മെട്രോ റെയില്‍ പൈലിങ്ങിനിടെ പേട്ട പാലത്തിനു താഴെ പ്രകൃതിവാതക പൈപ്പ് ലൈന്‍ (സി.എന്‍.ജി.) പൊട്ടി വാതകം വലിയ തോതില്‍ ചോര്‍ന്നത് പരിഭ്രാന്തിയുണ്ടാക്കി. തൃപ്പൂണിത്തുറ ഭാഗത്തേക്കുള്ള മെട്രോ റെയിലിനായി യന്ത്രം ഉപയോഗിച്ച് പൈലിങ് നടത്തിയ ഭാഗത്താണ് വാതകക്കുഴല്‍ പൊട്ടിയത്. ബുധനാഴ്ച സന്ധ്യക്ക് ഏഴു മണിയോടെയാണ് സംഭവം. അപകടം ഒന്നുമില്ല.

ഇന്ത്യന്‍ ഓയില്‍-അദാനി ഗ്യാസ് പൈപ്പ് ലൈനാണ് പൊട്ടിയത്. സംഭവമറിഞ്ഞ ഉടന്‍തന്നെ വാതക നീക്കം തടഞ്ഞതായി സ്ഥലത്തെത്തിയ അദാനി ഗ്യാസ് അധികൃതര്‍ പറഞ്ഞു. പൈലിങ്ങിനായി ഇറക്കിയിരുന്ന വലിയ ഇരുമ്പുകുഴലിലൂടെ വാതകം അര മണിക്കൂറിലേറെ പുറത്തേക്ക് തള്ളി. വിവിധ സ്ഥലങ്ങളില്‍ നിന്നെത്തിയ അഗ്‌നിരക്ഷാ സേനാംഗങ്ങള്‍ കുഴലിലേക്ക് ഈ സമയം മുഴുവന്‍ വെള്ളം പമ്ബ് ചെയ്തുകൊണ്ടിരുന്നു. സംഭവത്തെത്തുടര്‍ന്ന് വലിയ ഗതാഗതക്കുരുക്കുണ്ടായി. യാതൊരു വിധത്തിലുള്ള സുരക്ഷാ കാര്യങ്ങളും നോക്കാതെ പൈലിങ് നടത്തിയതാണ് അപകടത്തിന് കാരണമായതെന്ന് ആക്ഷേപമുണ്ട്. ഭൂമിയുടെ പ്രതലത്തില്‍നിന്ന് എട്ടു മീറ്റര്‍ താഴെ താഴ്ത്തിയിരിക്കുന്ന നാല് ഇഞ്ചിന്റെ 25 ബാര്‍ പ്രഷര്‍ പൈപ്പാണ് പൊട്ടിയത്.

കുണ്ടന്നൂരില്‍നിന്ന് കരിങ്ങാച്ചിറയിലേക്കുള്ള പ്രകൃതി വാതക ലൈനാണിത്. വാതക പൈപ്പ് പൊട്ടിയതിനെ തുടര്‍ന്ന് ഏറെ നേരം വൈറ്റില - തൃപ്പൂണിത്തുറ റോഡില്‍ വാഹന ഗതാഗതം സ്തംഭിച്ചു. വലിയ അപകട സാധ്യതകളുള്ള എണ്ണക്കുഴലുകള്‍ പോകുന്നതും ഈ റോഡിനടിയിലൂടെയാണ്. പേട്ടയില്‍നിന്ന് തൃപ്പൂണിത്തുറയിലേക്ക് കെ.എം.ആര്‍.എല്‍. മെട്രോ ലൈന്‍ നിര്‍മാണ പ്രവൃത്തികള്‍ ആരംഭിച്ചിട്ടേയുള്ളൂ. അപ്പോള്‍ തന്നെയാണ് വലിയ അപകടസാധ്യത തന്നെ ഉണ്ടായേക്കാവുന്ന വാതകക്കുഴല്‍ പൊട്ടിയതും വാതകം ചോര്‍ന്ന സംഭവം ഉണ്ടായതും.