നാവടക്കിയില്ലെങ്കില്... ബിജെപിയോടൊപ്പം എന്ഡിഎയില് നില്ക്കുകയും അതേസമയം തന്നെ എതിരാളികള്ക്ക് വടി കൊടുക്കുകയും ചെയ്യുന്ന വെള്ളാപ്പള്ളി ആന്റ് സണ്ണിനെ നിലയ്ക്ക് നിര്ത്താന് കേന്ദ്ര ബിജെപി; പഴയ വെള്ളാപ്പള്ളി വിശ്വസ്തന് സുഭാഷ് വാസു കളം നിറയുമ്പോള് വെള്ളാപ്പള്ളിമാര്ക്ക് ചങ്കിടിക്കുന്നു
സംസ്ഥാനത്ത് ബിജെപിയ്ക്കനുകൂലമായി നില്ക്കുമെന്ന തോന്നലുണ്ടാക്കി ബിജെപിയ്ക്കെതിരെ പ്രവര്ത്തിക്കുന്ന എസ്എന്ഡിപി ജനറല് സെക്രട്ടറി വെള്ളാപ്പള്ളി നടേശനും മകനും എന്ഡിഎ അധ്യക്ഷനുമായ തുഷാര് വെള്ളാപ്പള്ളിയ്ക്കും ഉടന് ഫലം കിട്ടുമെന്നാണ് ബിജെപി നേതാക്കള് പറയുന്നത്. കഴിഞ്ഞ ഉപതെരഞ്ഞെടുപ്പില് സ്ഥാനാര്ത്ഥിയെപ്പോലും നിര്ത്തിയില്ലെന്നു മാത്രമല്ല ബിജെപി സ്ഥാനാര്ത്ഥി ജയിക്കില്ലെന്ന് തുഷാര് തുറന്നടിക്കുകയും ചെയ്തു. സംസ്ഥാന ബിജെപി നേതാക്കള്ക്ക് ഇതൊന്നും ചോദിക്കാനുള്ള ധൈര്യമില്ല. മാത്രമല്ല സമ്മര്ദം ചെലുത്തി സ്ഥാനങ്ങള് നേടാനായി തുഷാര് വെള്ളാപ്പള്ളി ഡല്ഹിക്ക് ചെന്നു. അമിത്ഷായാകട്ടെ തുഷാറിനെ കണ്ടില്ല. രണ്ടാഴ്ച ഡല്ഹിയില് കഴിഞ്ഞിട്ടും അമിത് ഷാ കനിവ് കാട്ടിയില്ല.
ഇതിനിടെ അച്ഛനേയും മകനേയും പാഠം പഠിപ്പിക്കാന് ബി.ഡി.ജെ.എസിലും എസ്.എന്.ഡി.പി.യിലും വിള്ളലുണ്ടാക്കാന് ബിജെപി ശ്രമിക്കുന്നെന്ന പരാതി അവര് തന്നെ ഉന്നയിച്ചിട്ടുണ്ട്. അടുത്ത നിയമസഭാ തെരഞ്ഞെടുപ്പോടെ ഇടത്തേക്ക് ചാടാനൊരുങ്ങുന്ന വെള്ളാപ്പള്ളിമാര്ക്ക് കനത്ത പണിനല്കാനുള്ള ആയുധമായാണ് വെള്ളാപ്പള്ളിമാരുമായി ഇടഞ്ഞ് നില്ക്കുന്ന ബി.ഡി.ജെ.എസ്. സംസ്ഥാന ജനറല് സെക്രട്ടറിയും മാവേലിക്കര എസ്.എന്.ഡി.പി. യൂണിയന് പ്രസിഡന്റുമായ സുഭാഷ് വാസുവിനെ കാണുന്നത്. അമിത്ഷായുടെ സപ്പോര്ട്ടു കൂടി കിട്ടിയാല് ഉറപ്പാണ് സുഭാഷ് അലി പൊളിക്കും. ഇതിലൂടെ വെള്ളാപ്പള്ളി വിരുദ്ധരെ ഒന്നിപ്പിക്കാമെന്നും കണക്ക് കൂട്ടുന്നു. മാത്രമല്ല വെള്ളാപ്പള്ളിമാര്ക്ക് എന്നും പേടി സ്വപ്നമായ മൈക്രോ ഫിനാന്സും അവരെ അലട്ടുന്നുണ്ട്. ഇങ്ങോട്ട് കേസ് വരാതിരിക്കാനായി മൈക്രോ ഫിനാന്സും വെള്ളാപ്പള്ളി മുന്കൂട്ടി എറിയുന്നുണ്ട്.
ആ ഒരു ആശങ്ക വെള്ളാപ്പള്ളി നടേശന് തുറന്ന് പറയുന്നില്ലെങ്കിലും അദ്ദേഹത്തിന്റെ സംസാരത്തിലതുകാണാം. അതിനാലാണ്സുഭാഷ് വാസുവിനെതിരേ തുറന്നടിച്ച് വെള്ളാപ്പള്ളി നടേശന് രംഗത്തെത്തിയത്. മൈക്രോ ഫിനാന്സുമായി ബന്ധപ്പെട്ട ആരോപണങ്ങളില് കഴമ്പുണ്ടെന്നു കണ്ടതുകൊണ്ടാണ് വിജിലന്സ് അന്വേഷണത്തിന് ഉത്തരവിട്ടതെന്നാണ് വെള്ളാപ്പള്ളി പറയുന്നത്.
