സംസ്ഥാനത്ത് വൈദ്യുതി പ്രതിസന്ധി രൂക്ഷമായതിന് പിന്നാലെ വൈദ്യുതി ഉപയോഗത്തില്‍ വീണ്ടും നിയന്ത്രണം കടുപ്പിച്ച് കെഎസ്ഇബി. പീക്ക് സമയത്ത് വൈദ്യുതി ഉപയോഗത്തില്‍ ഉപഭോക്താക്കളും വ്യവസായ സ്ഥാപനങ്ങളും നിയന്ത്രണം പാലിക്കണമെന്നാവശ്യപ്പെട്ട് കെഎസ്ഇബി സര്‍ക്കുലര്‍ പുറത്തിറക്കി.

വൈകീട്ട് എഴ് മുതല്‍ പന്ത്രണ്ട് വരെയുള്ള സമയത്ത് വൈദ്യുതി ഉപയോഗം കുറയ്ക്കണം. വ്യവസായ സ്ഥാപനങ്ങളുടെ പ്രവര്‍ത്തനം സോളാര്‍ അല്ലെങ്കില്‍ ഓഫ് പീക്ക് സമയങ്ങളിലേയ്ക്ക് മാറ്റണം, വാട്ടര്‍ അതോറിറ്റി പമ്പിംഗും വീടുകളില്‍ കൂടുതല്‍ വൈദ്യുതി ആവശ്യമായ ഉപകരണങ്ങളുടെ പ്രവര്‍ത്തനം പകല്‍ സമയത്താക്കണം, എസിയുടെ താപനില 25 ഡിഗ്രിയില്‍ ക്രമീകരിക്കണം എന്നിങ്ങനെയാണ് കെഎസ്ഇബിയുടെ നിര്‍ദേശങ്ങള്‍. വീടുകളിലെയും വ്യവസായ ശാലകളിലെയും അനാവശ്യ ദീപാലങ്കാരങ്ങള്‍ ഒഴിവാക്കണമെന്നും സര്‍ക്കുലറില്‍ ആവശ്യപ്പെട്ടു.

അതേസമയം, സംസ്ഥാനത്തെ വൈദ്യുതി പ്രതിസന്ധി മുന്‍കൂട്ടി കണ്ടുള്ള ആസൂത്രണം നടന്നില്ലെന്ന് ഇന്നലെ വാര്‍ത്താ സമ്മേളനത്തില്‍ മുഖ്യമന്ത്രി വ്യക്തമാക്കിയിരുന്നു. ഒരാഴ്ചയ്ക്കുള്ളില്‍ കാര്യങ്ങള്‍ കണ്‍ട്രോള്‍ ആകുമെന്നാണ് മുഖ്യമന്ത്രി കഴിഞ്ഞയാഴ്ച പറഞ്ഞെങ്കിലും സംസ്ഥാനത്ത് വൈദ്യുതി നിയന്ത്രണം ഇപ്പോഴും തുടരുകയാണ്.