മകന്റെ വിവാഹം ആഡംബരമാക്കാൻ ഡിജെ പാർട്ടി നടത്തിയ സിപിഎം നേതാവിന് ഇത്തരത്തിലൊരു സസ്പെൻഷൻ കിട്ടിയത് സിപിഎം കഞ്ഞിക്കുഴി ഏരിയ കമ്മിറ്റി അംഗം സി.വി.മനോഹരനെയാണ് ആറു മാസത്തേക്കു പാർട്ടിയിൽ നിന്നു സസ്പെൻഡ് ചെയ്തത്. ഇന്നലെ ചേർന്ന ഏരിയ കമ്മിറ്റി യോഗത്തിലാണു തീരുമാനമായത്. ചേർത്തല അരീപ്പറമ്പിൽ 13 ന് നടന്ന വിവാഹ സൽക്കാരത്തിലാണ് ഡിജെ പാർട്ടി ഒരുക്കിയത്.

ഡിജെ പാർട്ടിക്കിടയിൽ വാക്കേറ്റവും തമ്മിലടിയും ഉണ്ടായതായി ആരോപണമുണ്ട്. വിവാഹ സൽക്കാരത്തിലെ ധൂർത്ത് സമൂഹത്തിനു തെറ്റായ സന്ദേശം നൽകുമെന്നും സിപിഎമ്മിന്റെ പ്രഖ്യാപിത നയത്തിനെതിരായാണ് വിവാഹ സൽക്കാരം ആഡംബരപൂർവം നടത്തിയതെന്നും വിലയിരുത്തിയാണ് അച്ചടക്ക നടപടി. വിവാഹ സൽക്കാരം മകനാണ് നടത്തിയതെന്ന വിശദീകരണമാണ് മനോഹരൻ നൽകിയത്. ഇതു പാർട്ടി അംഗീകരിച്ചില്ല.