പൗരത്വ  ഭേദഗതി നിയമത്തിനും പൗരത്വ  രജിസ്റ്ററിനും എതിരെ എസ്.ഡി.പി.ഐയും മറ്റ് ചില സംഘടനകളും നടത്തുന്ന ഹര്‍ത്താല്‍ അക്രമത്തിലേക്ക്... നീങ്ങുന്നതിന്റെ സൂചനകള്‍ ആറ് മണിക്കൂര്‍ പിന്നിടുമ്പോള്‍ ലഭിക്കുന്നു. സമാധാനപരമായി ഹര്‍ത്താല്‍ നടത്തുമെന്ന് നേതാക്കള്‍ ഇന്നലെ വാര്‍ത്താസമ്മേളനത്തില്‍ ആവര്‍ത്തിച്ചെങ്കിലും അനുകൂലികള്‍ അത് മുഖവിലയ്ക്ക് എടുത്തില്ലെന്നാണ് പലയിടങ്ങളിലും നടന്ന സംഭവങ്ങള്‍ വ്യക്തമാക്കുന്നത്. ആലപ്പുഴ മണ്ണഞ്ചേരിയില്‍ ഹര്‍ത്താല്‍ അനുകൂലികള്‍ കെഎസ്ആര്‍ടിസി ബസ് തടഞ്ഞ് നിര്‍ത്തിയ താക്കോല്‍ ഊരിക്കൊണ്ടു പോയി. തൊടുപുഴയ്ക്ക് പോകേണ്ട സൂപ്പര്‍ ഫാസ്റ്റ് ബസിന്റെ താക്കോലാണ് ഹര്‍ത്താല്‍ അനുകൂലികള്‍ ഊരിക്കൊണ്ട് പോയത്. വിവിധയിടങ്ങളില്‍ ഹര്‍ത്താല്‍ അനുകൂലികള്‍ കെഎസ്ആര്‍ടിസി ബസുകള്‍ തടയുകയും ബസുകള്‍ക്ക് നേരെ കല്ലെറിയുകയും ചെയ്തു.

അക്രമസംഭവങ്ങളില്‍പ്പെട്ട 233 പേരെ അറസ്റ്റ് ചെയ്തതായി പൊലീസ് അറിയിച്ചു. എറണാകുളത്ത് 55 ഉം തൃശൂര്‍ 51ഉം ഇടുക്കി 35ഉം പാലക്കാട് 21ഉം കണ്ണൂര്‍ 13 ഉം കോട്ടയം 12 ഉം വയനാട് എട്ട് പേരെയും അറസ്റ്റ് ചെയ്തു. കടകള്‍ അടപ്പിക്കാനും വാഹനങ്ങള്‍ തടയാനും ശ്രമിച്ച രണ്ടു പേരെ കോഴിക്കോട് പോലീസ് കസ്റ്റഡിയിലെടുത്തു. തിരുവനന്തപുരം മൂന്നാര്‍ റൂട്ടില്‍ സര്‍വീസ് നടത്തിയ മിന്നല്‍ ബസിനു നേരെ കല്ലെറിഞ്ഞു. മട്ടന്നൂരിലും ആലപ്പുഴയിലും ഹര്‍ത്താല്‍ അനുകൂലികള്‍ ബസ് തടഞ്ഞു. നിര്‍ബന്ധിപ്പിച്ച് കട അടപ്പിക്കാന്‍ ശ്രമിച്ച രണ്ട് പേരെ പാലക്കാട്ട് അറസ്റ്റ് ചെയ്തു. ശബരിമല തീര്‍ഥാടനം കണക്കിലെടുത്ത് പത്തനംതിട്ട റാന്നി താലൂക്കിനെ ഹര്‍ത്താലില്‍ നിന്ന് ഒഴിവാക്കിയിട്ടുണ്ട്. ഉപതെരഞ്ഞെടുപ്പു നടക്കുന്ന തദ്ദേശവാര്‍ഡുകളെയും ഒഴിവാക്കി. പാല്‍, പത്രം, ആശുപത്രി തുടങ്ങിയ അവശ്യസേവനങ്ങളെയും പൊതുപരീക്ഷകളെയും ഒഴിവാക്കിയിട്ടുണ്ട്. രാവിലെ ആറു മുതല്‍ വൈകുന്നേരം ആറുവരെയാണ് ഹര്‍ത്താല്‍. ആദ്യ മണിക്കൂറുകള്‍ സമാധാനപരമായിരുന്നെങ്കിലും ഉച്ചയോടെയാണ് ഒറ്റപ്പെട്ട അക്രമസംഭവങ്ങള്‍ ഉണ്ടായത്.

