തൃപ്തി ദേശായിയും ബിന്ദു അമ്മിണിയും ശബരിമല ദര്ശനം നടത്തിയേ അടങ്ങൂ എന്ന് വാശി പിടിച്ചതോടെ സി.പി.എമ്മും സര്ക്കാരും വെട്ടിലായി
തൃപ്തി ദേശായിയും ബിന്ദു അമ്മിണിയും ശബരിമല ദര്ശനം നടത്തിയേ അടങ്ങൂ എന്ന് വാശി പിടിച്ചതോടെ സി.പി.എമ്മും സര്ക്കാരും വെട്ടിലായി. ബി.ജെ.പിക്കാകട്ടെ വീണ്ടും സുവര്ണാവസരവും കൈവന്നു. ആചാരലംഘനം നടക്കാതിരിക്കാന് ഭക്തര്ക്കൊപ്പം അണിനിരന്ന് അവരുടെ വിശ്വാസം നേടിയെടുക്കാന് എന്തും സഹരിക്കാന് ബി.ജെ.പിയും ശബരിമല കര്മസമിതിയും തയ്യാറായിരിക്കുകയാണ്. നിലയ്ക്കല് മുതല് സന്നിധാനം വരെ പ്രവര്ത്തകര് കര്മനിരതരായുണ്ട്. അതിനൊപ്പം പൊലീസും ജാഗ്രത പാലിക്കുന്നുണ്ട്. യുവതികളെ പ്രവേശിപ്പിക്കേണ്ടെന്നാണ് സര്ക്കാര് തീരുമാനം. അതില് യാതൊരു വീട്ട് വീഴ്ചയ്ക്കും തയ്യാറല്ല. സര്ക്കാര് യുവതികള്ക്ക് പൊലീസ് സംരക്ഷണം നല്കില്ലെന്ന് നിയമമന്ത്രി എ.കെ ബാലനും വ്യക്തമാക്കി.
തൃപ്തി ദേശായിയേയും ബിന്ദു അമ്മിണിയേയും സുരക്ഷാപ്രശ്നം ചൂണ്ടിക്കാട്ടി പിന്തിരിപ്പിക്കാനാണ് പൊലീസ് ശ്രമിക്കുന്നത്. ഇവര്ക്ക് പിന്നാലെ മനീതി സംഘം അടക്കമുള്ളവര് എത്തുമോ എന്ന ആശങ്കയും പൊലീസിനും സര്ക്കാരിനുമുണ്ട്. അങ്ങനെയെങ്കില് വരുംദിവസങ്ങളില് സ്ഥിതിഗതികള് കൂടുതല് വഷളാകും. ബി.ജെ.പിയും ശബരിമല കര്മസമിതിയും അത് ആയുധമാക്കുകയും സര്ക്കാര് വെട്ടിലാവുകയും ചെയ്യും. ശബരിമലയ്ക്കായി പ്രത്യേകം നിയമം വേണമെന്ന കോടതി നിലപാടിനോട് താല്പര്യമില്ലാത്ത സര്ക്കാര് നിലപാടിന് എന്.എസ്.എസും പിന്തുണ പ്രഖ്യാപിച്ചിട്ടുണ്ട്. അങ്ങനെ കാര്യങ്ങള് ഏതാണ്ട് അനുകൂലമായി നീങ്ങുമ്പോഴാണ് തൃപ്തിയും ബിന്ദു അമ്മിണിയും സര്ക്കാരിനെ പ്രതിരോധത്തിലാക്കുന്നത്.
യുവതീപ്രവേശനം കഴിഞ്ഞതവണ നടത്തിയ സര്ക്കാരിന് ലോക്സഭാ തെരഞ്ഞെടുപ്പിലൂടെ വിശ്വാസികള് തിരിച്ചടി നല്കിയിരുന്നു. അങ്ങനെ ചരിത്രത്തിലെ ഏറ്റവും വലിയ തോല്വിയാണ് എല്.ഡി.എഫിനുണ്ടായത്. തുടര്ന്നാണ് സി.പി.എമ്മും സര്ക്കാരും നിലപാട് മാറ്റിയത്. അന്തിമവിധി വരുന്നത് വരെ യുവതികളെ സര്ക്കാര് സുരക്ഷയോടെ മലകയറ്റില്ല. ഇതിനകം ദര്ശനം നടത്താനെത്തിയ 15 യുവതികളെ പൊലീസ് കാര്യങ്ങള് പറഞ്ഞ് മനസ്സിലാക്കി തിരിച്ചയച്ചിരുന്നു. അവരില് മലയാളികളില്ലായിരുന്നു. ദര്ശനത്തിനായി പൊലീസിന്റെ വെര്ച്വല് ക്യൂവില് 36 യുവതികളാണ് ബുക്ക് ചെയ്തിരുന്നത്. അവരുടെ പേര് വിവരങ്ങള് പൊലീസ് പുറത്ത് വിട്ടിട്ടില്ല.
മണ്ഡലകാലം അലങ്കോലമായാല് അത് സര്ക്കാരിനും സി.പി.എമ്മിനും വലിയ തിരിച്ചടിയാകും. അതിന് എന്ത് വിട്ടുവീഴ്ചയ്ക്കും സി.പി.എം തയ്യാറാണ്. യുവതീപ്രവേശന വിധി സ്റ്റേ ചെയ്യാതിരുന്നിട്ടും സര്ക്കാര് പഴയനിലപാടില് നിന്ന് പിന്നോട്ട് പോയത് അതുകൊണ്ടാണ്. അതേസമയം എന്ത് വിലകൊടുത്തും ഭക്തര്ക്കൊപ്പം നില്ക്കാനാണ് ബി.ജെ.പിയുടെ നിലപാട്. സംസ്ഥാന സര്ക്കാര് സ്വീകരിക്കുന്ന നിലപാടിന് അനുസരിച്ചായിരിക്കും ബി.ജെ.പിയുടെ ശബരിമല നിലപാടെന്ന ശക്തമായ താക്കീത് സംസ്ഥാന ജനറല് സെക്രട്ടറിയും ശബരിമല സമരനായകനുമായ കെ.സുരേന്ദ്രന് വ്യക്തമാക്കിക്കഴിഞ്ഞു. അതിനാല് ബി.ജെ.പിയെ പ്രകോപിപ്പിക്കാതിരിക്കുന്നതാണ് സര്ക്കാരിന് നല്ലത്.
https://www.facebook.com/Malayalivartha
