ഇന്ത്യൻ ജനാധിപത്യത്തെ നോക്കുകുത്തിയാക്കി മാറ്റുന്ന രാഷ്ട്രീയ പക്ഷപാതത്തിന്റെ ഞെട്ടിക്കുന്ന വിവരങ്ങളാണ് മുൻ ചീഫ് സെക്രട്ടറി ജിജി തോംസന്റെ വെളിപ്പെടുത്തലിലൂടെ പുറത്തുവന്നിരിക്കുന്നതെന്ന് ഉന്നത വിദ്യാഭ്യാസ വകുപ്പ് മന്ത്രി റോജി എം. ജോൺ.

സർവീസിലിരിക്കെ ഒരു ഉദ്യോഗസ്ഥനെ ബിജെപി ടിക്കറ്റിൽ മത്സരിക്കാനും പിന്നീട് കേന്ദ്രമന്ത്രിയാകാനും പ്രേരിപ്പിക്കുന്ന തരത്തിൽ ഗ്യാനേഷ് കുമാർ സമീപിച്ചുവെന്ന ജിജി തോംസന്റെ വെളിപ്പെടുത്തൽ അതീവ ഗൗരവമുള്ളതാണ്.

രാജ്യത്തെ ഏറ്റവും പ്രധാനപ്പെട്ട ഭരണഘടനാ സ്ഥാപനങ്ങളിലൊന്നായ തിരഞ്ഞെടുപ്പ് കമ്മീഷന്റെ തലപ്പത്തിരിക്കുന്ന വ്യക്തിയെക്കുറിച്ചാണ് ഇത്തരം ഗുരുതരമായ ആരോപണം ഉയർന്നിരിക്കുന്നത്. ഇക്കാര്യത്തിൽ ഗ്യാനേഷ് കുമാർ രാജ്യത്തോട് വ്യക്തമായ വിശദീകരണം നൽകണമെന്നും മന്ത്രി പറഞ്ഞു.

തിരഞ്ഞെടുപ്പ് കമ്മീഷൻ ഏതെങ്കിലും രാഷ്ട്രീയ കക്ഷിയുടെ പോഷകസംഘടനയല്ല. അതിന്റെ പ്രതിബദ്ധത ഭരണഘടനയോടും രാജ്യത്തെ ജനങ്ങളോടും മാത്രമായിരിക്കണം. രാഷ്ട്രീയ നേതൃത്വത്തിന് മുന്നിൽ നട്ടെല്ല് വളയ്ക്കാതെ ഭരണഘടനാ മൂല്യങ്ങൾ ഉയർത്തിപ്പിടിച്ച് ഇന്ത്യൻ ജനാധിപത്യത്തിന്റെ പവിത്രത കാത്തുസൂക്ഷിച്ച ടി. എൻ. ശേഷനെ പോലുള്ള മഹാരഥന്മാരുടെ പാരമ്പര്യമുള്ള പദവിയാണിതെന്നും മന്ത്രി പറഞ്ഞു. .