കഞ്ചാവ് സംഘം പത്രപ്രവര്‍ത്തകനെ കുത്തി പരിക്കേല്‍പ്പിച്ചു
കഞ്ചാവ് സംഘം മാധ്യമപ്രവര്‍ത്തകനെ കുത്തിപ്പരിക്കേല്‍പ്പിച്ചു. ആലപ്പുഴ കായംകുളം കൃഷ്ണപുരത്താണ് സംഭവം. ഡെക്കാണ്‍ ക്രോണിക്കിള്‍ ആലപ്പുഴ ലേഖകന്‍ സുധീഷിനാണ് (35) കുത്തേറ്റത്. ഇയാള്‍ ആലപ്പുഴ മെഡിക്കല്‍ കോളജില്‍ ചികിത്സയിലാണ്. ആക്രമണത്തിനിടെ സാരമായി പരിക്കേറ്റ സഹോദരന്‍ സുനീഷിനെ (38) കായംകുളം ഗവ. ആശുപത്രിയിലും പ്രവേശിപ്പിച്ചു. ആക്രമണസമയത്ത് സുധീഷിന്റെ മാതാപിതാക്കളായ താമരാക്ഷന്‍, മണി, കുട്ടികള്‍ എന്നിവര്‍ വീട്ടിലുണ്ടായിരുന്നു. ഇന്നലെ രാത്രിയായിരുന്നു നാടിനെ നടുക്കിയ സംഭവം നടന്നത്.
നാട്ടുകാരായ ചന്ദ്രന്‍, മക്കളായ അക്ഷയ്, അഭിതാബ് എന്നിവരാണ് സംഭവത്തിന് പിന്നിലെന്ന് പൊലീസ് പറഞ്ഞു. ഇവരുടെ മയക്കുമരുന്നു കച്ചവടത്തിനെതിരെ പ്രതികരിച്ചതാണ് ആക്രമണത്തിന് കാരണം. ആക്രമണത്തെ കേരള പത്രപ്രവര്‍ത്തക യൂണിയന്‍ ജില്ലാ കമ്മിറ്റി അപലപിച്ചു. കുറ്റവാളികളെ ഉടന്‍ അറസ്റ്റ് ചെയ്യണമെന്ന് യൂണിയന്‍ ഭാരവാഹികള്‍ പൊലീസിനോട് ആവശ്യപ്പെട്ടു. പ്രദേശത്ത് ചന്ദ്രനും മക്കളും അടങ്ങുന്ന സംഘം കഞ്ചാവ് വില്‍ക്കുകയും അത് നാട്ടുകാരുടെ സൈ്വര്യവിഹാരത്തിന് തടസ്സമാവുകയും ചെയ്യാന്‍ തുടങ്ങിയിട്ട് നാളേറെയായി. തുടര്‍ന്നാണ് സുധീഷ് ഇവര്‍ക്കെതിരെ പ്രതികരിച്ചത്.
ഡെക്കാണ്‍ ക്രോണിക്കിള്‍ ദിനപ്പത്രത്തിന്റെ ആലപ്പുഴ ലേഖകന്‍ സുധീഷിനെ ഒരു സംഘം വീട്ടില്‍ക്കയറി ആക്രമിച്ച് പരിക്കേല്‍പ്പിച്ച സംഭവം അന്വേഷിച്ച് കര്‍ശന നടപടി സ്വീകരിക്കാന്‍ സംസ്ഥാന പോലീസ് മേധാവി ലോക്‌നാഥ് ബെഹ്‌റ ആലപ്പുഴ ജില്ലാ പോലീസ് മേധാവിക്ക് നിര്‍ദ്ദേശം നല്‍കി. ആശുപത്രിയില്‍ കഴിയുന്ന സുധീഷിനെ ഒരു മുതിര്‍ന്ന പോലീസ് ഉദ്യോഗസ്ഥന്‍ നേരില്‍ കണ്ട് വിവരങ്ങള്‍ അന്വേഷിക്കും. ഇത്തരം അക്രമങ്ങള്‍ ആവര്‍ത്തിക്കാതിരിക്കാന്‍ അടിയന്തിര നടപടി സ്വീകരിക്കുമെന്നും സംസ്ഥാന പോലീസ് മേധാവി അറിയിച്ചു.
https://www.facebook.com/Malayalivartha
