സംസ്ഥാനത്തെ കടുത്ത സാമ്പത്തിക പ്രതിസന്ധിയിലേക്കു നയിച്ചതു നിരന്തരമായ കടമെടുപ്പും ധൂർത്തും അനാവശ്യ ചെലവുകളും നികുതി വരുമാനം കൂട്ടാൻ കഴിയാത്തതുമാണെന്ന് യുഡിഎഫ് തയാറാക്കിയ സാമ്പത്തിക ധവളപത്രം. സംസ്ഥാനം ഇത്രത്തോളം ദാരിദ്ര്യത്തിലേക്കു കൂപ്പുകുത്തിയിട്ടും അനാവശ്യ ചെലവുകളെ നിയന്ത്രിക്കേണ്ട ധനവകുപ്പ് പുലർത്തുന്ന മൗനം വിസ്മയിപ്പിക്കുന്നതാണ്. ധനമന്ത്രിയെ നോക്കുകുത്തിയാക്കി മുഖ്യമന്ത്രി വകുപ്പിൽ അദൃശ്യ ഭരണം നടത്തുന്നെന്ന് ധവളപത്രം അവതരിപ്പിച്ച് വി.ഡി. സതീശൻ എംഎൽഎ പറഞ്ഞു.

സംസ്ഥാനത്ത് ആദ്യമായാണ് ഭരണപക്ഷം സൃഷ്ടിച്ച സാമ്പത്തിക പ്രതിസന്ധി ജനങ്ങളിലെത്തിക്കാൻ പ്രതിപക്ഷം ധവളപത്രം തയാറാക്കുന്നത്. കെ.സി. ജോസഫ് എംഎൽഎക്കു നൽകി പ്രതിപക്ഷ നേതാവ് രമേശ് ചെന്നിത്തല ധവളപത്രം പുറത്തിറക്കി. വി.ഡി. സതീശൻ എംഎൽഎയുടെ നേതൃത്വത്തിൽ എംഎൽഎമാരായ കെ.എസ്. ശബരീനാഥൻ, കെ.എൻ.എ. ഖാദർ, എം. ഉമ്മർ, മോൻസ് ജോസഫ്, ഡോ. എൻ. ജയരാജ്, അനൂപ് ജേക്കബ് എന്നിവരുൾപ്പെട്ട സമിതിയാണ് തയാറാക്കിയത്.

സർക്കാർ വരുമ്പോൾ സംസ്ഥാനത്തിന്റെ കടബാധ്യത 1.57 ലക്ഷം കോടി രൂപയായിരുന്നത് മൂന്നര വർഷം കൊണ്ട് 2.49 ലക്ഷം കോടിയായി. ഒരു കേരളീയന്റെ കടം 46,078 രൂപയിൽ 72,430 രൂപയായി. ഇതിനു പുറമെയാണ് കിഫ്ബി വഴിയുള്ള 50,000 കോടിയുടെ കടമെടുക്കൽ. . ഇൗ സർക്കാർ വരുത്തിവയ്ക്കുന്ന ബാധ്യതകൾ അടുത്ത സർക്കാരിന്റെ തലയിലാകും.

നികുതി വരുമാനത്തിൽ കഴിഞ്ഞ വർഷം 25 ശതമാനവും ഇൗ വർഷം 30 ശതമാനവും വർധനയാണ് ധനമന്ത്രി പ്രഖ്യാപിച്ചത്. എന്നാൽ, 12% മാത്രമേ നികുതി കൂടിയുള്ളൂ. നികുതി വകുപ്പിലെ അരാജകത്വവും അഴിമതിയുമാണു തിരിച്ചടിക്കു കാരണം. 4000 കോടിയുടെ വാറ്റ് നികുതിയും പിരിച്ചെടുക്കാനായില്ല. മാപ്പാക്കൽ പദ്ധതി വഴി 4,000 കോടി പിരിച്ചെടുക്കാൻ തീരുമാനിച്ചെങ്കിലും 10% പോലും കിട്ടിയില്ല. ജിഎസ്ടിക്കു കീഴിൽ മാത്രം 13,305 കോടിയാണ് പിരിച്ചെടുക്കാനുള്ളത്.

റവന്യു വരുമാനവും ചെലവും തമ്മിലെ അന്തരം സൂചിപ്പിക്കുന്ന റവന്യു കമ്മി 16,183 കോടിയായി . ആകെ ചെലവും വായ്പയൊഴിച്ചുള്ള വരുമാനവും തമ്മിലെ അന്തരം വ്യക്തമാക്കുന്ന ധനക്കമ്മി 23,686 കോടിയായി. സാമ്പത്തിക തകർച്ച മൂടിവയ്ക്കാനായി റവന്യു കമ്മിയിൽ 8,892 കോടിയും ധനക്കമ്മിയിൽ 9,378 കോടിയും കുറച്ചു കാണിച്ചതായി കൺട്രോളർ ആൻഡ് ഓഡിറ്റർ ജനറൽ തന്നെ കണ്ടെത്തി. സംസ്ഥാനം ചെലവിടുന്ന തുകയുടെ വെറും 8% മാത്രമാണ് വികസന പദ്ധതികൾക്കായി വിനിയോഗിക്കുന്നത്. ഇൗ വർഷം ബജറ്റിൽ 16,269 കോടി രൂപ വികസന പദ്ധതികൾക്കായി മാറ്റിവച്ചിട്ടുണ്ടെങ്കിലും ഇതുവരെ 5,206 കോടിയെ ചെലവിട്ടിട്ടുള്ളൂ.
ലോക ബാങ്ക് നൽകിയ 1779 കോടി രൂപ വകമാറ്റി ചെലവഴിച്ച സർക്കാർ കിഫ്ബിക്ക് മസാല ബോണ്ട് വഴി കിട്ടിയ 2150 കോടി രൂപ എന്തു കൊണ്ട് ട്രഷറിയിൽ നിക്ഷേപിച്ചില്ല? ഇത് 3195 കോടിയായാണ് തിരിച്ചടയ്ക്കേണ്ടത്. കിഫ്ബി ആരംഭിച്ചിട്ട് 3 വർഷമായെങ്കിലും 553 കോടി രൂപയുടെ 13 പദ്ധതികൾ മാത്രമാണ് ഇതുവരെ പൂർത്തിയാക്കിയത്. 591 പദ്ധതികൾക്കായി 45,619 കോടി രൂപ അംഗീകരിച്ചു. ഒരു വർഷം കിഫ്ബിക്കു ചെലവാക്കുന്നത് 25 കോടി .