തിരുവിതാംകൂര് ദേവസ്വം ബോര്ഡംഗം, സ്പൈസസ് ബോര്ഡ് ചെയര്മാന്, എസ്.എന്. ട്രസ്റ്റ് എക്സിക്യൂട്ടിവ് അംഗം, മാവേലിക്കര യൂണിയന് പ്രസിഡന്റ് തുടങ്ങിയ സ്ഥാനങ്ങള് സുഭാഷ് വാസുവിനു നല്കി. അതുകൊണ്ടുതന്നെ അര്ഹതപ്പെട്ട സ്ഥാനങ്ങള് കിട്ടുന്നില്ലെന്ന ആക്ഷേപത്തില് കഴമ്പില്ല. വെള്ളാപ്പള്ളി നടേശന് എന്ജിനീയറിങ് കോളജ് ഹൈജാക്ക് ചെയ്ത് കൈക്കലാക്കി. വാലല്ലാത്തതെല്ലാം അളയിലാക്കി. ഇനിയെന്താ വേണ്ടത്? ഇനി ഒരു മന്ത്രി വേണം അല്ലേയെന്നും വെള്ളാപ്പള്ളി പരിഹസിച്ചു.
കേരളത്തില് എസ്.എന്.ഡി.പിക്ക് 140 ഓളം യൂണിയനുകളുണ്ട്്. അതില് 14 യൂണിയന് സെക്രട്ടറിമാരും പ്രസിഡന്റുമാരും ചേര്ന്ന് തീരുമാനിച്ചാല് വെള്ളാപ്പള്ളി നടേശന് വെള്ളത്തിലാകില്ല. എസ്.എന്.ഡി.പി യോഗം എന്ന ആനയെ ഏലക്കകൊണ്ട് എറിഞ്ഞാല് ഒരു പുല്ലും സംഭവിക്കില്ല. ആന അറിയുക പോലുമില്ല. ഇതിനെക്കാള് വലിയ പെരുന്നാള് വന്നിട്ട് വാപ്പ പള്ളിയില് പോയിട്ടില്ലെന്നും വെള്ളാപ്പള്ളി പറഞ്ഞു.
വെള്ളാപ്പള്ളി നടേശനെതിരെ ശക്തമായാണ് സുഭാഷ് വാസു രംഗത്തെത്തിയത്. ഒരു കാലത്ത് വെള്ളാപ്പള്ളി നടേശന്റേയും പിന്നീട് തുഷാറിന്റെയും വിശ്വസ്തനായിരുന്ന സുഭാഷ് വാസുവാണ് എസ്എന്ഡിപി യോഗം ജനറല് സെക്രട്ടറിക്കെതിരെ ആരോപണവുമായി രംഗത്തെത്തിയിരിക്കുന്നതെന്നത് ശ്രദ്ധേയമാണ്. അത് അമിതാഷായുടെ സപ്പോര്ട്ടോടെയാണെന്നും വെള്ളാപ്പള്ളിമാര് ഭയക്കുന്നു. സംഘടനയെ വെള്ളാപ്പള്ളി കുടുംബസ്വത്താക്കി മാറ്റിയെന്നും എസ്എന്ഡിപിയിലും എസ്എന് ട്രസ്റ്റിലും കോടികളുടെ അഴിമതി നടത്തിയെന്നുമാണ് സുഭാഷ് വാസുവിന്റെ ആരോപണം. സമുദായും എല്ലാത്തിനും മറുപടി നല്കുമെന്നും കാര്യങ്ങള് എങ്ങനെ വന്നുഭവിക്കുമെന്നു കാണാമെന്നും സുഭാഷ് വാസുവിന്റെ ആരോപണത്തോട് വെള്ളാപ്പള്ളി നടേശന് പ്രതികരിച്ചു.
സംസ്ഥാനത്തെ ഒട്ടുമിക്ക യൂണിയനുകളും വെള്ളാപ്പള്ളിയുടെയും തുഷാറിന്റെയും പ്രവര്ത്തനത്തില് കടുത്ത വിയോജിപ്പ് ഉള്ളവരാണെന്നും സുഭാഷ് വാസുവും അനുകൂലികളും പറയുന്നു. 136 യുണിയനുകളില് 90 യൂണിയനുകള് ഒപ്പമുണ്ടെന്നാണ് അവകാശവാദം. അടുത്തമാസം ഇവരുടെ യോഗം വിളിച്ച് പരസ്യമായി പ്രതികരിക്കാനാണ് നീക്കം. മുന് ഡിജിപി ടി.പി.സെന്കുമാര് കൂടി വിമതപക്ഷത്ത് ഉണ്ടെന്നാണ് സൂചന. അങ്ങനെയായാല് വെള്ളാപ്പള്ളിമാര് പേടിക്കേണ്ടി വരും.
"
https://www.facebook.com/Malayalivartha
