പ്രശസ്ത ശാസ്ത്രജ്ഞനും ശാസ്ത്ര പ്രചാരകനുമായ മണപ്പുറത്ത് പ്രഫസര്‍ എം വി ജോര്‍ജ് അന്തരിച്ചു. 91 വയസ്സായിരുന്നു. സംസ്‌കാരം ഇന്ന് രാവിലെ 11.30ന് നടക്കും. ഇന്നു 8.30 ന് നന്തന്‍കോട് ജറുസലം മാര്‍ത്തോമ്മാ പള്ളിയില്‍ എത്തിക്കുന്ന മൃതദേഹം അവിടെ പൊതുദര്‍ശനത്തിനു വയ്ക്കും. 10.15 ന് ആരംഭിക്കുന്ന സംസ്‌കാര ശുശ്രൂഷകള്‍ക്കു ശേഷം നെട്ടയം മലമുകള്‍ സെമിത്തേരിയില്‍ സംസ്‌കാരം നടത്തും.

പ്രകാശ രസതന്ത്ര മേഖലയില്‍ നിസ്തുല സംഭാവനങ്ങള്‍ നല്‍കിയ പ്രഫ.ജോര്‍ജ് ഐഐടി കാണ്‍പൂര്‍ രസതന്ത്ര വിഭാഗം മേധാവിയായും പ്രവര്‍ത്തിച്ചിട്ടുണ്ട്. ഐഐടി കാണ്‍പൂരില്‍ നിന്നു വിരമിച്ച അദ്ദേഹം പാപ്പനംകോട് റീജനല്‍ റിസര്‍ച് ലബോറട്ടറിയില്‍ പ്രകാശ രസതന്ത്ര ഗവേഷണത്തിനായി പ്രത്യേക വിഭാഗം ആരംഭിച്ചിരുന്നു. റീജനല്‍ റിസര്‍ച് ലാബിനെ രാജ്യത്തെതന്നെ മികച്ച ഗവേഷണ സ്ഥാപനമാക്കി മാറ്റുന്നതിന് പ്രധാന പങ്ക് വഹിച്ചത് പ്രഫ.ജോര്‍ജ് ആണ്.

ശാന്തിസ്വരൂപ് ഭട്‌നഗര്‍ അവാര്‍ഡ്, ടിഡബ്ല്യുഎഎസ് അവാര്‍ഡ്, സിആര്‍എസ്ഐ ലൈഫ് ടൈം അച്ചീവ്‌മെന്റ് സ്വര്‍ണ മെഡല്‍ തുടങ്ങിയ ഉന്നത പുരസ്‌കാരങ്ങളും അദ്ദേഹത്തെ തേടിയെത്തിയിട്ടുണ്ട്