പൊതുസമൂഹത്തിന്റെ പിന്തുണ ഹര്‍ത്താലിന് ഇല്ലാതാവുകയും ജനജീവിതം സ്തംഭിക്കാതിരിക്കുകയും ചെയ്തതോടെ ഹര്‍ത്താല്‍ പരാജയമാണെന്ന തോന്നല്‍ അനുകൂലികള്‍ക്കുണ്ടായി. അതാണ് ഒറ്റപ്പെട്ട അക്രമങ്ങള്‍ക്ക് തുന്നിഞ്ഞതെന്ന് അറിയുന്നു. പ്രക്ഷോഭങ്ങളുടെ ഭാഗമായി സംയുക്ത സമിതി ആഹ്വാനം ചെയ്ത ഹര്‍ത്താല്‍ ഹൈക്കോടതി നിര്‍ദേശത്തിനു വിരുദ്ധമായാണെന്നും പിന്‍വലിക്കണമെന്നും നേരത്തെ സംസ്ഥാന പോലീസ് മേധാവി ആവശ്യപ്പെട്ടിരുന്നു. ഹര്‍ത്താല്‍ അനുകൂലികള്‍ അതിന് വഴങ്ങാതിരുന്നതോടെ യാതൊരു വിധ അക്രമങ്ങളും അനുവദിക്കില്ലെന്ന് പോലീസ് വ്യക്തമാക്കിയിരുന്നു. ഭൂരിപക്ഷം മുസ്്‌ലിം സംഘടനകളും മുസ്്‌ലിംലീഗും ഹര്‍ത്താലിന് പിന്തുണ നല്‍കാത്തതോടെയാണ് അനുകൂലികള്‍ വെട്ടിലായത്.

കഴിഞ്ഞ ജനുവരി ഏഴിന് ഹൈക്കോടതി പുറപ്പെടുവിച്ച ഉത്തരവനുസരിച്ച് ഹര്‍ത്താല്‍ നടത്തുന്നതിന് ഏഴു ദിവസത്തെ നോട്ടീസ് ആവശ്യമാണ്. ഈ നിര്‍ദ്ദേശം പാലിച്ചിട്ടില്ലാത്ത സാഹചര്യത്തില്‍ ഹര്‍ത്താല്‍ ആഹ്വാനം നിയമവിധേയമല്ല. അതുകൊണ്ട് ഹര്‍ത്താല്‍ ദിവസം പൊതുസ്ഥലങ്ങളില്‍ കൂട്ടംകൂടി നില്‍ക്കാന്‍ പൊതുജനങ്ങളെ അനുവദിച്ചില്ല. സര്‍ക്കാര്‍ ഓഫീസുകള്‍, സ്ഥാപനങ്ങള്‍, കോടതികള്‍, കെ.എസ്.ഇ.ബി , കെ.എസ്.ആര്‍.ടി.സി മുതലായ സ്ഥാപനങ്ങള്‍, പൊതുഗതാഗത വാഹനങ്ങള്‍ എന്നിവയ്ക്ക് ആവശ്യമായ പോലീസ് സംരക്ഷണം നല്‍കുന്നുണ്ട്. ജുഡീഷ്യല്‍ ഓഫീസര്‍മാര്‍ക്കും പ്രോസിക്യൂട്ടര്‍മാര്‍ക്കും സഞ്ചരിക്കുന്നതിന് പോലീസ് സംരക്ഷണം നല്‍കുന്നുണ്ട്. സെക്രട്ടറിയേറ്റ് അടക്കമുള്ള സര്‍ക്കാര്‍ ഓഫീസുകളില്‍ മോശമല്ലാത്ത ഹാജര്‍നിലയുണ്ട്. ഇതൊക്കെ ഹര്‍ത്താല്‍ അനുകൂലികള്‍ക്ക് തിരിച്ചടിയായി.