സിപിഎം സംസ്ഥാന സമ്മേളനത്തിനു നാളെ തുടക്കം. സമ്മേളനത്തിന്റെ ഭാഗമായുള്ള കൊടിമര ജാഥകള്‍ ഇന്ന് ആലപ്പുഴയില്‍ എത്തും. കഴിഞ്ഞ ദിവസം സിപിഎം സംസ്ഥാന സെക്രട്ടറി പിണറായി വിജയന്‍ സമ്മേളനത്തിന്റെ ഒരുക്കങ്ങള്‍ വിലയിരുത്തിയിരുന്നു. എന്നാല്‍ വിമത നിക്കവുമായി വിഎസ് എത്തിയ സാഹചര്യത്തില്‍ സംസ്ഥാന സമ്മേളനത്തില്‍ വിഎസിന്റെ ആരോപണങ്ങള്‍ക്ക് പിണറായി മറുപടി പറയേണ്ടി വരും. സംസ്ഥാന കമ്മിറ്റിയില്‍ മൃഗീയ ഭൂരിപക്ഷമുള്ള ഔദ്യോഗിക പക്ഷത്തെ വിഎസ് എങ്ങനെ നേരിടുമെന്ന് കാത്തിരുന്ന് കാണണം. വിഎസിന്റെ ആരോപണങ്ങള്‍ ആവശ്യമെങ്കില്‍ സംസ്ഥാനസമ്മേളനത്തില്‍ ചര്‍ച്ചയെയ്യാമെന്ന് കേന്ദ്രകമ്മിറ്റി വ്യക്തമാക്കിയിട്ടുണ്ട്.
ടിപി വധം, ആര്‍എസ്പിക്കു സീറ്റു നിഷേധിച്ചത്, സോളാര്‍കേസ്, സെക്രട്ടേറിയറ്റ് ഉപരോധം തുടങ്ങിയ കാര്യങ്ങളില്‍ പാര്‍ട്ടിയുടെ പ്രഖ്യാപിത നിലപാടുകളെ ചോദ്യം ചെയ്യുന്ന രേഖയുമായിട്ടായിരിക്കും വിഎസ് നാളെസംസ്ഥാന സമ്മേളനത്തില്‍ എത്തുന്നത്. പിണറായിയെ പ്രതികൂട്ടില്‍ നിര്‍ത്തിയുള്ള ചര്‍ച്ചയാണ് വിഎസ് ലക്ഷ്യമിടുന്നത്. വിഎസിന്റെ രേഖ സമ്മേളന പ്രതിനിധികള്‍ക്ക് വിതരണം ചെയ്യാനും നീക്കമുണ്ട്. 700ഓളം പ്രതിനിധികള്‍ സംസ്ഥാന സമ്മേളനത്തില്‍ പങ്കെടുക്കുന്നുണ്ട്. സമ്മേളന നഗറിലേക്കുളള കൊടിമരജാഥ ശൂരനാട് രക്തസാക്ഷി മണ്ഡപത്തില്‍ നിന്ന് കഴിഞ്ഞ ദിവസം പ്രയാണം തുടങ്ങി. പ്രതിപക്ഷനേതാവ് വിഎസ് അച്യുതാനന്ദനാണ് ജാഥയുടെ ഉദ്ഘാടനം നിര്‍വ്വഹിച്ചത്.
പുന്നപ്രവയലാര്‍ സമരസേനാനികൂടിയായ പ്രതിപക്ഷ നേതാവ് വി.എസ്. അച്യുതാനന്ദന്‍ ആദ്യ പുഷ്പചക്രം സമര്‍പ്പിച്ചു. പിന്നാലെ നേതാക്കളും. തുടര്‍ന്ന് കൊടിമര ജാഥ വിഎസ് ഉദ്ഘാടനം ചെയ്തു. ജാഥ ക്യാപ്റ്റന്‍ ആനത്തലവട്ടം ആനന്ദനും വി.എസിനും ചടങ്ങില്‍ സ്വീകരണവും നല്‍കി.തുടര്‍ന്ന് കൊടിമരം വി.എസ് ജാഥാ ക്യാപ്റ്റന്‍ ആനത്തലവട്ടം ആനന്ദന് കൈമാറി.
ശൂരനാട് രക്തസാക്ഷി കുടുംബത്തിലെ നിരവധി പേരും ചടങ്ങിനെത്തിയിരുന്നു. സിപിഎം കൊല്ലം ജില്ലാ സെക്രട്ടറി കെ.എന്‍ ബാലഗോപാല്‍, പത്തനംതിട്ട ജില്ലാ സെക്രട്ടറി കെ.പി ഉദയഭാനു ഉള്‍പ്പെടെ നിരവധി നേതാക്കളും പ്രവര്‍ത്തകരും ചടങ്ങിനെത്തി. വിവിധ കേന്ദ്രങ്ങളിലെ സ്വീകരണം ഏറ്റുവാങ്ങി കൊടിമര ജാഥ ഇന്ന് വൈകുന്നേരത്തോടെ ആലപ്പുഴയില്‍ എത്തിച്ചേരും.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha