ഒരു പ്രമുഖ സി പി എം നേതാവിന്റെ മകന്റെ നേതൃത്വത്തിൽ വിഴിഞ്ഞം തുറമുഖത്തിന്റെ പേരിൽ സംസ്ഥാനത്തിന്റെ വിവിധ ഭാഗങ്ങളിൽ ക്വാറികൾ ആരംഭിക്കുന്നു. പരിസ്ഥിതി ദുർബല പ്രദേശങ്ങളിൽ വരെ ക്വാറികൾക്ക് സർക്കാർ അനുമതി നൽകിയതിന് പിന്നിലെ കാരണവും ഇതുതന്നെയാണ്. ഏറ്റവും പുതിയതായി കൊല്ലം ചിതറയിലെ പരിസ്ഥിതി ദുർബല പ്രദേശത്താണ് വിരമിച്ച എസ്പിയുടെ നേതൃത്വത്തിൽ പാറ ഖനനത്തിന് അണിയറ ഒരുക്കങ്ങൾ ആരംഭിച്ചത്. തിരുവനന്തപുരം കേന്ദ്രമായി പ്രവർത്തിക്കുന്ന ഒരു ഗ്രൂപ്പാണ് കരിക്കൽ ക്വാറിക്ക് പാരിസ്ഥിതിക അനുമതി സംഘടിപ്പിച്ചത്. ക്വാറി സിപിഎം സംസ്ഥാന കമ്മിറ്റി അംഗത്തിന്റെ മകന്റെ ബിനാമിയാണെന്നാണ് പ്രദേശവാസികൾ പറയുന്നത്. വിഴിഞ്ഞം പദ്ധതിക്ക് അദാനിഗ്രൂപ്പിന് പാറ നൽകാനെന്ന പേരിലാണ് സംസ്ഥാനത്ത് ഉടനീളം മകന്റെ നേതൃത്വത്തിൽ പാറ ഖനനത്തിന് ഉള്ള അണിയറ ഒരുക്കങ്ങൾ തുടങ്ങിയത്. വിഴിഞ്ഞം തുറമുഖം കൃത്യസമയത്ത് തീർത്തില്ലെങ്കിൽ പാഠം പഠിപ്പിക്കുമെന്ന ഒരു മന്ത്രിയുടെ പ്രസ്താവന അഴിമതിയുടെ ഭാഗമായി പുറത്തുവന്നതാണ്.

ചിതറ ഗ്രാമ പഞ്ചായത്തിലെ വട്ടമറ്റം വാർഡിൽ നാലുമുക്കിന് സമീപമാണ് ഏക്കറുകണക്കിന് സർക്കാർ പാറ വിഴിഞ്ഞം പദ്ധതിക്ക് പൊട്ടിക്കാനാണെന്ന വ്യാജേന പാരിസ്ഥിതിക അനുമതി സംഘടിപ്പിച്ചിരിക്കുന്നത്. സംഭവമറിഞ്ഞ് അന്വേഷിക്കാനെത്തിയ പ്രാദേശിക മാധ്യമ പ്രവർത്തകരുടെ വായ്മൂടികെട്ടാൻ മുൻ എസ് പി യുടെ നേതൃത്വത്തിൽ മാധ്യമ പ്രവർത്തകരെ കള്ളകേസിൽ കുടുക്കാൻ കടയ്ക്കൽ പോലീസ് ശ്രമം തുടങ്ങിയതായും വാർത്തയുണ്ട് .

വാർത്ത റിപ്പോർട്ട് ചെയ്യാനെത്തിയ മാധ്യമപ്രവർത്തകരെയും നാട്ടുകാരെയും മുൻ എസ് പിയുടെ നേതൃത്വത്തിലുള്ള ഗുണ്ടാ സംഘം ഭീഷണിപ്പെടുത്തിയിരുന്നു. അതിൻറെ ദൃശ്യങ്ങൾ ഉൾപ്പെടെ പോലീസ് ഉദ്യോഗസ്ഥർക്ക് നൽകിയിട്ടും ഏകപക്ഷീയമായ നിലപാടുമായി കടയ്ക്കൽ പോലീസ് നീങ്ങുകയാണെന്നാണ് ആരോപണം. പരിസ്ഥിതി ദുർബല പ്രദേശവും ജനങ്ങൾ തിങ്ങിപ്പാർക്കുന്നതുമായ മേഖലയുമാണ് ഇത്. ചിതറ ഗ്രാമ പഞ്ചായത്തിൽ മുമ്പ് നിരവധി കരിങ്കൽ ക്വാറികൾ പ്രവർത്തിച്ചിരുന്നു. പരിസ്ഥിതി ദുർബല പ്രദേശമെന്ന കാരണത്താൽ പല ക്വാറികൾക്കും പാരിസ്ഥിതിക അനുമതി നഷ്ടപ്പെട്ടു.

