കൂവിയും ട്രോളിറക്കിയും മാമാങ്കത്തെ തോൽപ്പിക്കുന്നത് മോഹൻലാൽ ആരാധകരാണെന്ന സംശയത്തിൽ മാമാങ്കത്തിന്റെ അണിയറ പ്രവർത്തകർ. മാമാങ്കത്തിനെതിരെ നെഗറ്റീവ് പ്രചരണം നടത്തുന്നത് മോഹൻലാൽ ആരാധകരാണെന്ന് താൻ പറയുന്നില്ലെന്ന സംവിധായകന്റെ പ്രസ്താവന മോഹൻലാൽ ആരാധകരിലേക്കാണ് വിരൽചൂണ്ടുന്നത്.

മലയാളത്തിലെ ഏറ്റവും വില കൂടിയ ചിത്രത്തെ കുറിച്ച് പറയാൻ സംവിധായകൻ എം. പത്മകുമാർ തിരുവനന്തപുരത്ത് വിളിച്ചു ചേർത്ത പത്ര സമ്മേളനമാണ് വെളുക്കാൻ തേച്ചത് പാണ്ടായി മാറിയത്. തകർക്കാൻ ശ്രമിക്കുന്നവർ മോഹൻലാലിന്റെ ആരാധകരാണോ എന്ന ചോദ്യത്തിനാണ് പത്മകുമാർ 'ഫാൾട്ടായ' ഉത്തരം നൽകിയത്.

ഒടിയൻ എന്ന ചിത്രത്തിന്റെ പിന്നിൽ പ്രവർത്തിച്ചത് പത്മകുമാറാണ്. എന്നാൽ ഒടിയൻ സാമ്പത്തികമായും കലാപരമായും പരാജയപ്പെട്ടതോടെ പത്മകുമാർ ഒടിയനെ തള്ളി പറഞ്ഞു. താനല്ല ശ്രീകുമാറാണ് ചിത്രം ചെയ്തതെന്നായിരുന്നു പത്മകുമാറിന്റെ പ്രസ്താവന. ഒടിയന്റെ ഭൂരിഭാഗം രംഗങ്ങളും പൂർത്തിയാക്കിയത് പത്മകുമാറാണ്. ശ്രീകുമാർ മേനോനെ മൂലയിരുത്തി പത്മകുമാറിനെ കൊണ്ട് ഒടിയൻ ചെയ്യിച്ചു എന്നാണ് അണിയറയിൽ കേട്ട വർത്തമാനം. ഒടിയന്റെ സമയത്താണ് പത്മകുമാറിന്റെ ജോസഫ് പുറത്തിറങ്ങിയത്. അക്കാലത്ത് ശ്രീകുമാർ മേനോനോട് ഇക്കാര്യം മാധ്യമ പ്രവർത്തകർ ചോദിച്ചു. ജോസഫ് അതിമനോഹരമായി സംവിധാനം ചെയ്തയാൾ എന്തു കൊണ്ട് ഒടിയൻ മോശമാക്കി എന്ന് പത്മകുമാറിനോട് ചോദിക്കണമെന്നാണ് ശ്രീകുമാർ മേനോൻ മറുപടി പറഞ്ഞത്. ഇതിനർത്ഥം ഒടിയൻ സംവിധാനം ചെയ്തത് പത്മകുമാർ ആണെന്നാണ്. ആന്റണി പെരുമ്പാവൂരും ശ്രീകുമാറും തമ്മിലുള്ള അസ്വാരസ്യം കാരണമാണ് പത്മകുമാർ ഒടിയൻ ചെയ്യാനെത്തിയതെന്നും ഒരു വർത്തമാനം അക്കാലത്തുണ്ടായിരുന്നു.

മാമാങ്കം സജീവ് പിള്ളയുടെ സിനിമയായിരുന്നു. വൈകിയാണ് പത്മകുമാർ മാമാങ്കത്തിനെത്തിയത്. സജീവിന്റെ ശാപം പത്മകുമാറിനെ പിന്തുടരുന്നുണ്ട്. ഇപ്പോൾ ഒടിയന് അനുകൂലമായി രംഗത്ത് എത്തുന്നവർ അന്ന് ഒടിയനെ തീരെ ചെയ്തത് എന്താണെന്ന് അറിയാമെന്നാണ് മോഹൻലാൽ ആരാധകർ പറയുന്നത്. അതായത് മാമാങ്കത്തെ തോൽപ്പിക്കുന്നു എന്ന് കുറ്റം പറയുന്നവർ തന്നെയാണ് ഒടിയനെ തോൽപ്പിച്ചതെന്ന് ചുരുക്കം.

മോഹൻലാൽ ആരാധകരാണ് മാമാങ്കത്തിനെതിരെയുള്ള ട്രോളുകൾക്ക് പിന്നിലെന്ന തരത്തിലാണ് മമ്മൂട്ടി ഫാൻസ് നീങ്ങുന്നത്. അതേ സമയം ചിത്രം പരാജയപ്പെട്ടെങ്കിൽ അതിന് കാരണം അണിയറപ്രവർത്തകരുടെ പിടിപ്പുകേടാണെന്ന് ചിത്രം കണ്ടവർ പറയുന്നു. സജീവ് പിള്ള ചിത്രീകരിച്ച രംഗങ്ങളൊന്നും താൻ സ്വീകരിച്ചിട്ടില്ലെന്ന് പത്മകുമാർ പറഞ്ഞു. എന്നാൽ മമ്മൂട്ടിയുടെ സ്ത്രീ വേഷം ചിത്രീകരിച്ചത് സജീവ് പിള്ളയാണെന്ന് സജീവ് ഫാൻസ് പറയുന്നു.

മാമാങ്കത്തിന്റെ കാര്യം അത്ര അനുകൂലമല്ല. സാമ്പത്തികമായി ചിത്രത്തിന്റെ അവസ്ഥ അത്ര മെച്ചപ്പെട്ടതല്ല. നെഗറ്റീവ് ട്രോളുകൾ വഴി മാമാങ്കത്തെ തകർക്കാൻ കഴിയില്ലെന്ന് പത്മകുമാർ ആവർത്തിക്കുന്നത് വെറുതെയല്ല. കൊടുത്താൽ കൊല്ലത്തും കിട്ടും എന്നാണ് മോഹൻലാലിന്റെ ഫാൻസ് മമ്മൂട്ടിയുടെ മാമാങ്കത്തെ കുറിച്ച് പറയുന്നത്.