കോടിയേരി ബാലകൃഷ്ണൻ തത്കാലം പാർട്ടി സെക്രട്ടറി സ്ഥാനം ഒഴിയില്ല. മുഖ്യമന്ത്രി പിണറായി വിജയൻ പാർട്ടി സെക്രട്ടറിയുടെ ജോലികൾ കൂടി നിർവഹിക്കുമെന്നാണ് വിവരം. എം വി ഗോവിന്ദൻ അദ്ദേഹത്തെ സഹായിക്കും.

മുഖ്യമന്ത്രിയുടെ തിരക്കുകൾ ക്കിടയിൽ പാർട്ടി സെക്രട്ടറിയുടെ തിരക്കുകൾ എങ്ങനെ കൈകാര്യം ചെയ്യുമെന്നാണ് ചോദ്യമെങ്കിൽ അതിനുള്ള മറുപടി കാത്തിരുന്ന് കാണാം എന്നു തന്നെയാണ്.

കോടിയേരിയുടെ അഭാവത്തിൽ എം വി ഗോവിന്ദൻ എ. കെ. ജി സെന്ററിൽ ഇരിക്കും. എന്നാൽ അദ്ദേഹത്തിന്ന് ചുമതല നൽകാനുള്ള സാധ്യത കുറവാണ്. ഗോവിന്ദൻ മാസ്റ്റർ പിണറായിയുമായി ചർച്ച നടത്തി കാര്യങ്ങൾ തീരുമാനിക്കും. ദീർഘകാലം പാർട്ടിയെ നയിച്ച പിണറായിയെ സംബന്ധിച്ചടത്തോളം പാർട്ടി സെക്രട്ടറി പദവി അത്ര പ്രയാസമേറിയ ഒന്നേയല്ല. പാർട്ടി സെക്രട്ടറിയുടെ പദവിയാണ് പിണറായിക്ക് മുഖ്യമന്ത്രി സ്ഥാനത്തേക്കാൾ പ്രിയപ്പെട്ടത്.

ഇ.പി. ജയരാജൻ ഉൾപ്പെടെയുള്ള പേരുകൾ പാർട്ടി സെക്രട്ടറി സ്ഥാനത്തേക്ക് പരിഗണിച്ചിരുന്നെങ്കിലും അതിലൊന്നും അന്തിമ തീരുമാനമെടുക്കാൻ പിണറായി തയ്യാറായില്ല. കോടിയേരിയിൽ നിന്ന് പാർട്ടി അവധി വാങ്ങിയിട്ടില്ലെന്നാണ് വിവരം. അദ്ദേഹം വിദേശത്ത് ചികിത്സക്ക് പോകുന്നു എന്നത് വാസ്തവമാണ്. പാർട്ടി സെക്രട്ടറിയായിട്ടാണ് പോകുന്നത്. മുൻ സെക്രട്ടറി ആയിട്ടല്ല. അത്തരം കാര്യങ്ങളൊന്നും ആലോചിക്കരുതെന്നാണ് പാർട്ടി നിർദ്ദേശം. പൂർണ ആരോഗ്യത്തോടെ തിരിച്ചെത്തി പാർട്ടി സെക്രട്ടറിയായി തുടരണമെന്നും പിണറായി ആവശ്യപ്പെട്ടു.

കോടിയേരിയും പിണറായിയും വ്യാഴാഴ്ച എ കെ ജി സെന്ററിൽ കൂടികാഴ്ച നടത്തി. മന്ത്രി എ. കെ. ബാലനും ഇവർക്കൊപ്പം ഉണ്ടായിരുന്നു. പിന്നീട് ബാലനെ ഒഴിവാക്കി പിണറായിയും കോടിയേരിയും ഒരുമിച്ച് കണ്ടു. തന്റെ മന്ത്രിസഭയിൽ പുന:സംഘടന ഉണ്ടാകുമെന്നും ഇ.പി. ജയരാജൻ മന്ത്രിയാകുമെന്നുമുള്ള മാധ്യമ വാർത്തകൾ മുഖ്യമന്ത്രിയെ ക്ഷുഭിതനാക്കിയെന്നാണ് വിവരം. ഇതിന് ശേഷമാണ് എം വി ഗോവിന്ദൻ വാർത്തകൾ നിഷേധിച്ച് പത്രകുറിപ്പ് ഇറക്കിയത്. അത് മുഖ്യമന്ത്രിയുടെ നിർദ്ദേശാനുസരണമാണെന്നാണ് വിവരം.

ഇ.പി. ജയരാജനോട് മുഖ്യമന്ത്രിക്ക് ഇഷ്ടക്കേട് ഒന്നുമില്ല. എന്നാൽ അദ്ദേഹം പാർട്ടി സെക്രട്ടറിയാകുമെന്ന മട്ടിൽ വന്ന വാർത്തകളാണ് പിണറായിക്ക് ഇഷ്ടപ്പെടാത്തത്. മാത്രവുമല്ല കോടിയേരിയെ അസുഖഘട്ടത്തിൽ വിഷമിപ്പിക്കാനും മുഖ്യമന്ത്രി തയ്യാറല്ല.

വെള്ളിയാഴ്ച പാർട്ടി സെക്രട്ടേറിയറ്റ് ചേരും. അതിൽ കോടിയേരി പങ്കെടുക്കും. വെള്ളിയാഴ്ചയുള്ള യോഗത്തിലും അവധി സംബന്ധിച്ച ഔദ്യോഗിക അറിയിപ്പ് ഉണ്ടാകാനുള്ള സാധ്യത കുറവാണ്. എം വി ഗോവിന്ദന്റെ കാര്യവും പരാമർശിക്കാൻ സാധ്യതയില്ല.

പാർട്ടി സെക്രട്ടറിയുടെ ചുമതല ഔദ്യോഗികമായിട്ടല്ലെങ്കിലും മുഖ്യമന്ത്രിക്ക് ലഭിക്കുന്നതോടെ കാര്യങ്ങൾ കൂടുതൽ എളുപ്പമാകുമെന്നാണ് വിവരം. അതോടെ കേരള സി പി എമ്മിൽ മുടിചൂടാമന്നനായി പിണറായി മാറുമെന്ന കാര്യത്തിൽ സംശയമില്ല.