സകലതും പോകുമോ? വളര്ത്തി വലുതാക്കിയ ശേഷം പുറത്താക്കാന് നോക്കിയാല് തിരിച്ചടിക്കാതെ വിടുമോ? കേന്ദ്രത്തിന്റെ സുരക്ഷാ സേനയ്ക്കൊപ്പം നിന്ന് കേന്ദ്രത്തെ തള്ളിപ്പറയുന്ന വെള്ളാപ്പള്ളിയ്ക്ക് സുഭാഷ് വാസു വക സൂപ്പര് പണി; വെള്ളാപ്പള്ളിമാരുടെ അഭിമനമായ വെള്ളാപ്പള്ളി നടേശന് എന്ജിനീയറിങ് കോളേജും യൂണിയന്റെ ആശുപത്രിയും കൈവിട്ടു
ബിജെപിയും ബിജെഡിഎസും തമ്മിലുള്ള പോരിന് പിന്നാലെ എസ്എന്ഡിപി ജനറല് സെക്രട്ടറി വെള്ളാപ്പള്ളി നടേശനും യൂണിയന് പ്രസിഡന്റ് സുഭാഷ് വാസുവും തമ്മിലുള്ള പോര് ശക്തമാകുകയാണ്. ഇത് വെള്ളാപ്പള്ളി കാലങ്ങളായി കൊണ്ട് നടക്കുന്ന സാമ്രാജത്യത്തിന് മങ്ങലേല്പ്പിക്കുന്നുവെന്നാണ് സൂചന. ഇതിന്റെ അലയൊലിയായി എസ്.എന്.ഡി.പി. പല യൂണിയനുകളിലും ഭിന്നത രൂക്ഷമാണ്. ഏറ്റവും അവസാനം മാവേലിക്കര യൂനിയനിലും ഭിന്നത മറനീക്കി പുറത്തുവരികയാണ്. യോഗ നേതൃത്വവുമായി അകന്ന സുഭാഷ് വാസുവിനെതിരേ ആരോപണവര്ഷവുമായി ഒരു വിഭാഗം ഭാരവാഹികള് രംഗത്തെത്തിയിട്ടുണ്ട്.
വെള്ളാപ്പള്ളിയുടെ കോട്ടകള് ഒന്നൊന്നായി വാസു പിടിച്ചെടുത്തെന്ന ആക്ഷേപമാണ് എതിരാളികള് ഉയര്ത്തുന്നത്. യോഗത്തിന്റെ പേരില് കട്ടച്ചിറയില് ആരംഭിച്ച വെള്ളാപ്പള്ളി നടേശന് എന്ജിനീയറിങ് കോളജ് സ്വകാര്യ ട്രസ്റ്റ് രൂപീകരിച്ച് കൈപ്പിടിയിലാക്കിയ സുഭാഷ് വാസു ആ സ്ഥാപനം വിറ്റെന്നാണ് ആക്ഷേപം. മാത്രമല്ല ചാരുംമൂട്ടില് യൂണിയന്റെ 50 സെന്റിലുള്ള ആശുപത്രി പ്രസിഡന്റ് അതീവ രഹസ്യമായി പണയംവച്ചെന്നും യൂണിയന് ഭാരവാഹികള് വ്യക്തമാക്കുന്നു.
മൈക്രോ ഫിനാന്സില് ഉള്പ്പെടെ നടന്ന ലക്ഷങ്ങളുടെ തിരിമറിയുടെ പേരില് മാവേലിക്കര യൂണിയന് പ്രസിഡന്റും സ്പൈസസ് ബോര്ഡ് ചെയര്മാനും ബി.ഡി.ജെ.എസ്. സംസ്ഥാന ജനറല് സെക്രട്ടറിയുമായ സുഭാഷ് വാസു പ്രതിക്കൂട്ടിലായതോടെയാണ് യൂണിയന് തലപ്പത്തെ പ്രമുഖര് ജനറല് സെക്രട്ടറി വെള്ളാപ്പള്ളി നടേശനു പിന്തുണയുമായി രംഗത്തെത്തിയത്. മാവേലിക്കര യൂണിയന് വൈസ് പ്രസിഡന്റും ബി.ഡി.ജെ.എസ്. ആലപ്പുഴ ജില്ലാ പ്രസിഡന്റുമായ ഷാജി എം. പണിക്കര്, യോഗം ഇന്സ്പെക്ടര് അനില്രാജ്, യോഗം കൗണ്സിലര്മാരായ മൊട്ടയ്ക്കല് സോമന്, വിനു ധര്മരാജ്, സുധാ വിജയക്കുട്ടന് തുടങ്ങിയവരാണ് സുഭാഷ് വാസുവിനെതിരേ വിമര്ശനം ഉന്നയിച്ചത്.
