പൊലീസ് സേനയിലെ എല്ലാ പരീക്ഷകള്ക്കും ഇനി മുതല് നിരീക്ഷണ ക്യാമറകള് സ്ഥാപിക്കുവാന് തീരുമാനം
പൊലീസ് സേനയിലെ എല്ലാ പരീക്ഷകള്ക്കും ഇനി മുതല് നിരീക്ഷണ ക്യാമറകള് സ്ഥാപിക്കുവാന് തീരുമാനം. ഇത് സംബന്ധിച്ച് സംസ്ഥാന പൊലീസ് മേധാവി ഉത്തരവിറക്കി. പിഎസ്സി പരീക്ഷാ വിവാദങ്ങളുടെയും, സര്വകലാശാല പരീക്ഷാ ക്രമക്കേടുകളുടെയും പശ്ചാത്തലത്തിലാണ് നടപടി. ജനറല് ഹെഡ്കോണ്സ്റ്റബിള് പരീക്ഷ, ഹവീല്ദാര് സ്ഥാനക്കയറ്റ പരീക്ഷ, നിര്ബന്ധിത പരീക്ഷകള് തുടങ്ങി പൊലീസ് സേനയ്ക്കുള്ളിലെ പരീക്ഷകള്ക്ക് നിരീക്ഷണ ക്യാമറകള് നിര്ബന്ധമാക്കാനാണ് തീരുമാനം.
പൊലീസ് വകുപ്പ് പരീക്ഷകളുടെ ചോദ്യങ്ങളുണ്ടാക്കുന്നതും, പരീക്ഷ നടത്തുന്നതും , മാര്ക്ക് നിര്ണ്ണയിക്കുന്നതും സേനയിലെ തന്നെ ഉദ്യോഗസ്ഥനാണ്. പോലീസ് പരീക്ഷാ നടത്തിപ്പിലും ക്രമക്കേടുകളുണ്ടെന്നുള്ള ആരോപണങ്ങളുടെ അടിസ്ഥാനത്തില് ക്രൈംബ്രാഞ്ച് മേധാവി ടോമിന്.ജെ.തച്ചങ്കരി ഡി.ജി.പിക്ക് ശുപാര്ശ നല്കിയിരുന്നു. പരീക്ഷാ ഹാളില് നിരീക്ഷണ ക്യാമറകള് സ്ഥാപിച്ച് ക്രമക്കേടുകള് തടയണമെന്നും, പരീക്ഷാ ലിസ്റ്റിന്റെ കാലാവധി തീരും വരെ ക്യാമറയുടെ ഹാര്ഡ് ഡിസ്ക് സൂക്ഷിക്കണമെന്നുമായിരുന്നു ക്രൈംബ്രാഞ്ച് മേധാവി ശുപാര്ശ നല്കിയത്. ഇതിന്റെ അടിസ്ഥാനത്തിലാണ് നിരീക്ഷണ ക്യാമറകള് നിര്ബന്ധമാക്കി ഡി.ജി.പി ഉത്തരവിറക്കിയത്.
തിരുവനന്തപുരം പോലീസ് ട്രെയിനിങ് കോളേജിലും, തൃശ്ശൂര് പോലീസ് അക്കാദമിയിലും സ്ഥിരം ക്യാമറകള് സ്ഥാപിക്കും. മറ്റ് പരീക്ഷാ കേന്ദ്രങ്ങളില് താത്കാലിക ക്യാമറകള് സ്ഥാപിക്കാനാണ് തീരുമാനം. പോലീസിന്റെ ശാരീരിക ക്ഷമതാ പരീക്ഷകളും, ക്രൈംബ്രാഞ്ച് യോഗ്യത പ്രവേശന പരീക്ഷയും മാത്രമാണ് നിലവില് ക്യാമറാ നിരീക്ഷണത്തില് നടത്തുന്നത്.
https://www.facebook.com/Malayalivartha
