“കേരളത്തിൽ ജനസംഖ്യാ കണക്കെടുപ്പു നടത്താൻ തയ്യാറല്ലെന്ന് പറയാൻ മുഖ്യമന്ത്രി എന്ന നിലയിൽ പിണറായിക്ക് എന്ത് അധികാരം? കണക്കെടുപ്പ് പൂർത്തിയാക്കുന്ന ആദ്യ സംസ്ഥാനം കേരളമാകും. സമരത്തിനു പിന്നിൽ തീവ്ര വാദ ശക്തികളും മതമൗലീകവാദികളുമാണ്. കേരളത്തിൽ ലീഗും സിപിഎമ്മും ഭാവിയിൽ സഖ്യമുണ്ടാകും. കോൺഗ്രസിന് ഇപ്പോഴും ഇക്കാര്യങ്ങൾ ബോധ്യപ്പെട്ടിട്ടില്ല.”- സുരേന്ദ്രൻ പറഞ്ഞു.

കൊച്ചിയിൽ സിനിമാ പ്രവർത്തകർ നടത്തിയ പ്രതിഷേധ റാലിക്കെതിരെയും സുരേന്ദ്രൻ രംഗത്തു വന്നു. ചില സിനിമാതാരങ്ങളും അർബൻ നക്സലുകളും മാധ്യമ പ്രവർത്തകരും കോൺഗ്രസും സിപിഐഎമ്മും ചേർന്നാണ് സമരം നടത്തുന്നതെന്ന് സുരേന്ദ്രൻ പറഞ്ഞു. സമരം ഭൂരിപക്ഷത്തിൻ്റേതല്ല. പൗരത്വ ഭേദഗതി നിയമത്തിന് എതിരായ സമരം തകർന്ന് പോകുമെന്നും സുരേന്ദ്രൻ പറഞ്ഞു.

കേന്ദ്രത്തിൽ നിന്ന് ആനുകൂല്യങ്ങളും കിട്ടാതെ വരുമ്പോൾ മുഖ്യമന്ത്രി പിണറായി വിജയൻ മറുപടി പറയേണ്ടി വരുമെന്നും സുരേന്ദ്രൻ മുന്നറിയിപ്പ് നൽകി. സെൻസസ് പോലും കേരളത്തിൽ എടുക്കില്ലെന്ന് മുഖ്യമന്ത്രി പറയുന്നു. സെൻസസ് ഇന്നും ഇന്നലെയും തുടങ്ങിയതല്ലെന്ന് മുഖ്യമന്ത്രി ഓർക്കണമെന്നും അദ്ദേഹം പറഞ്ഞു.
അതിനിടെ പൗരത്വ ഭേദഗതി നിയമത്തിൽ അഭിപ്രായമറിയിച്ച് ബോളിവുഡ് നടൻ സെയ്ഫ് അലി ഖാൻ. ഇത്തരം കാര്യങ്ങളിൽ പ്രതിഷേധിക്കാനും പ്രതിഷേധിക്കാതിരിക്കാനും എല്ലാവർക്കും അവകാശമുണ്ടെന്ന് അദ്ദേഹം പറഞ്ഞു. ഒരു ദേശീയ മാധ്യമത്തിനു നൽകിയ അഭിമുഖത്തിലാണ് സെയ്ഫ് അലി ഖാൻ അഭിപ്രായമറിയിച്ചത്.

“സമാധാനപരമായി പ്രതിഷേധിക്കാനും പ്രതിഷേധിക്കാതിരിക്കാനുമുള്ള അവകാശം എല്ലാവർക്കുമുണ്ട്. നമുക്ക് ഉത്കണ്ഠയുണ്ടാക്കുന്ന ചില കാര്യങ്ങളുണ്ട്. ഇവയൊക്കെ എങ്ങനെയാവും അവസാനിക്കുകയെന്ന ആശ്ചര്യമാണ് തോന്നുന്നത്. ഞാൻ എന്തിനെതിരെയാണ് പ്രതിഷേധിക്കുന്നതെന്ന കൃത്യമായ ബോധം എനിക്കുണ്ടാവുകയും എൻ്റെ പ്രതിഷേധം അതിനോട് ചേർന്നു നിൽക്കുന്നതാവുകയും വേണമെന്ന് ഞാൻ ആഗ്രഹിക്കുന്നു. ചിലപ്പോൾ വ്യത്യസ്തമായ മറ്റൊരു പ്രതിഷേധത്തെയാണ് ഞാൻ പ്രതിനിധീകരിക്കുന്നതെന്ന തിരിച്ചറിവ് അവസാനത്തിൽ എനിക്കുണ്ടായേക്കാം. അതുകൊണ്ട് എനിക്കിതിൽ വലിയ ഉറപ്പില്ല. ഞാൻ എന്തിനെതിരെയാണ് പ്രതിഷേധിക്കുന്നതെന്ന് ഉറപ്പില്ലാത്തതു കൊണ്ട് എനിക്ക് ഇനിയും ചിന്തിക്കേണ്ടതുണ്ട്”- അദ്ദേഹം പറഞ്ഞു.