പോലീസിനെ വട്ടം കറക്കി ജോളി; കൂടത്തായി റോയ് വധക്കേസില്‍ കുറ്റപത്രം സമര്‍പ്പിക്കാന്‍ ഒരുങ്ങി പൊലീസ്
കൂടത്തായി റോയ് വധക്കേസില്‍ കുറ്റപത്രം സമര്‍പ്പിക്കാന്‍ ഒരുങ്ങി പൊലീസ്. 20നു മുന്‍പു കുറ്റപത്രം തയാറാക്കാന്‍ അന്വേഷണസംഘത്തിനു നിര്‍ദേശം ലഭിച്ചു. ഈ മാസം തന്നെ കുറ്റപത്രം കോടതിയില്‍ സമര്‍പ്പിക്കാനാണു നീക്കം. കുറ്റപത്രത്തിന് അന്തിമരൂപം നല്‍കുന്നതിനു മുന്‍പ് സ്‌പെഷല്‍ പ്രോസിക്യൂട്ടറുമായും അന്വേഷണസംഘം ചര്‍ച്ച നടത്തും. ഫൊറന്‍സിക് പരിശോധനാഫലത്തിനു കാത്തുനില്‍ക്കാതെ റോയ് വധക്കേസില്‍ കുറ്റപത്രം സമര്‍പ്പിക്കാന്‍ നേരത്തേ തീരുമാനിച്ചിരുന്നു. ഫൊറന്‍സിക് പരിശോധനാഫലം വൈകുമെന്നാണു പൊലീസിനു ലഭിക്കുന്ന സൂചന.
ഇതു കാത്തിരുന്നാല്‍ കുറ്റപത്രം സമര്‍പ്പിക്കുന്നതു വൈകുകയും ജോളിക്കു സ്വാഭാവിക ജാമ്യം ലഭിക്കുകയും ചെയ്യും. എന്നാല്‍, ശാസ്ത്രീയ തെളിവുകളില്ലാതെ എങ്ങനെ പഴുതടച്ച കുറ്റപത്രം തയാറാക്കുമെന്നതും ചോദ്യചിഹ്നമായി. ഇതോടെയാണ് കൊലപാതക പരമ്പരയില്‍ പോസ്റ്റ്‌മോര്‍ട്ടം നടന്ന ഏക കേസില്‍ ആദ്യം കുറ്റപത്രം സമര്‍പ്പിക്കാനുള്ള തീരുമാനത്തിലെത്തിയത്. സയനൈഡ് ഉള്ളില്‍ ചെന്നാണ് റോയ് മരിച്ചതെന്ന പോസ്റ്റ്‌മോര്‍ട്ടം റിപ്പോര്‍ട്ട് ഈ കേസിലെ ശാസ്ത്രീയ തെളിവാകും.
അറസ്റ്റ് ചെയ്തു 90 ദിവസത്തിനുള്ളില്‍ കുറ്റപത്രം സമര്‍പ്പിച്ചില്ലെങ്കില്‍ പ്രതിക്കു സ്വാഭാവിക ജാമ്യം ലഭിക്കും. മറ്റ് 5 കേസുകളില്‍ കുറ്റപത്രം സമര്‍പ്പിക്കുന്നതു വൈകി ജോളിക്കു ജാമ്യം ലഭിച്ചാലും റോയ് വധക്കേസില്‍ ജോളി ജയിലില്‍ നിന്നു പുറത്തിറങ്ങുന്നതു തടയാമെന്നാണു പൊലീസിന്റെ കണക്കുകൂട്ടല്‍.
കോഴിക്കോട്ന്മ കൂടത്തായി കൊലക്കേസില്‍ സ്‌പെഷല്‍ പ്രോസിക്യൂട്ടറായി പെരുമ്പാവൂര്‍ നിയമ വിദ്യാര്‍ഥിനി വധക്കേസില്‍ സ്‌പെഷല്‍ പ്രോസിക്യൂട്ടറായിരുന്ന അഡ്വ. എന്‍.കെ. ഉണ്ണിക്കൃഷ്ണനെ നിയമിക്കാന്‍ ശുപാര്‍ശ. ഡയറക്ടര്‍ ജനറല്‍ ഓഫ് പ്രോസിക്യൂഷന്‍ മഞ്ചേരി ശ്രീധരന്‍ നായരാണ് ആഭ്യന്തര വകുപ്പിനു ശുപാര്‍ശ നല്‍കിയത്.
https://www.facebook.com/Malayalivartha
