കോതമംഗലം ചെറിയ പള്ളി സംരക്ഷിക്കണമെന്ന് ആവശ്യപ്പെട്ടു യാക്കോബായ വിശ്വാസികളുടെ അനിശ്ചിത കാല റിലേ നിരാഹാര സമരം ഇന്ന് ആരംഭിക്കും. രാവിലെ 11 മണിക്ക് ആരംഭിക്കുന്ന നിരാഹാര സമരത്തില്‍ വൈദികരും വിശ്വാസികളും പങ്കെടുക്കും. ഇന്നലെ കോതമംഗലത്ത് ചേര്‍ന്ന സര്‍വകക്ഷി യോഗത്തിന്റെ തീരുമാന പ്രകാരമാണ് സമരം. കോതമംഗലം ചെറിയ പള്ളി സര്‍ക്കാര്‍ സംരക്ഷണത്തില്‍ ഏറ്റെടുത്ത ഓര്‍ത്തഡോക്‌സ് വിഭാഗത്തിന് നല്‍കണമെന്ന കോടതി വിധിക്ക് പിന്നാലെയാണ് ഇടവകയിലെ വിശ്വാസികള്‍ പള്ളി സംരക്ഷിക്കണം എന്ന് ആവശ്യപ്പെട്ടു സമരത്തിന് ഒരുങ്ങുന്നത്.

സമര വിളംബരത്തിന്റെ ഭാഗമായി വിശ്വാസികള്‍ ഇന്നലെ വാഹന ജാഥയും സംഘടിപ്പിച്ചു. ഇന്നലെ വൈകീട്ട് കോതമംഗലം ചെറിയ പള്ളിക്കടുത്ത് ചേര്‍ന്ന സര്‍വ കക്ഷി യോഗത്തിന്റെ തീരുമാന പ്രകാരമാണ് പള്ളി സംരക്ഷിക്കണം എന്ന് ആവശ്യപ്പെട്ടു അനശ്ചിത കാല റിലേ നിരാഹാര സമരം നടത്തുന്നത്. ഇടവകയിലെ പഞ്ചായത്ത് ജനപ്രതിനിധികളും വിശ്വാസികളും പുരോഹിതരും സമരത്തിന്റെ ഭാഗമായി നിരാഹാരം അനുഷ്ഠിക്കും. അതെ സമയം പള്ളി കൈ വിട്ട് പോകുന്നത് സഭ തകര്‍ക്കുന്നതിന് തുല്യമാണ് എന്ന നിലപാട് ആണ് ഓര്‍ത്തഡോക്‌സ് വിഭാഗത്തിന് ഉള്ളത്.