മാധ്യമങ്ങള്‍ കുറച്ചുകൂടി ഉത്തരവാദിത്തത്തോടെ വാര്‍ത്തകള്‍ നല്‍കാന്‍ തയ്യാറാകണമെന്ന് ആവശ്യപ്പെട്ട് മാധ്യമ നിലപാടിനെതിരെ രൂക്ഷവിമര്‍ശനവുമായി തിരുവനന്തപുരം നഗരസഭ മേയര്‍ വി. വി. രാജേഷ്. കേന്ദ്ര ആയുഷ് മന്ത്രാലയവും സംസ്ഥാന ആരോഗ്യവകുപ്പും സംയുക്തമായി സംഘടിപ്പിച്ച ദേശീയ ആയുര്‍വേദ ദിനാഘോഷ പരിപാടിയുമായി ബന്ധപ്പെട്ട് പത്രത്തില്‍ വന്ന വാര്‍ത്ത തികച്ചും വസ്തുതാവിരുദ്ധവും ജനങ്ങള്‍ക്കിടയില്‍ തെറ്റിദ്ധാരണ പരത്തുന്നതുമാണെന്ന് അദ്ദേഹം തന്റെ ഫെയ്സ്ബുക്ക് കുറിപ്പിലൂടെ വ്യക്തമാക്കി.

കേന്ദ്ര ആയുഷ് മന്ത്രാലയത്തിന്റെയും സംസ്ഥാന ആരോഗ്യവകുപ്പിന്റെയും പരിപാടി ഉദ്ഘാടനം ചെയ്യേണ്ടിയിരുന്നത് ബഹുമാനപ്പെട്ട മന്ത്രി ശ്രീ. കെ. മുരളിധരനായിരുന്നു. ബുധനാഴ്ച സംസ്ഥാന ക്യാബിനറ്റ് ദിനമായതിനാല്‍ മന്ത്രി വരാന്‍ വൈകുമെന്ന വിവരം സംഘാടകരെ മുന്‍കൂട്ടി അറിയിച്ചിരുന്നു. നഗരസഭ മേയര്‍ എന്ന നിലയ്ക്ക് ഉച്ചയ്ക്ക് മുന്‍പ് മറ്റ് നാല് ഔദ്യോഗിക പരിപാടികളും കോര്‍പ്പറേഷന്‍ ഓഫീസില്‍ മേയര്‍ തന്നെ അധ്യക്ഷത വഹിക്കേണ്ട മീറ്റിംഗുകളും ഉള്ളതിനാല്‍, മന്ത്രിയുടെ സ്റ്റാഫിനെയും സംഘാടകരെയും വിവരം ധരിപ്പിച്ച ശേഷമാണ് ആമുഖ പ്രസംഗം നടത്തി ആശംസകള്‍ അര്‍പ്പിച്ച് താന്‍ മടങ്ങിയതെന്ന് വി. വി. രാജേഷ് വിശദീകരിച്ചു.

ക്യാബിനറ്റ് മീറ്റിംഗ് ഉള്ളതിനാലാണ് ബഹുമാനപ്പെട്ട മന്ത്രി ശ്രീ. കെ. മുരളിധരന്‍ വൈകുന്നതെന്നും ക്യാബിനറ്റ് കഴിഞ്ഞാല്‍ അദ്ദേഹം എത്തിച്ചേരുമെന്നും പറഞ്ഞാണ് താന്‍ പ്രസംഗം ആരംഭിച്ചത് തന്നെ. എന്നാല്‍ കേന്ദ്ര ഗവണ്‍മെന്റിന്റെ 60 ശതമാനം സാമ്പത്തിക പങ്കാളിത്തമുള്ള ഒരു ദേശീയ പദ്ധതിയുടെ പരിപാടി സംഘടിപ്പിക്കുമ്പോള്‍, പ്രധാനമന്ത്രിയുടെയും കേന്ദ്ര ഗവണ്‍മെന്റിന്റെയും ചിത്രം വെയ്ക്കുന്നതിലെ പ്രാധാന്യവും ഔദ്യോഗിക മര്യാദയും ചൂണ്ടിക്കാണിക്കേണ്ടത് തന്റെ ഉത്തരവാദിത്തമായതിനാല്‍ പ്രസംഗത്തില്‍ അത് കൃത്യമായി ചൂണ്ടിക്കാട്ടിയിരുന്നു.

എന്നാല്‍ ഈ സംഭവത്തെ തികച്ചും വളച്ചൊടിച്ചുകൊണ്ട് 'മോദിയുടെ ചിത്രമില്ല: പ്രതിഷേധിച്ച് മേയര്‍, മന്ത്രി മുരളിധരന്‍ എത്താന്‍ വൈകിയതിലും പ്രതിഷേധം' എന്ന രീതിയിലാണ് പത്രത്തില്‍ വാര്‍ത്ത വന്നത്. പ്രധാനമന്ത്രി നരേന്ദ്ര മോദിയുടെ ചിത്രമില്ലാത്തതില്‍ വിയോജിപ്പ് രേഖപ്പെടുത്തി എന്നത് ശരിയാണെങ്കിലും, മന്ത്രി വൈകിയതില്‍ മേയര്‍ പ്രതിഷേധിച്ചു എന്ന് താന്‍ പറയാത്ത കാര്യങ്ങള്‍ കൂട്ടിച്ചേര്‍ത്ത് എഴുതി പിടിപ്പിക്കുകയായിരുന്നുവെന്ന് മേയര്‍ ആരോപിച്ചു. ഇത്തരത്തിലുള്ള വ്യാജ വാര്‍ത്ത നല്‍കിയതിലൂടെ എന്താണ് നേട്ടമെന്നും അദ്ദേഹം ചോദിച്ചു.

സംസ്ഥാന തലസ്ഥാനം കൂടിയായ തിരുവനന്തപുരത്ത് മന്ത്രിമാര്‍ക്ക് ദിനംപ്രതി നിരവധി ഔദ്യോഗിക യോഗങ്ങള്‍ക്കും പാര്‍ട്ടി പരിപാടികള്‍ക്കും പങ്കാളികളാകേണ്ടി വരാറുണ്ട്. മേയര്‍ക്കും സമാനമായ രീതിയില്‍ ഒട്ടനവധി ചുമതലകളുണ്ട്. തന്മൂലം എല്ലാ ഇടത്തും എല്ലാവര്‍ക്കും കൃത്യസമയത്ത് എത്തുവാന്‍ സാധിച്ചെന്നു വരില്ല. എങ്കിലും കൃത്യസമയം പാലിക്കാന്‍ എല്ലാവരും പരമാവധി പരിശ്രമിക്കാറുണ്ടെന്നും പലപ്പോഴും പരസ്പരം ഫോണില്‍ സംസാരിച്ച് സമയം ക്രമീകരിക്കാറുണ്ടെന്നും ഇത് ഭരണപരമായ ചില മാന്യതകളാണെന്നും രാജേഷ് കൂട്ടിച്ചേര്‍ത്തു.