ഹിന്ദുക്കളെ ഭീഷണിപ്പെടുത്തുന്നവർ പാകിസ്ഥാനിലേക്ക് പോകേണ്ടി വരും; പൗരത്വഭേദഗതി നിയമത്തിനെതിരെ പ്രതിഷേധിക്കുന്നവർക്കെതിരെ രൂക്ഷ വിമർശനവുമായി ബിജെപി നേതാവ് ബി ഗോപാലകൃഷ്ണൻ
പൗരത്വഭേദഗതി നിയമത്തിനെതിരെ പ്രതിഷേധിക്കുന്നവർക്കെതിരെ രൂക്ഷ വിമർശനവുമായി ബിജെപി നേതാവ് ബി ഗോപാലകൃഷ്ണൻ. ഹിന്ദുക്കളെ ഭീഷണിപ്പെടുത്തുന്നവർ പാകിസ്ഥാനിലേക്ക് പോകേണ്ടി വരും എന്നതടക്കമുള്ള പരാമര്ശങ്ങളുമായാണ് ബി ഗോപാലകൃഷ്ണൻ രംഗത്തെത്തിയിരിക്കുന്നത്. ലീഗ് നേതാക്കൾ മതഭീകരവാദികളെ കയറൂരി വിടുകയാണ്. കേരളത്തിൽ കാര്യങ്ങൾ കൈവിട്ട് പോയാൽ ഉത്തരവാദി മുഖ്യമന്ത്രി പിണറായി വിജയനായിരിക്കുമെന്നും ബി ഗോപാലകൃഷ്ണൻ കോട്ടയത്ത് പറഞ്ഞു.
സെൻസസ് എടുക്കാൻ വരുമ്പോൾ കളവ് പറയാൻ ആഹ്വാനം ചെയ്ത അരുദ്ധതി റോയിയെ രാഷ്ട്രീയ മന്ഥര എന്ന് വിളിക്കണം. ദേശീയ ജനസംഖ്യാ രജിസ്റ്ററിനുള്ള നടപടികളുമായി സഹകരിക്കില്ലെന്ന പിണറായി വിജയന്റെ നിലപാടിനോടും രൂക്ഷമായ ഭാഷയിലാണ് ബി ഗോപാലകൃഷ്ണൻ പ്രതികരിച്ചത്. പിണറായിയെകൊണ്ട് എൻപിആര് ബിജെപി നടപ്പാക്കും. ഇല്ലെങ്കിൽ റേഷൻ കിട്ടില്ല. പിണറായിയേയും ചെന്നിത്തലയേയും ഡിറ്റൻഷൻ സെൻറുകളിലാക്കണമെന്നും ഗോപാലകൃഷ്ണൻ പറഞ്ഞു.
പൗരത്വ ബില്ലിനെതിരെ സമരം നടത്തിയ സിനിമാക്കാർക്ക് നേതൃത്വം നൽകിയത് കമൽ എന്ന വർഗീയവാദിയാണെന്നും ബി ഗോപാലകൃഷ്ണൻ കോട്ടയത്ത് പറഞ്ഞു. മോദി കൊടുക്കുന്ന പണം കൊണ്ടാണ് ചലച്ചിത്ര അക്കാദമി പ്രവര്ത്തിക്കുന്നത്. അത് ഓര്മ്മ വേണം. സിനിമാക്കാരുടെ സമരത്തില് മാന്യന്മാരാരും പങ്കെടുത്തില്ലെന്നും ബിജെപി നേതാവ് പറഞ്ഞു.
കേരളത്തിലെത്തിയ കര്ണാടക മുഖ്യമന്ത്രി യദ്യൂരപ്പയെ കരിങ്കൊടി കാണിച്ച സംഭവത്തിൽ പിണറായി വിജയൻ ഗൂഢാലോചന നടത്തി. വാഹനം നിർത്തിക്കൊടുത്ത ഡ്രൈവറുടെ പങ്ക് അന്വേഷിക്കണമെന്നും ബി ഗോപാലകൃഷ്ണൻ ആവശ്യപ്പെട്ടു.
ആള്ക്കൂട്ടക്കൊലപാതകങ്ങള്ക്കെതിരെ പ്രധാനമന്ത്രിക്ക് കത്തെഴുതിയ സംവിധായകൻ അടൂര് ഗോപാലകൃഷ്ണനെ മുൻപും ബി ഗോപാലകൃഷ്ണൻ അധിക്ഷേപിച്ച് രംഗത്തെത്തിയിരുന്നു. ജയ് ശ്രീറാം വിളി സഹിക്കുന്നില്ലെങ്കില് അടൂര് അന്യഗ്രഹങ്ങളിലേക്ക് പോകണമെന്നായിരുന്നു ബി.ഗോപാലകൃഷ്ണന്റെ പോസ്റ്റ്.
ഇത് രാമയണമാസമാണെന്നും ഇന്ത്യയിലും അയല് രാജ്യങ്ങളിലും ജയ് ശ്രീറാം വിളി എന്നും ഉയരുമെന്നും ഇതു കേള്ക്കാന് പറ്റില്ലെങ്കില് ശ്രീഹരിക്കോട്ടയില് നിന്നും റോക്കറ്റിലേറി ബഹിരാകാശത്തേക്ക് പോകാമെന്നുമാണ് ഗോപാലകൃഷ്ണന് ഫേസ്ബുക്ക് പോസ്റ്റില് പറഞ്ഞത്. ഇത് തന്നെ മാധ്യമങ്ങൾക്ക് നൽകിയ അഭിമുഖത്തിൽ ആവർത്തിക്കുകയും ചെയ്തു. വേണ്ടിവന്നാല് അടൂരിന്റെ വീടിനുമുന്നിലെത്തി 'ജയ് ശ്രീറാം' വിളിക്കുമെന്നും ഭീഷണി മുഴക്കിയിരുന്നു. ഇത് വലിയ വിവാദമായി മാറി. തുടർന്ന് ബി.ഗോപാലകൃഷ്ണനെ തള്ളി ബി.ജെ.പി നേതൃത്വം മുന്നോട്ട് വന്നിരുന്നു.
https://www.facebook.com/Malayalivartha
