മാന്നാറിന്റെ സ്വന്തം സന്നദ്ധസേവന സൈന്യം: മെര്‍റ്റ്
ഒരു വര്‍ഷത്തിനു മുമ്പുണ്ടായ മഹാപ്രളയത്തില്‍ രാപകല്‍ വ്യത്യാസമില്ലാതെ കൈ മെയ് മറന്ന് ഒരേ മനസോടെ രക്ഷാപ്രവര്‍ത്തനത്തിനിറങ്ങിയ ഒരു പറ്റം യുവാക്കള്‍ മാന്നാറില്‍ ഉണ്ടായിരുന്നു. അവര്‍ കൂടിയാലോചിച്ചു. സ്ഥിരമായ ഒരു സംവിധാനം ഉണ്ടെങ്കില്‍ ഏത് ആപത്ഘട്ടങ്ങളിലും സഹായവുമായി ഓടിയെത്തുവാന്‍ കഴിയുമെന്ന തിരിച്ചറിവും സഹായിക്കുവാന്‍ ഉള്ള മനസ്സും ഒത്തുചേര്‍ന്നപ്പോള്‍ 25 അംഗങ്ങളുടെ സൈന്യം രൂപപ്പെടുകയായിരുന്നു.2019 ജൂലൈയിലാണ് സംഘടനയെന്ന തലത്തില്‍ പ്രവര്‍ത്തനങ്ങള്‍ ആരംഭിച്ചത്. സുഹൃത്തുക്കളായ ഈ യുവാക്കള്‍ പിന്നീട് കൂടി ആലോചിച്ചാണ് മെര്‍റ്റ് എന്ന സന്നദ്ധ സംഘടനയ്ക്ക് രൂപം കൊടുക്കുന്നത്. മാന്നാര്‍ എമര്‍ജന്‍സി റെസ്‌ക്യൂ ടീം എന്നാണ് ഈ സൈന്യത്തിന്റെ പൂര്‍ണ്ണമായ പേര്. ഇത് ഇപ്പോള്‍ മാന്നാറിന്റെ സ്വന്തം സൈന്യമാണ്.
സര്‍ക്കാര്‍ ഏജന്‍സികളായ പോലീസ്, ഫയര്‍ ഫോഴ്‌സ്, ട്രാഫിക് പോലീസ് എന്നീ സേനകളെ സഹായിക്കുന്നതിനൊപ്പം പഞ്ചായത്ത്, റവന്യൂ വകുപ്പിന് വേണ്ട സേവനങ്ങള്‍ നല്‍കുകയെന്നതുമാണ് പ്രധാന ഉദ്ദേശ ലക്ഷ്യങ്ങള്‍. രൂപീകരണത്തിനുശേഷം ആഗസ്റ്റില്‍ നടന്ന രണ്ടാമത്തെ ജല പ്രളയത്തില്‍ മാന്നാറിനെ രക്ഷിക്കുവാന്‍ ഈ ടീം ഉണ്ടായിരുന്നു. ട്രാഫിക് നിയന്ത്രണം ഏറ്റെടുത്തും അപകടത്തില്‍പെട്ടവരെ ആശുപത്രിയില്‍ എത്തിച്ചതും ഈ കാലയളവില്‍ ഇവര്‍ ചെയ്ത നല്ല പ്രവൃത്തികളാണ്.
പരുമല പെരുന്നാള്‍ ദിനങ്ങളില്‍ പോലീസിനൊപ്പം നിന്ന് ട്രാഫിക് നിയന്ത്രിക്കുവാന്‍ ഈ സേന കൂടി എത്തിയതോടെ മാന്നാറില്‍ ഏറ്റവും വലിയ ഗതാഗത തിരക്കുള്ള ആ ദിവസത്തിലെ പോലീസിന്റെ പ്രയാസങ്ങള്‍ ലഘൂകരിക്കാന്‍ കഴിഞ്ഞു. ഒടിഞ്ഞ് വീഴുന്ന മരങ്ങള്‍ മുറിച്ചുമാറ്റുവാനും ഇവര്‍ രംഗത്തുണ്ട്.സംസ്ഥാന പാതയില്‍ മാന്നാര്‍ സ്റ്റോര്‍ ജംഗ്ഷന് വടക്ക് വശത്തായി ഒടിഞ്ഞ് വീണ കൂറ്റന്‍ മരം വെട്ടി മാറ്റുവാന്‍ ഫയര്‍ഫോഴ്‌സിനെ സഹായിക്കുവാന്‍ ഒപ്പം ഉണ്ടായിരുന്നത് മാന്നാറിന്റെ ഈ സേനയാണ്.
മാന്നാര്‍ മുസ്ലീം പുത്തന്‍പള്ളിക്ക് സമീപം രാത്രിയില്‍ ഉണ്ടായ കാര്‍ അപകടത്തില്‍പ്പെട്ടവരെ ആശുപത്രിയില്‍ എത്തിക്കുവാനും ഇവരുടെ വീടുകള്‍ കണ്ടുപിടിച്ച് ബന്ധുക്കളെ രാത്രിയില്‍ വിവിരം ധരിപ്പിക്കുവാനും കൂട്ടികൊണ്ടുവരുവാനുമെല്ലാം ഇവരുടെ സഹായം ഉണ്ടായി. പരുമല ജംഗ്ഷനില്‍ ടോറസ് ലോറിക്കടയില്‍പ്പെട്ട വീട്ടമ്മയെ ആശുപത്രിയില്‍ എത്തിച്ചത് ഈ ടീംമിലെ വനിതാ അംഗമായിരുന്നു. വാഹനം തട്ടി രക്തത്തില്‍ മുങ്ങി കിടന്നയാളെ ആശുപത്രിയില്‍ എത്തിച്ച് രക്ഷിച്ചതും ഇവരുടെ പ്രവര്‍ത്തനങ്ങളില്‍പ്പെടും.
ഈ ചെറിയ കാലയളവില്‍ അമ്പത് പേര്‍ക്കാണ് ഈ ടീം രക്തം ദാനം ചെയ്തത്. രാജീവ് പരമേശ്വരന്‍-രക്ഷാധികാരി,രാജീവ്-പ്രസിഡന്റ്,രഘുധരന്‍- വൈസ് പ്രസി, അന്‍ഷാദ്.പി.ജെ-സെക്രട്ടറി,ഫസല്‍.കെ.റഷീദ്-ജോ.സെക്ര., അരുണ്‍. വി.മോഹന്‍-ഖജാന്‍ജി എന്നിവര്‍ ഭാരവാഹികളായുള്ള സേനയാണ് പ്രവര്‍ത്തിക്കുന്നത്. വരും കാലങ്ങളില്‍ സ്വന്തമായി സൗജന്യ ആംബുലന്‍സ് സര്‍വ്വീസ് തുടങ്ങുവാനുള്ള പദ്ധതികളും തയ്യാറാക്കിയിട്ടുണ്ട്.
24 മണിക്കൂറും സേവനങ്ങള്‍ക്കായി വിളിക്കാവുന്ന മൊബൈല്‍ നമ്പരും ഇവര്‍ പരസ്യപ്പെടുത്തിയിട്ടുണ്ട്. മാന്നാര്‍ സര്‍ക്കിള്‍ ഇന്‍സ്‌പെക്ടര്‍ ജോസ് മാത്യുവാണ് ഫോണ്‍ നമ്പര്‍ പരസ്യപ്പെടുത്തല്‍ നടത്തിയത്. 7909101108 എന്നതാണ് ഈ സേനയുടെ ഫോണ്‍.
https://www.facebook.com/Malayalivartha
