പ്രതീക്ഷിച്ചതിലും നേരത്തെ തിരുവനന്തപുരം ജില്ലയിലെ കുടിവെള്ള വിതരണം പൂര്‍വസ്ഥിതിയിലേക്ക് എത്തി . അരുവിക്കര ജലശുദ്ധീകരണ പ്ലാന്റിന്റെ ആദ്യ ഘട്ട നവീകരണമാണ് യുദ്ധകാലാടിസ്ഥാനത്തിൽ പൂര്‍ത്തിയായത് . ജനുവരി നാലിനാണ് രണ്ടാം ഘട്ട നവീകരണം

പരാതികളില്ലാതെയായിരുന്നു ആദ്യ ഘട്ട നവീകരണം. അരുവിക്കര ജലശുദ്ധീകരണ പ്ലാന്റിലെ പമ്പിംങ്ങ് സെറ്റുകള്‍ വേര്‍പ്പെടുത്തി പുതുക്കുന്ന ജോലികള്‍ ആണ് ഇപ്പോൾ പൂര്‍ത്തിയായിരിക്കുന്നത് . പ്രതീക്ഷിച്ചതിലും ഒരു മണിക്കൂര്‍ നേരത്തെയാണ് രണ്ട് പ്ലാന്റുകളിലേയും ജോലികള്‍ തീര്‍ത്ത് പമ്പിംങ്ങ് തുടങ്ങിയത്.

താഴ്ന്ന പ്രദേശങ്ങളിൽ വെള്ളമെത്തി തുടങ്ങി. ഇന്ന് രാത്രിയോടെ കൂടുതൽ സ്ഥലങ്ങളിൽ വെള്ളമെത്തും. നാളെ രാത്രിയോടെ കുടിവെള്ളവിതരണം പൂർവ്വ സ്ഥിതിയിലാകും എന്ന് അധികൃതർ അറിയിച്ചു

രണ്ടാം ഘട്ട നവീകരണം നടക്കുന്ന ജനുവരി നാലിന് പതിനാറ് മണിക്കൂർ നേരത്തേക്ക് പ്ലാന്റുകളുടെ പ്രവർത്തനം നിർത്തിവെക്കും .തുടർന്ന് ജനുവരി പതിനൊന്നിന് മൂന്നാം ഘട്ടവും ഫെബ്രുവരി രണ്ടിന് നാലാം ഘട്ടവും പൂർത്തിയാക്കുമെന്ന് വാട്ടർ അതോറിറ്റി ചീഫ് എഞ്ചിനീയർ പറഞ്ഞു. ...

തിരുവനന്തപുരം കോർപ്പറേഷൻ പരിധിയിലെ 57 വാർഡുകളിൽ ഇന്നലെ ഉച്ചമുതൽ ജലവിതരണം മുടങ്ങിയിരുന്നു .. ഓരോ വാർഡിലും മൂന്ന് വീതം ടാങ്കറുകൾ വഴി കുടിവെള്ളമെത്തിച്ചിരുന്നു. അവശ്യ കാര്യങ്ങൾക്കായി കൺട്രോൾ റൂം ഒരുക്കി നഗരസഭയും വാട്ടർ അതോറിറ്റിയും കുടിവെള്ള പ്രശ്നം പരാതികളില്ലാതെ പരിഹരിച്ചു ..അടുത്ത രണ്ടു ഘട്ടങ്ങളിലും ഇതേ തയ്യാറെടുപ്പുകളോടെ നഗരത്തിന്റെ വിവിധ ഭാഗങ്ങളിൽ വെള്ളമെത്തിക്കും എന്ന് ജല അതോറിറ്റി അധികൃതർ വ്യക്തമാക്കി