പൗരത്വ നിയമ ഭേദഗതിയ്‌ക്കെതിരായി കൊച്ചിയില്‍ സിനിമാക്കാരില്‍ ഒരു വിഭാഗം സംഘടിപ്പിച്ച കൂട്ടായ്മ വഴിതെറ്റി കൂട്ട അടിയിലേക്ക് പോകുകയാണ്. അതില്‍ പങ്കെടുത്ത സിനിമാക്കാരും ബിജെപിക്കാരുമാണ് അടി ഏറ്റെടുത്തിരിക്കുന്നത്. ബിജെപി നേതാക്കളായ കുമ്മനം രാജശേഖരനും സന്ദീപ് വാര്യരുമാണ് സിനിമാക്കാര്‍ക്കെതിരെ ആഞ്ഞടിച്ചത്.

പൗരത്വ നിയമഭേദഗതിക്കെതിരായി കൊച്ചിയില്‍ നടന്ന ജാഥയില്‍ പങ്കെടുത്ത സിനിമാ പ്രവര്‍ത്തകര്‍ക്കെതിരെ യുവമോര്‍ച്ചാ നേതാവായ സന്ദീപ് വാര്യര്‍ കഴിഞ്ഞ ദിവസം രംഗത്ത് വന്നിരുന്നു. നാളെ നികുതി വെട്ടിപ്പ് കയ്യോടെ പിടിച്ചാല്‍ രാഷ്ട്രീയപരമായ പകപോക്കല്‍ എന്നു പറഞ്ഞ് കണ്ണീരൊഴുക്കരുത്. അന്നു നിങ്ങള്‍ക്കൊപ്പം ജാഥ നടത്താന്‍ കഞ്ചാവ് ടീംസ് ഒന്നുമുണ്ടാവില്ല എന്നായിരുന്നു സന്ദീപ് വാര്യര്‍ ഫേസ്ബുക്കില്‍ കുറിച്ചത്.

സന്ദീപ് വാര്യരുടെ ഭീഷണിക്ക് ചാണകത്തില്‍ ചവിട്ടില്ലെന്നാണ് റിമ കല്ലിങ്കലിന്റെ ഭര്‍ത്താവും സംവിധായകനുമായ ആഷിഖ് അബു പ്രതികരിച്ചത്. വിഡ്ഢികളെ പ്രശ്‌സ്തരാക്കുന്നത് നമുക്ക് നിര്‍ത്താം എന്നാണ് റിമ പ്രതികരിച്ചത്. ഫിലോമിനയുടെ ആരെടാ നാറി നീ എന്ന ചിത്രവും താരം ഫേസ്ബുക്കില്‍ പങ്കുവെച്ചിരുന്നു.

ഇതിനെതിരെ റിമയെ വ്യക്തിപരമായി ആക്രമിക്കുന്ന തരത്തിലുള്ള മറുപടിയാണ് സന്ദീപ് വാര്യര്‍ ഫേസ്ബുക്ക് പോസ്റ്റിലൂടെ നല്‍കുന്നത്. 'റിമേച്ചി കഞ്ചാവ് ബീഡി എടുക്കാന്‍ ഉണ്ടാകുമോ ഒരെണ്ണം? കഞ്ചാവ് കച്ചവടക്കാരെ സാംസ്‌കാരിക നായകരാക്കി മാറ്റുന്ന പരിപാടി നമുക്ക് അവസാനിപ്പിക്കാം' എന്നാണ് സന്ദീപ് ഫേസ്ബുക്ക് കുറിപ്പിലൂടെ പ്രതികരിച്ചത്.

ഈ പോസ്റ്റിന് പിന്നാലെ മോഹന്‍ലാലിന്റെ ലൂസിഫര്‍ എന്ന ചിത്രത്തിലെ നാര്‍ക്കോട്ടിക് ഈസ് എ ഡേര്‍ട്ടി ബിസിനസ് എന്ന ഡയലോഗും അദ്ദേഹം ഫേസ്ബുക്ക് പോസ്റ്റില്‍ പങ്കുവെച്ചിട്ടുണ്ട്. 'ലാലേട്ടന്‍ പണ്ടേ പറഞ്ഞിട്ടുണ്ട്. ചുമ്മാതാണോ പൊരിച്ച മത്തി ടീമിന് ലാലേട്ടനോട് കലിപ്പ്' എന്നാണ് ലാലേട്ടന്റെ ചിത്രം പങ്കുവച്ചുകൊണ്ട് സന്ദീപ് ഫേസ്ബുക്കില്‍ കുറിച്ചത്.

