തന്റെ നിലപാടുകള്‍ കൊണ്ട് ശ്രദ്ധേയനായ വ്യക്തിയാണ് ഡി.ജി.പി. ജേക്കബ് തോമസ്. സംസ്ഥാന സര്‍ക്കാറിന്റെ അവഗണയില്‍ മനം മടുത്ത് സ്വയം വിരമിക്കാന്‍ പോലും ജേക്കബ് തോമസ് ഒരുങ്ങിയിരുന്നു. മുമ്പ് നല്‍കിയ അപേക്ഷയുടെ അടിസ്ഥാനത്തിലാണ് സ്വയം വിരമിക്കാന്‍ അനുമതി നല്‍കണമെന്ന അവശ്യപ്പെട്ട് അദ്ദേഹം വീണ്ടും സര്‍ക്കാരിനെ സമീപിച്ചത്. സംസ്ഥാനത്തെ ഐപിഎസ് ഉദ്യോഗസ്ഥരില്‍ ഏറ്റവും സീനിയറായ ജേക്കബ് തോമസിന് ഒരു വര്‍ഷത്തിലേറെ സേവന കാലാവധി ഇനിയും ബാക്കിയുണ്ട്. എന്നാല്‍ രാജി കാര്യത്തില്‍ അന്തിമ തീരുമാനം എടുത്തില്ല.

അതേസമയം പത്തുമാസമായി സര്‍ക്കാരില്‍നിന്ന് ഒരുരൂപ പോലും പ്രതിഫലം കിട്ടാതെ വലയുകയാണ് ജേക്കബ് തോമസ്. അഡ്മിനിസ്‌ട്രേറ്റീവ് ട്രിബ്യൂണലിന്റെ ഉത്തരവിനെത്തുടര്‍ന്ന് ജോലിയില്‍ തിരികെ പ്രവേശിച്ചപ്പോള്‍ ഷൊര്‍ണൂര്‍ മെറ്റല്‍ ഇന്‍ഡസ്ട്രീസ് എം.ഡിയാക്കി ഒതുക്കിയ ജേക്കബ് തോമസിന് ജനുവരിക്കുശേഷം അലവന്‍സോ ശമ്പളമോ നല്‍കിയിട്ടില്ല. തുല്യപദവിയായി കാണിച്ചാണ് നിയമിച്ചതെങ്കിലും ഔദ്യോഗിക വാഹനമോ ഡ്രൈവറോ ഗണ്‍മാനോ പോയിട്ട് ഒരു മൊബൈല്‍ ഫോണ്‍ കണക്ഷന്‍ പോലുമില്ല. ചുമതലയേറ്റ ഉടനെ ജേക്കബ് തോമസ് മാധ്യമങ്ങളോട് പങ്കുവെച്ച ചില അഭിപ്രായ പ്രകടനം വന്‍ വിവാദമായിരുന്നു. നൂറ്റിയൊന്നു വെട്ടിയാലും വായ്ത്തല പോകാത്ത വാക്കത്തി ഉണ്ടാക്കാമെന്നായിരുന്നു എന്ന ജേക്കബ് തോമസിന്റെ പരാമര്‍ശം കേരളം ഏറെ ചര്‍ച്ച ചെയ്തിരുന്നു.

ജനുവരി 31നാണ് അവസാനം അലവന്‍സ് ലഭിച്ചതെന്ന് ജേക്കബ് തോമസ്പറയുന്നത്. ഒന്നും തരാതെ തന്നെ കെട്ടിയിട്ടിരിക്കയാണ്. പുറത്തിറങ്ങിയാല്‍ തെങ്ങുകയറിയോ വണ്ടിയോടിച്ചോ ജീവിക്കാമായിരുന്നു. കൂലിനല്‍കാതെ പണിയെടുപ്പിക്കുന്നതിനെ അടിമത്തം എന്നാണ് പറയുക. ഭരണഘടനയില്‍ അടിമത്തം ഇല്ലെന്നാണ് പറയുന്നത്. അപ്പോള്‍ എന്റെ അവസ്ഥയ്ക്ക് കാരണക്കാരായവര്‍ ഭരണഘടനാ ലംഘനംനടത്തുന്നില്ലേ? ജേക്കബ് തോമസ് ചോദിച്ചു. ശമ്പളക്കാര്യം കാണിച്ച് ചീഫ് സെക്രട്ടറിക്ക് കത്ത് നല്‍കിയിട്ടുണ്ട്.

ഭരണഘടനയില്‍ സ്വാതന്ത്ര്യം സമത്വം സാഹോദര്യം പറയുന്നു. കേരളത്തിലെ മറ്റ് മൂന്ന് ഡി.ജി.പി.മാര്‍ക്ക് നികുതി ദായകരുടെ പണംകൊണ്ട് എത്ര വണ്ടിയും എത്ര ഡ്രൈവര്‍മാരും എത്ര പോലീസുകാരെയുമാണ് കൊടുത്തിട്ടുള്ളതെന്നു നോക്കണം. ഏറ്റവും സീനിയറായിട്ടും തനിക്ക് അതൊന്നുമില്ല. ഡി.ജി.പിമാര്‍ തുല്യരാവേണ്ടേ? സമത്വം വേണ്ടേ?

20 വര്‍ഷമായി മെറ്റല്‍ ഇന്‍ഡസ്ട്രീസ് നഷ്ടത്തിലാണ്. ജീവനക്കാര്‍ക്ക് ശമ്പളം നല്‍കാന്‍ കഴിഞ്ഞ വര്‍ഷം ഒരു കോടിയും അതിന് മുമ്പ് ഒന്നരക്കോടിയും സര്‍ക്കാര്‍ അനുവദിച്ചിരുന്നു. ഈ സാമ്പത്തിക വര്‍ഷം 50 ലക്ഷമാണ് പ്രഖ്യാപിച്ചത്, അത് ഇതുവരെയും ലഭിച്ചിട്ടില്ല. പി.എഫ്, ഇ.എസ്.ഐ. കുടിശികയുണ്ട്. ജീവനക്കാരുടെ റിക്കവറി അടച്ചിട്ടില്ല. കഴിഞ്ഞ തവണ ബോണസ് നല്‍കാനെടുത്ത എട്ടുലക്ഷം രൂപ ബാങ്കില്‍ തിരിച്ചടയ്ക്കണം.

നിലവിലെ സാഹചര്യത്തില്‍ തന്റെ ശമ്പളം എടുത്താല്‍ ഇവിടത്തെ സാധാരണ തൊഴിലാളികള്‍ക്ക് വീട്ടില്‍ കൊണ്ടു പോകാനുള്ള ശമ്പളം ഉണ്ടാവില്ല. ഇവിടത്തെ തൊഴിലാളികള്‍ക്ക് ശമ്പളം നല്‍കലാണ് പ്രധാനം. ഇപ്പോള്‍ ചെയ്യുന്നത് ജീവകാരുണ്യ പ്രവര്‍ത്തനമാണ്. കേരളത്തിലെ സാധാരണ മനുഷ്യര്‍ക്കും സ്ഥാപനത്തിലെ 40 തൊഴിലാളികള്‍ക്കും വേണ്ടി ജേക്കബ് തോമസ് പറഞ്ഞു.