .. മാർക്കറ്റിൽ സാധാരണയായി വിൽക്കുന്ന അതേ മരുന്നുകൾ തന്നെയാണ് ഇവിടെനിന്ന് നൽകുന്നതെന്ന് ചീഫ് ഫാർമസിസ്റ്റ് പറയുന്നു.രോഗികൾക്ക് മാത്രമല്ല സർക്കാർ ആശുപത്രികൾക്കും ഇവിടെ നിന്ന് മരുന്നുകൾ കൊടുക്കുന്നുണ്ട്. ഈ സ്ഥാപനം ഒരു സർക്കാർ നിയന്ത്രിത സ്ഥാപനമായതിനാൽ ഗുണമേന്മയെക്കുറിച്ച്ഒ മരുന്നിൽ മായം ഉണ്ടാകുമോ എന്നോ ചിന്തിക്കേണ്ട കാര്യമില്ല

മരുന്നിന്റെ വില വിവരം സാധാരണക്കാരിലെത്തിക്കാനായി ഒരു മൊബൈൽ ആപ്ലിക്കേഷനും ഇവർ ആരംഭിച്ചിട്ടുണ്ട്. സ്റ്റോക്ക് ഉള്ള മരുന്നുകൾ ഏതൊക്കെയാണെന്നും അത് മാർക്കറ്റിൽ എത്ര രൂപയ്ക്കാണ് വിൽക്കുന്നതെന്നും ഈ ആപ്ലിക്കേഷൻ വഴി മനസിലാക്കാം.