എന്തെല്ലാം അവഗണിക്കണം എന്ന അറിവ് കൂടിയാണ്, അറിവിന്റെ മനോഹാരിത എന്ന ചിത്രം പോസ്റ്റ് ചെയ്ത് ചാണകത്തില്‍ ചവിട്ടില്ലെന്ന് ആഷിഖ് അബു കഴിഞ്ഞ ദിവസം പറഞ്ഞിരുന്നു. സന്ദീപ് വാര്യര്‍ എന്നാണ് ആദായ നികുതി വകുപ് കമ്മീഷ്ണര്‍ ആയതെന്ന് തനിക്ക് അറിയില്ലെന്നും ജനങ്ങളുടെ ദേശസ്‌നേഹം അളക്കുന്ന യന്ത്രം ബിജെപിയുടെ കയ്യില്‍ ഉണ്ടോയെന്നുമായിരുന്നു സംവിധായകന്‍ കമലിന്റെ കഴിഞ്ഞ ദിവസത്തെ പ്രതികരണം.

പൗരത്വ ഭേദഗതി നിയമത്തിനതിരായ പ്രതിഷേധത്തെ പിന്തുണച്ചും പരസ്യമായി ഐക്യദാര്‍ഢ്യം പ്രഖ്യാപിച്ചും നിരവധി ചലചിത്ര പ്രവര്‍ത്തകരാണ് രംഗത്ത് വന്നിരിക്കുന്നത്. കൊച്ചിയിലെ ഒറ്റയ്ക്കല്ല ഒറ്റക്കെട്ട് എന്ന പേരില്‍ നടന്ന പരിപാടിയില്‍ റിമ കല്ലിങ്കല്‍, നിമിഷ സജയന്‍, ഗീതു മോഹന്‍ദാസ്, ഷെയ്ന്‍ നിഗം തുടങ്ങിയവര്‍ പങ്കെടുത്തിരുന്നു.

പൗരത്വ ഭേദഗതി നിയമത്തിനെതിരെ പ്രതിഷേധമറിയിച്ച് നടി നിമിഷ സജയന്‍ നടത്തിയ പ്രസ്താവനയും ഏറെ വിവാദമായിരുന്നു. സര്‍ക്കാരിനു ശ്രദ്ധിക്കാന്‍ വേറെ എത്രയോ കാര്യങ്ങളുണ്ട്. കേന്ദ്ര സര്‍ക്കാര്‍ പൗരത്വ ഭേദഗതി നിയമത്തിന് ഇത്ര ഗൗരവം നല്‍കുന്നത് എന്തിനാണെന്ന് മനസിലാകുന്നില്ല. പൗരത്വ ഭേദഗതി നിയമം തെറ്റായ തീരുമാനമാണ്. സര്‍ക്കാര്‍ ഇത് തിരുത്തണം. നിയമത്തെ കുറിച്ച് സര്‍ക്കാരിനുള്ളില്‍ തന്നെ വ്യക്തത കുറുവുണ്ടെന്നും എല്ലാവരും ഇതിനെതിരെ പ്രതിഷേധിക്കണമെന്നും നിമിഷ പറഞ്ഞു. വിഷയത്തെ കുറിച്ച് നന്നായി പഠിച്ചശേഷം തന്നെയാണ് പ്രതിഷേധിക്കാന്‍ എത്തിയതെന്നും ഇത്രയേറെ ആളുകളെ കാണുമ്പോള്‍ വലിയ സന്തോഷമുണ്ട്. തൃശൂര്‍ ഏടുക്കുമെന്ന് പറഞ്ഞിട്ട് കൊടുത്തില്ല പിന്നെയാണോ ഇന്ത്യയെന്ന നിമിഷയുടെ പ്രസ്താവന ഏറെ വിവാദമുണ്ടാക്കിയിരുന്നു. ഇതിനെതിരെ സുരേഷ് ഗോപിയുടെ ആരാധകരും രംഗത്തെത്തിയിരുന്നു.