ഭരണത്തിലുള്ള സ്വാധീനം ഉപയോഗിച്ചാണ് നാല് മുക്കിനു സമീപം പുതിയ ക്വാറിക്കുള്ള അനുമതി സമ്പാദിച്ചത്. പരിസ്ഥിതി അനുമതി നൽകുമ്പോൾ ക്വാറിയിലേക്ക് സഞ്ചാരയോഗ്യമായ വഴി പോലുമുണ്ടായിരുന്നില്ല. പരിസ്ഥിതി അനുമതി ലഭിക്കണമെങ്കിൽ ഏഴുമീറ്റർ വഴി ഉണ്ടാകണം എന്നാണ് നിയമം. ആ നിയമം പോലും കാറ്റിൽ പറത്തിയാണ് അനുമതി നൽകിയിരിക്കുന്നത്. പരിസ്ഥിതി അനുമതി ലഭിച്ചതിനു ശേഷമാണ് റോഡ് നിർമ്മാണം നടക്കുന്നത്. സർക്കാർ അനുശാസിക്കുന്ന ദൂരപരിധിക്ക് ഉള്ളിൽ തന്നെ നിരവധി താമസക്കാർ ഉണ്ട്. അവരുടെ ജീവനും സ്വത്തും അപകടത്തിലാണെന്ന് കാണിച്ച് അവർ ഹൈക്കോടതിയിൽ കേസ് ഫയൽ ചെയ്തു .ഏഴ് കേസുകൾ ഹൈക്കോടതിയിൽ ഇതുസംബന്ധിച്ച് നിലനിൽക്കുമ്പോഴാണ് സർക്കാരിന്റെ സ്വാധീനമുപയോഗിച്ച് പരിസ്ഥിതി അനുമതി സംഘടിപ്പിച്ചിരിക്കുന്നത്. കരിങ്കൽ ഖനനത്തിനെതിരെ നാട്ടുകാർ സംഘടിച്ച് പ്രക്ഷോഭത്തിന് ഒരുങ്ങുകയാണ് ഇപ്പോൾ .

ഇത് ഒറ്റപ്പെട്ട സംഭവമല്ല. വിഴിഞ്ഞം തുറമുഖം പൂർത്തിയാകണമെങ്കിൽ ലക്ഷകണക്കിന് ടൺ പാറ ആവശ്യമുണ്ട്. തിരുവനന്തപുരം ജില്ലയിലെ വിവിധ ഭാഗങ്ങളിൽ പുതിയ ക്വാറികൾക്ക് അനുമതി നൽകിയിട്ടുണ്ട്. ഉപ തെരഞ്ഞടുപ്പ് കഴിഞ്ഞ വേളയിലാണ് ക്വാറികൾക്ക് പരിസ്ഥിതി അനുമതി നൽകിയത്. ഉപ തെരഞ്ഞടുപ്പിൽ ലഭിച്ച സഹായങ്ങൾക്ക് പിണറായി സർക്കാരിന്റെ പാരിദോഷികമായിരുന്നു പരിസ്ഥിതി അനുമതി. വിഴിഞ്ഞം തുറമുഖം എല്ലാവരും കാത്തിരിക്കുന്ന ഒരു വികസന പദ്ധതിയാണ്. അതു കൊണ്ടുതന്നെ വിഴിഞ്ഞത്തിന്റെ പേരിൽ ക്വാറികൾക്ക് അനുമതി നൽകിയാൽ ജനരോഷം ഉണ്ടാവില്ലെന്ന് സർക്കാർ കരുതുന്നു.പക്ഷേ പരിസ്ഥിതി അനുമതി വേണമെങ്കിൽ സി പി എം നേതാവിന്റെ മകനെ കാണേണ്ട രീതിയിൽ കാണണമെന്നുമാത്രം. അനുമതി നൽകുന്ന വ്യവസായ മന്ത്രിയ്ക്ക് ഇതിൽ ഒരു റോളും ഇല്ലെന്നാണ് വിവരം. മുമ്പൊരിക്കൽ മന്ത്രി സ്ഥാനം പോയതിനാൽ അദ്ദേഹം സൂക്ഷിച്ചാണ് നീങ്ങുന്നത്.