യൂണിയന് സമിതികളില് സുഭാഷ് വാസു ഏകാധിപതിക്കു സമാനമായാണു പ്രവര്ത്തിക്കുന്നതെന്നാണ് ഇവരുടെ ആക്ഷേപം. മൈക്രോ ഫിനാന്സ് പദ്ധതിയില് 70 ലക്ഷം രൂപയുടെ ക്രമക്കേടാണ് മാവേലിക്കരയില് നടത്തിയത്. തുക വകമാറ്റിയതായി ആഭ്യന്തര ഓഡിറ്റിങ്ങിലും കണ്ടെത്തിയിരുന്നു. സുഭാഷ് വാസു അഭിപ്രായ സ്വാതന്ത്ര്യത്തിനു വിലകല്പ്പിച്ചിരുന്നില്ലെന്നും തുക വിനിയോഗം തന്നിഷ്ടപ്രകാരമാണു നടത്തുന്നതെന്നും യൂണിയന് വൈസ് പ്രസിഡന്റ് ഉള്പ്പെടെയുള്ളവര് ആരോപിച്ചു.
കട്ടച്ചിറയിലെ വെള്ളാപ്പള്ളി നടേശന് എന്ജിനീയറിങ് കോളജ് വിറ്റതായും ഇവര് പറഞ്ഞു. പേരുമാറ്റം അടക്കം നടന്നുകഴിഞ്ഞു. മൈക്രോഫിനാന്സ് പദ്ധതിയിന് കീഴില് മാവേലിക്കര യൂണിയനു പ്രാഥമിക ഘട്ടത്തില് അനുവദിച്ച 20 ലക്ഷം രൂപയെടുത്താണു കോളജ് ആരംഭിച്ചത്. പിന്നീട് സ്വകാര്യ ട്രസ്റ്റ് ഉണ്ടാക്കി സുഭാഷ് വാസു കോളജ് കൈപ്പിടിയിലാക്കി. കോളജില് വിദ്യാര്ഥികളും രക്ഷിതാക്കളുമായുണ്ടായ എല്ലാ പ്രശ്നങ്ങള്ക്കും കാരണം സുഭാഷ് വാസുവിന്റെ ഇടപെടലായിരുന്നു. ഇത് സി.പി.എമ്മുമായുള്ള പരസ്യ ഏറ്റുമുട്ടലായി വളര്ന്നു. ബാങ്ക് വായ്പകള് തിരിച്ചടയ്ക്കാതെ കോളജ് ജപ്തി ഭീഷണിയിലായതിനു പിന്നാലെയാണു വില്പ്പനയെന്നും ഭാരവാഹികള് പറഞ്ഞു.
അധികാരസ്ഥാനങ്ങള് കൈക്കലാക്കിയശേഷം വെള്ളാപ്പള്ളിക്കെതിരേ സുഭാഷ് വാസു പരസ്യവിമര്ശനം നടത്തിയതോടെയാണ് ഒരു വിഭാഗം യൂണിയന് ഭാരവാഹികള് രംഗത്തെത്തിയത്. ആവശ്യമെങ്കില് യൂണിയന് ഭാരവാഹിത്വത്തില്നിന്ന് രാജിവയ്ക്കാനൊരുങ്ങുകയാണ് ഇവര്. എന്തായാലും ബിജെപിയുമായുണ്ടായ ഏറ്റുമുട്ടലിന് ശേഷമാണ് ഇതൊക്കെ ഉണ്ടായതെന്നാണ് വെള്ളാപ്പള്ളിയും മകന് തുഷാര് വെള്ളാപ്പള്ളിയും കരുതുന്നത്. അതിനാല് തന്നെ അമിത്ഷായോട് സഹായമഭ്യര്ത്ഥിച്ചാലോ എന്നും ചിന്തിക്കുന്നുണ്ട്.
https://www.facebook.com/Malayalivartha
