'ഫുഡ് ഫോർ ഫ്രീഡ'ത്തിന് പിന്നാലെ 'ഫ്രീഡം ലുക്‌സു'മായി ജയിൽ അധികൃതർ. ജയിൽ ചപ്പാത്തിയും ചിക്കനും ജനങ്ങൾ ഏറ്റെടുത്തതിനു പിന്നാലെയാണ് പുതിയ പദ്ധതിയുമായി ജയിൽ വകുപ്പ് എത്തുന്നത്. ഫ്രീഡം ലുക്സ് എന്ന് പേരിട്ടിരിക്കുന്ന ബ്യൂട്ടി പാർലർ ജനങ്ങൾക്കായി ഉടൻ തുറന്നു പ്രവർത്തിക്കും. സര്‍ക്കാര്‍ അംഗീകൃത ബ്യൂട്ടീഷ്യന്‍ കോഴ്സ് പാസായിട്ടുള്ള ആറ് അന്തേവാസികളുടെ മേല്‍നോട്ടത്തിലാണ് ഫ്രീഡം ലുക്സ് പ്രവര്‍ത്തിക്കുക. പാലിയേറ്റീവ് കെയര്‍ ഉള്‍പ്പെടെയുള്ള സൗകര്യങ്ങൾ ബ്യൂട്ടി പാർലറിലുണ്ട്.

ശിക്ഷ കാലാവധി കഴിഞ്ഞ് പുറത്തിറങ്ങുന്ന തടവുകാരെ തൊഴിൽ ചെയ്തു ജീവിക്കാൻ പ്രാപ്തരാക്കുകയാണ് പദ്ധതിയുടെ മുഖ്യ ലക്‌ഷ്യം. ജയിൽവകുപ്പിന്റെ കീഴിൽ പുരുഷൻമാർക്കയാണ് തുടക്കത്തിൽ ബ്യൂട്ടി പ്രലർ സേവനങ്ങൾ ലഭ്യമാകുക. ബ്യൂട്ടി പാർലറിന്‍റെ ഉദ്ഘാടനം ഡിജിപി ഋഷിരാജ് സിംഗും ആര്‍ ശ്രീലേഖ ഐപിഎസും ചേര്‍ന്ന് നിർവഹിച്ചു. ആദ്യഘട്ടത്തിൽ സേവനം പുരുഷന്മാർക്ക് മാത്രമാണെങ്കിലും വൈകാതെ ലേഡീസ് ബ്യൂട്ടി പാർലറും തുറക്കുമെന്ന് ആർ ശ്രീലേഖ ഐപിഎസ് പറഞ്ഞു.

വിവിധ തരം ഫേഷ്യലുകൾ, ഹെയർ ഡ്രസ്സിങ്, ഫേഷ്യൽ മസ്സാജിങ്, ഷേവിങ്, ഹെന്ന, ഹെയർ ഹെയർ കളറിങ് എന്നിവ ശീതീകരിച്ച റൂമിൽ വളരെ മിതമായ നിരക്കിൽ ചെയ്ത് നൽകും.ഷേവിങ്, നഖം വെട്ടല്‍, മുടിമുറിക്കല്‍ എന്നിവ സ്വന്തമായി ചെയ്യാന്‍ കഴിയാത്ത വൃദ്ധജനങ്ങള്‍ക്കും ഇവടെ സേവനങ്ങൾ ലഭ്യമാകും. ജയിൽ ചപ്പാത്തിക്കും ചിക്കനും ആവശ്യക്കാർ ഏറിയതോടെയാണ് ഇത്തരമൊരു ആശയത്തിന് അധികൃതർ രൂപം നൽകിയത്. പൂജപ്പുര കരമന റോഡിൽ പരീക്ഷ ഭവനോട് ചേർന്നാണ് ഫ്രീഡം ലുക്ക്സ് പാർലർ പ്രവർത്തിക്കുന്നത്. രാവിലെ എട്ട് മുതൽ വൈകിട്ട് എട്ട് മണിവരെയാണ് പ്രവർത്തന സമയം.