ഏറ്റെടുക്കാനാളില്ല... പൗരത്വ ബില്ലിനെതിരെ തീവ്ര സംഘടനകള് സംഘടിപ്പിക്കുന്ന ഹര്ത്താലിനെ പിന്തുണയ്ക്കാതെ രാഷ്ട്രീയപാര്ട്ടികള്; അതിന് പിന്നാലെ ഹര്ത്താലിന് അമനുമതി നല്കിയിട്ടില്ലെന്ന് ജില്ലാ പോലീസ് മേധാവികളും; അനുമതിയില്ലാതെ ഹര്ത്താല് നടത്തി ജനങ്ങളെ ബുദ്ധിമുട്ടിച്ചാല് നേതാക്കളെല്ലാം അഴിയെണ്ണും
കുറേ നാളുകള്ക്ക് ശേഷം കേരളം മറ്റൊരു ഹര്ത്താല് പിടിയിലാണ്. അപ്പോഴും ആര്ക്കും ഉറപ്പിച്ച് പറയാനാകുന്നില്ല നാളത്തെ ഹര്ത്താലില് പ്രശ്നമുണ്ടാകുമോയെന്ന്. വാഹനങ്ങള് ഓടുമോ കടകള് തുറക്കുമോയെന്ന കാര്യത്തില് ഇപ്പോഴും ആശങ്കയുണ്ട്. പ്രധാന രാഷ്ട്രീയ പാര്ട്ടികളും മുസ്ലീം സംഘടനകളും ഹര്ത്താലിനെ തള്ളിക്കളഞ്ഞിട്ടുണ്ട്. അതേ സമയം ഹര്ത്താല് പ്രഖ്യാപിച്ചതല്ലാതെ ആരും ഹര്ത്താലിന് നോട്ടീസ് പോലും നല്കിയിട്ടില്ലെന്നാണ് പോലീസ് ഉദ്യോഗസ്ഥരും പറയുന്നത്.
കേന്ദ്ര സര്ക്കാരിന്റെ ദേശീയ പൗരത്വ ബില്ലിനെതിരെ ചില സംഘടനകള് ചൊവ്വാഴ്ച പ്രഖ്യാപിച്ച ഹര്ത്താലിനെതിരെ പൊലീസ് രംഗത്തെത്തിയിട്ടുണ്ട്. ഈ ഹര്ത്താല് നിയമവിരുദ്ധമെന്നാണ് പോലീസിന്റെ നിലപാട്. സമൂഹമാധ്യമങ്ങള് വഴി സംയുക്ത ഹര്ത്താല് നടത്തും എന്ന വാര്ത്ത പ്രചരിച്ചിരുന്നുവെങ്കിലും ഇത് സംബന്ധിച്ച് നോട്ടീസ് ഒന്നും ലഭിച്ചില്ലെന്ന് പോലീസ് പറയുന്നു. 14 ജില്ലകളിലേയും പോലീസ് മേധാവികളാണ് വാര്ത്താക്കുറിപ്പ് പുറത്തിറക്കിയിരിക്കുന്നത്.
ഹൈക്കോടതി ഉത്തരവ് അനുസരിച്ച് ഹര്ത്താല് നടത്താനുദ്ദേശിക്കുന്ന സംഘടന ഏഴ് ദിവസം മുന്പ് നോട്ടീസ് തരണമെന്നാണ് നിയമം. അത്തരത്തില് ഒരു സംഘടനയും നാളെ നടക്കാനിരിക്കുന്ന ഹര്ത്താലിനെ കുറിച്ച് നോട്ടീസ് നല്കിയിട്ടില്ലെന്ന് പൊലീസ് അറിയിച്ചു.
അതിനാല് നിയമവിരുദ്ധവുമായി ഹര്ത്താല് നടത്തിയാല് കര്ശന നടപടിയെടുക്കുമെന്നാണ് പൊലീസ് മുന്നറിയിപ്പ് നല്കുന്നത്. എസ്ഡിപിഐ, ബിഎസ്പി, എസ്ഐഒ എന്നീ സംഘടനകളാണ് ഹര്ത്താലിന് ആഹ്വാനം ചെയ്തത്. എന്നാല് പ്രമുഖ മുസ്ലീം സംഘടനകളെല്ലാം ഹര്ത്താലിന് പിന്തുണ നല്കില്ലെന്ന് അറിയിച്ചിട്ടുണ്ട്. കേരളാ വ്യാപാരി വ്യവസായി അസോസിയേഷനും ഹര്ത്താലുമായി സഹകരിക്കില്ലെന്ന് വ്യക്തമാക്കിയിട്ടുണ്ട്. അതേസമയം ഹര്ത്താലിന് ആഹ്വാനം ചെയ്ത സംഘടനകള് ഇതുവരെ പ്രതികരണവുമായി രംഗത്തെത്തിയിട്ടില്ല.
