ഓര്‍ത്തഡോക്സ്– യാക്കോബായ സഭാ തര്‍ക്കങ്ങള്‍ പരിഹരിക്കാന്‍ ക്രൈസ്തവ സഭാധ്യക്ഷന്‍മാരെ ഇടപെടുവിച്ച് മുഖ്യമന്ത്രിയും ഇടതു മുന്നണിയും കളം പിടിച്ചു. മുഖ്യമന്ത്രിയുടെ ഇടപെടൽ ഫലപ്രാപ്തിയിലെത്തിയാൽ അടുത്ത തെരഞ്ഞടുപ്പിൽ കേരളത്തിലെ ക്രൈസ്തവ വിഭാഗം ഇടതുമുന്നണിക്ക് ഒപ്പം നിൽക്കുമെന്നുള്ള സാധ്യത തള്ളികളയാനാവില്ല. അതേ സമയം സഭാതർക്കത്തിൽ കോൺഗ്രസിന്റെ പൊടി പോലുമില്ല.

രമേശ് ചെന്നിത്തലയുടെ സജീവതയും ഉമ്മൻ ചാണ്ടിയുടെ നിർജീവതയും ക്രൈസ്തവ സഭകളെ കോൺഗ്രസിനോട് അകലാൻ പ്രേരിപ്പിച്ചിട്ടുണ്ട്. കെ.എം മാണിയുടെ അസാന്നിധ്യമാണ് മറ്റൊരു പ്രധാന തടസം. ക്രൈസ്തവ സഭകളും യു ഡി എഫും തമ്മിലുള്ള പാലമായിരുന്നു കെ എം മാണി. ചെങ്ങന്നൂർ ഉപതെരഞ്ഞടുപ്പ് സമയത്ത് തന്നെ ക്രൈസ്തവ സഭകൾ യു ഡി എഫിനോട് അകന്നിരുന്നു.

സഭാ തര്‍ക്കത്തില്‍ മധ്യസ്ഥത വഹിക്കാന്‍ തയാറാണെന്ന് വിവിധ സഭാധ്യക്ഷന്‍മാര്‍ ഓര്‍ത്തഡോക്സ്–യാക്കോബായ സഭകളെ അറിയിച്ചതായി വാർത്ത വന്നതിന് പിന്നാലെ മുഖ്യമന്ത്രി അതിനെ സ്വാഗതം ചെയ്ത് രംഗത്തെത്തിയത് ഇതിന്റെ ഭാഗമാണെന്ന് അറിയുന്നു.

സഭാതർക്കം പരിഹരിക്കാൻ സർക്കാർ നേരത്തെ തന്നെ ശ്രമിക്കുന്നുണ്ടെന്ന് മുഖ്യമന്ത്രി പറഞ്ഞു. മന്ത്രിസഭാ ഉപസമിതി രൂപീകരിച്ചു ശ്രമങ്ങൾ തുടർന്ന് വരികയുമാണ്. നിരവധി തവണ കൂടിയാലോചന നടന്നു. ഒരു വിഭാഗത്തിന്റെ നിസ്സഹകരണമാണ് പ്രശ്‌നപരിഹാരത്തിന് തടസ്സമായത്. ഓർത്തഡോക്സിന്റെ പേരെടുത്ത് പറയാതെയായിരുന്നു മുഖ്യമന്ത്രിയുടെ വിമർശനം.

ഇപ്പോൾ സിറോ മലബാര്‍, ലത്തീന്‍, മാര്‍ത്തോമ്മാ, സിറോ മലങ്കര, സിഎസ്ഐ സഭാധ്യക്ഷന്‍മാർ മുൻകൈയെടുത്തു നടത്തുന്ന ശ്രമത്തിനു സർക്കാരിന്റെ എല്ലാ പിന്തുണയും ഉണ്ടാകുമെന്ന് മുഖ്യമന്ത്രി പറഞ്ഞു. . ഇങ്ങനെ ഒരു നീക്കത്തിന് സന്നദ്ധരായ എല്ലാവരെയും അഭിനന്ദിക്കുന്നു. ഈ നീക്കത്തോട് രണ്ടു വിഭാഗവും ക്രിയാത്മകമായി സഹകരിക്കണം എന്ന് മുഖ്യമന്ത്രി അഭ്യർത്ഥിച്ചു.

ഏതെങ്കിലും വാശിയുടെയോ മുൻധാരണയുടെയോ അടിസ്ഥാനത്തിൽ അനന്തമായി നീണ്ടുപോകേണ്ടതല്ല ഇന്നത്തെ തർക്കവും പ്രശ്നങ്ങളും എന്ന തിരിച്ചറിവോടെയുള്ള പ്രതികരണമാണ് സമൂഹവും സർക്കാരും പ്രതീക്ഷിക്കുന്നതെന്ന് മുഖ്യമന്ത്രി പറഞ്ഞു.

യാക്കോബായ സഭ മുഖ്യമന്ത്രിക്കും ഇടതു മുന്നണിക്കും അനുകൂലമായാണ് നിലകൊള്ളുന്നത് . സെക്രട്ടേറിയറ്റ് നടയിൽ അവർ നടത്തുന്ന സമരം പരിഹരിക്കാൻ മുഖ്യമന്ത്രി ശ്രമിച്ചതാണ്. യാക്കോബായക്കാരുടെ ശവസംസ്കാര ചടങ്ങുകളിൽ ഓർത്തഡോക്സ് വിഭാഗം സ്വീകരിക്കുന്ന എതിർപ്പ് പരിഹരിക്കാനാണ് മുഖ്യമന്ത്രി ശ്രമിച്ചത്. എന്നാൽ അതിന് ഫലമുണ്ടായില്ല. അതേടെ ഓർത്തഡോക്സുമായി മുഖ്യൻ തെറ്റി. മനുഷ്യാവകാശ കമ്മീഷന്റെ ഇടപെടലും ഓർത്തഡോക്സ് സഭക്ക് അനുകൂലമായി തീരുകയാണ് ഉണ്ടായത്.

അതിനിടെ ചർച്ച് ആക്റ്റ് നടപ്പിലാക്കി പള്ളി വക സ്വത്തുക്കൾ സർക്കാർ ഏറ്റെടുക്കണമെന്ന നിർദ്ദേശവും അണിയറയിൽ സജീവമാണ്. പള്ളി സ്വത്തുക്കൾ സർക്കാർ ഏറ്റെടുക്കുന്നതിനോട് എല്ലാ വിഭാഗവും എതിരാണ്. അങ്ങനെയൊരു സാഹചര്യമുണ്ടായാൽ വിവിധ സഭകൾ ഒരുമിച്ച് നിൽക്കും. അതിനാണ് ചർച്ച് ആക്റ്റിന്റെ കാര്യം സർക്കാർ ചർച്ചയാക്കി നിർത്തുന്നത്.