സി.പി.എം- ഡി.വൈ.എഫ്.ഐ നേതാക്കളില്‍ ചിലര്‍ക്കും ബ്‌ളേഡ് പലിശയ്ക്ക് പണം നല്‍കുന്നുണ്ടെന്നും മണല്‍ മാഫിയയുമായി ചിലര്‍ക്ക് ബന്ധമുണ്ടെന്നും നിരവധി ആരോപണം ഉയര്‍ന്നിട്ടുണ്ട്. അത് ശരിവയ്ക്കുന്ന കാര്യമാണ് എറണാകുളം പെരുമ്പാവൂരില്‍ നടന്നത്. പെരുമ്പാവൂര്‍ ഏര്യാ സെക്രട്ടറി പി.എം സലീമിന്റെ ഭീഷണിയെ തുടര്‍ന്ന് ഇയാളില്‍ നിന്ന് പണം പലിശയ്ക്ക് വാങ്ങിയ മധ്യവയസ്‌ക്കന്‍ ആത്മഹത്യയ്ക്ക് ശ്രമിച്ചതോടെയാണ് കാര്യങ്ങള്‍ കുഴഞ്ഞ് മറിഞ്ഞത്. പെരുമ്പാവൂര്‍ തണ്ടേക്കാട് മുല്ലപ്പിള്ളി വീട്ടില്‍ അബ്ദുല്‍ ബഷീര്‍ ( 54) ആണ് സലീമിന്റെയും സംഘത്തിന്റെയും ഭീക്ഷണി സഹിക്കാനാകാതെ ആത്മഹത്യയ്ക്ക് ശ്രമിച്ചത്. നവംബര്‍ അഞ്ചിനായിരുന്നു സംഭവം. വിഷം കഴിച്ചാണ് ആത്മഹത്യയ്ക്ക് ശ്രമിച്ചത്. തുടര്‍ന്ന് ആലുവ രാജഗിരി ആശുപത്രിയില്‍ പ്രവേശിപ്പിച്ചിരുന്നു.

സലീമിന്റെയും സംഘത്തിന്റെയും നിരന്തരഭീഷണി സഹാക്കാന്‍ വയ്യാതെയാണ് ജീവനൊടുക്കുന്നതെന്ന് ആത്മഹത്യാകുറിപ്പില്‍ അബ്ദുല്‍ ബഷീര്‍ പറഞ്ഞിരുന്നു. ഈ കത്ത് വീട്ടുകാര്‍ക്ക് ലഭിച്ചതോടെയാണ് സംഭവം വിവാദമായത്. സലീമിന്റെ കയ്യില്‍ നിന്ന് ബഷീര്‍ പത്ത് ലക്ഷം രൂപ പലിശയ്ക്ക് വാങ്ങിയിരുന്നു. മാസം 25,000 രൂപ പലിശ നല്‍കിയിരുന്നു. നാല് വര്‍ഷം കൊണ്ട് 12 ലക്ഷം രൂപ ഈ ഇനത്തില്‍ മാത്രം നല്‍കിയെന്ന് ആത്മഹത്യാകുറിപ്പില്‍ പറയുന്നു. സലീമിന്റെയും സംഘത്തിന്റെയും നിരന്തരഭീഷണിയെ തുടര്‍ന്ന് ബഷീറിന്റെ അടുത്ത ബന്ധുവും സി.പി.എം മൂവാറ്റുപുഴ പുന്നാമറ്റം ബ്രാഞ്ച് സെക്രട്ടറിയുമായ അഷ്്‌റഫ് പെരുമ്പാവൂര്‍ സി.ഐയ്ക്ക് പരാതി നല്‍കിയിരുന്നു. എന്നാല്‍ ജില്ലയിലെ ഉന്നത സി.പി.എം നേതാക്കളുടെ ഇടപെടലിനെ തുടര്‍ന്ന് പരാതി ഒതുക്കി.

എന്നാല്‍ പരാതി നല്‍കിയത് അറിഞ്ഞ സലീം ബഷീറിന്റെ അനുജന്‍ അല്‍അമീനെ പാര്‍ട്ടി ഓഫീസിലേക്ക് വിളിപ്പിച്ച് ഭീഷണിപ്പെടുത്തിയെന്ന് ബന്ധുക്കള്‍ ആരോപിച്ചു. ' നിന്റെയൊക്കെ പരാതി കേള്‍ക്കാനല്ല ഞങ്ങള് പോലീസിനെ വെച്ചിരിക്കുന്നത്, ഞങ്ങള്‍ പറയുന്നത് ചെയ്യാനാണ്. പരാതിയുമായി മുന്നോട്ട് പോയാല്‍ നീയെല്ലാം അനുഭവിക്കും' എന്ന് ഭീഷണിപ്പെടുത്തിയതായി അല്‍അമീന്‍ പറയുന്നു. പാര്‍ട്ടിക്കാരായിരുന്നിട്ടും ഇത്തരത്തിലുള്ള സമീപനം ഏര്യാസെക്രട്ടറിയുടെയും മറ്റ് നേതാക്കളുടെയും ഭാഗത്ത് നിന്ന് ഉണ്ടായതില്‍ കടുത്ത അതൃപ്തിയിലാണ് ബഷീറിന്റെ കുടുംബം. പൊലീസില്‍ പരാതിപ്പെട്ടിട്ടും കാര്യമില്ല, പാര്‍ട്ടിയില്‍ നിന്ന് നീതിയും ലഭിക്കില്ലെന്ന അവസ്ഥയിലാണ്. ജില്ലാ നേതൃത്വത്തിന്റെ ശ്രദ്ധയില്‍ ഇക്കാര്യം കൊണ്ടുവരാനുള്ള നീക്കം ഇവര്‍ നടത്തുന്നുണ്ട്.

പെരുമ്പാവൂര്‍, മൂവാറ്റുപുഴ എന്നിവിടങ്ങളിലെ ചില പ്രാദേശി സി.പി.എം നേതാക്കള്‍ കൊള്ളപ്പലിശയ്ക്ക് പണം നല്‍കുകയും ഭീഷണിപ്പെടുത്തിയും ഗുണ്ടകളെയും പൊലീസിനെയും മറ്റും ഉപയോഗിച്ച് ഭീഷണിപ്പെടുത്തി പലിശ വാങ്ങുകയും ചെയ്യുന്നതായി വ്യാപക പരാതിയുണ്ട്. പലരും ഭയന്ന് പൊലീസില്‍ പരാതി നല്‍കാറില്ല. ഇവിടങ്ങളിലെ ക്വാറി മാറിയയെ നിയന്ത്രിക്കുന്നതും നേതാക്കന്‍മാരാണെന്ന് ആക്ഷേപമുണ്ട്. പൊലിന്റെ സഹകരണത്തോടെയാണ് നേതാക്കള്‍ ഇത്തരത്തില്‍ തേര്‍വാഴ്ച നടത്തുന്നതെന്നും നാട്ടുകാരില്‍ പലരും ആരോപിക്കുന്നു. പൊലീസ് ശക്തമായ നടപടി സ്വീകരിച്ചാല്‍ ഇവര്‍ ഒതുങ്ങുമെന്നും നാട്ടുകാര്‍ പറയുന്നു.