സിപിഎം ഉള്പ്പടെയുള്ള പാര്ട്ടികള് ഹര്ത്താലിനെതിരെ രംഗത്തെത്തിയിരുന്നു. അതിവിശാലമായ ജനകീയ പ്രസ്ഥാനം കെട്ടിപ്പടുക്കുന്ന ഈ സാഹചര്യത്തില് ചില സംഘടനകള് മാത്രം പ്രത്യേകമായി ഹര്ത്താലിന് ആഹ്വാനം ചെയ്തത് ജനകീയ യോജിപ്പിന് സഹായിക്കുന്ന ഒന്നല്ലെന്ന് സിപിഎം പ്രസ്താവനയില് വ്യക്തമാക്കി. ചില സംഘടനകള് പ്രത്യേകമായി ഹര്ത്താല് നടത്തുന്നതിനെ അനുകൂലിക്കാനാവില്ലെന്നും പ്രസ്താവനയില് പറയുന്നു.
ഭരണ പ്രതിപക്ഷ വ്യത്യാസമില്ലാതെയാണ് പൗരത്വ നിയമ ഭേദഗതിക്കെതിരായ വലിയ പ്രക്ഷോഭത്തില് അണിനിരക്കുന്നത്. ഇതിനിടയില് സംഘടനകള് ചേരിതിരിഞ്ഞ് ഹര്ത്താല് നടത്തുന്നത് ബിജെപിയുടെ കെണിയില് വീഴുന്നതിന് തുല്യമാണ്. ഇത് ജനങ്ങള്ക്കിടയില് മതപരമായ ഭിന്നിപ്പിന് ഇടയാക്കുമെന്നും അതിനാല് ജനങ്ങളുടെ യോജിപ്പ് ആഗ്രഹിക്കുന്നവര് ഹര്ത്താലില് നിന്ന് വിട്ടുനില്ക്കണമെന്നും സിപിഎം ആവശ്യപ്പെട്ടു.
ഹര്ത്താലിനെ പിന്തുണക്കില്ലെന്ന് എ.പി, ഇ.കെ സുന്നി വിഭാഗങ്ങള് അടക്കമുള്ള പ്രധാന മുസ്ലിം സംഘടനകള് വ്യക്തമാക്കിയിട്ടുണ്ട്. ലീഗ് പരസ്യമായി നിലപാട് വ്യക്തമാക്കിയിട്ടില്ലെങ്കിലും ഹര്ത്താലുമായി ബന്ധമില്ലെന്നു യൂത്ത് ലീഗ് നേരത്തേ അറിയിച്ചിരുന്നു. തീവ്ര നിലപാടുകാരുമായി യോജിച്ച് ഹര്ത്താല് വേണ്ടെന്നാണു തീരുമാനമെന്ന് കാന്തപുരം എ.പി അബൂബക്കര് മുസ്ലിയാര് വ്യക്തമാക്കി. ആദ്യം ഹര്ത്താലിനോട് അനുകൂല നിലപാട് സ്വീകരിച്ച ഇ.കെ സുന്നി വിഭാഗത്തിനും ഇപ്പോള് യോജിച്ചുള്ള ഹര്ത്താലിനെ മാത്രമേ അനുകൂലിക്കൂ എന്ന സമീപനമാണുള്ളത്. മുജാഹിദ് വിഭാഗവും ഹര്ത്താലിനെ പിന്തുണക്കുന്നില്ല. ഹര്ത്താലുമായി ബന്ധപ്പെട്ട പ്രചാരണപ്രവര്ത്തനങ്ങളിലോ ഹര്ത്താല് നടത്തുന്നതിനോ യൂത്ത് ലീഗ് പങ്കാളിയാകരുതെന്ന് സംസ്ഥാന പ്രസിഡന്റ് പാണക്കാട് മുനവ്വറലി ശിഹാബ് തങ്ങള് നിര്ദേശം നല്കിയിട്ടുണ്ട്. ഹര്ത്താല് ജനങ്ങളെ ബുദ്ധിമുട്ടിക്കാനേ ഉപകരിക്കൂ എന്ന നിലപാടിലാണ് ഐ.എന്.എല്. പോലീസും രാഷ്ട്രീയ പാര്ട്ടികളും ഒരുപോലെ ഹര്ത്താലിനെ എതിര്ക്കുമ്പോള് നാളെ ഹര്ത്താല് ഉണ്ടാകുമോ ഇല്ലയോ എന്ന് കാത്തിരുന്ന് കാണാം.
"
https://www.facebook.com/Malayalivartha