കേന്ദ്രം ഭരിക്കുന്ന ബിജെപി സർക്കാരിനെതിരെ ഇടത്- വലതു പക്ഷങ്ങൾ മത്സരിച്ച് നടത്തിയ ദേശീയ പണിമുക്ക് വിജയിപ്പിക്കാൻ ഇടതു പാർട്ടികൾ നടത്തിയത് തറവേലകൾ എന്ന് ആക്ഷേപം. നൊബേൽ സമ്മാന ജേതാവ് മൈക്കിൾ ലെവിറ്റ് സഞ്ചരിച്ച ഹൗസ് ബോട്ട് വേമ്പനാട്ട് കായലിൽ ഒന്നര മണിക്കൂറോളം തടഞ്ഞിട്ട സംഭവം അതിലൊന്ന് മാത്രമാണ്. സംഭവം അങ്ങേയറ്റം അപലപനീയമെന്ന് ടൂറിസം വകുപ്പ് മന്ത്രി കടകംപള്ളി സുരേന്ദ്രന്‍ പറഞ്ഞെങ്കിലും ജനങ്ങൾ അനുഭവിച്ച ബുദ്ധിമുട്ടുകൾക്ക് അത് പകരമാവില്ലല്ലോ. മന്ത്രി കടകംപള്ളിയാകട്ടെ ഒരു ഇരു ചക്ര വാഹനത്തിൽ സഞ്ചരിച്ച് തന്റെ ജോലികൾ മുടക്കം കൂടാതെ നടത്തി.

സംസ്ഥാന സർക്കാരിന്റെ അതിഥിയായി കേരള സര്‍വകലാശാലയില്‍ നടക്കുന്ന പ്രഭാഷണ പരമ്പരയില്‍ പങ്കെടുക്കാന്‍ കേരളത്തിലെത്തിയതായിരുന്നു നൊബേൽ ജേതാവ്. വിനോദസഞ്ചാര മേഖലയെ ഹർത്താലിൽ നിന്നും പണിമുടക്കുകളിൽ നിന്നും ഒഴിവാക്കാൻ മുഖ്യമന്ത്രിയുടെ നേതൃത്വത്തിൽ മുൻപ് വിളിച്ചു ചേർത്ത സർവകക്ഷി യോഗത്തിൽ ധാരണയായതാണ്. ടൂറിസം സീസണ്‍ ആയതിനാല്‍ വിദേശ-ആഭ്യന്തര വിനോദസഞ്ചാരികള്‍ക്കും ബുദ്ധിമുട്ട് സൃഷ്ടിക്കുമെന്നതും ഇതിനകം തന്നെ ബുക്കിംഗ് നടന്ന ഹോട്ടലുകളെയും ഹൗസ് ബോട്ടുകളെയും ബാധിക്കുമെന്നതും ഉള്‍പ്പടെ കണക്കിലെടുത്ത് സംസ്ഥാനത്തെ വിനോദസഞ്ചാര മേഖലയെ പണിമുടക്കില്‍ നിന്നും ഒഴിവാക്കിയതുമാണെന്നും മന്ത്രി പറഞ്ഞു.

അതിന് വിരുദ്ധമായി പ്രവർത്തിച്ചത് ആരായാലും സാമൂഹ്യവിരുദ്ധർ എന്ന് മാത്രമേ വിശേഷിപ്പിക്കുവാൻ സാധിക്കുകയുള്ളൂ. അത് മന്ത്രിയുടെ പാർട്ടിക്കാർ തന്നെയാണെന്നാണ് അണിയറ വർത്തമാനം. സംയുക്ത സമര സമിതിയുടെ തീരുമാനത്തിന് വിരുദ്ധമായി ഏതെങ്കിലും തൊഴിലാളി സംഘടനകൾ ഇങ്ങനെ ചെയ്യും എന്ന് കരുതുന്നില്ലെന്ന് മന്ത്രി പറഞ്ഞു. മൈക്കിൾ ലെവിറ്റിനെ തടഞ്ഞതിന് പിന്നിൽ ആരായിരുന്നാലും കുറ്റക്കാരെ കണ്ടെത്തി കർശനമായ നടപടി സ്വീകരിക്കാൻ പൊലീസിന് കർശന നിർദേശം നൽകിയിട്ടുണ്ടെന്നും ടൂറിസം മന്ത്രി കടകംപള്ളി സുരേന്ദ്രന്‍ പറഞ്ഞു.

സംസ്ഥാനത്തിന്റെ വിവിധ ഭാഗങ്ങളിൽ ആയിരകണക്കിന് ആളുകളാണ് പണിമുടക്കിന്റെ തിക്തഫലങ്ങൾ അനുഭവിച്ചത്. പ്രതി സ്ഥാനത്ത് ബിജെപിയായതിനാൽ ചിലർക്ക് വീറും വാശിയും വർധിച്ചു. എസ് ഡി പി ഐയും പോപ്പുലർ ഫ്രണ്ടും ചേർന്ന് പല സ്ഥലങ്ങളിലും വാഹനങ്ങൾ തടഞ്ഞു. ഇതിൽ ആശുപത്രിയിലേക്ക് പോയ രോഗികളുമുണ്ടായിരുന്നു. ഗൾഫിൽ നിന്ന് നാട്ടിലെത്തിയവരും ഉണ്ടായിരുന്നു. ഭാഗ്യത്തിന് മാത്രമാണ് ശബരിമല തീർത്ഥാടകരെ തടയാതിരുന്നത്.

ദേശീയ പണിമുടക്കിൽ പൗരത്വ ബിൽ ഒരു വിഷയം അല്ലാതിരുന്നിട്ടും അതിന്റെ വീറും വാശിയും ചിലർ പാവപ്പെട്ട ജനങ്ങളോട് കാണിച്ചു. അന്നന്ന് ജോലി ചെയ്ത് നിത്യവൃത്തിക്ക് വക കണ്ടെത്തുന്നവരെ പോലും വെറുതെ വിടാൻ പണിമുടക്ക് അനുകൂലികൾ തയാറായില്ല. ചിക്കൻ, മദ്യ വ്യാപാരികൾക്കായിരുന്നു പണിമുടക്ക് ദിവസം കോള്. ഇവരൊക്കെ മണിക്കൂറുകൾ കൊണ്ട് കൈയടക്കിയത് ലക്ഷങ്ങളാണ്. ചില ബാറുകൾ രഹസ്യ കവാടങ്ങൾ വഴി കച്ചവടം നടത്തി. അവർക്കും കോടികൾ കിട്ടി. കോടികൾ കിട്ടാതെ വിഷമിച്ചവർ പാവപ്പെട്ട ജനങ്ങൾ തന്നെയാണ്.

സർക്കാർ സ്പോൺസേഡ് സമരമായതിനാൽ പോലീസുകാർ സമരക്കാരുടെ വികൃതികൾ നോക്കിനിൽക്കുകയാണ് ചെയ്തത്. സാധാരണ സമരങ്ങൾക്ക് പോലും ലാത്തിയും തോക്കുമായി ഇറങ്ങുന്ന പോലീസ് ഇത്തവണ നോക്കുകുത്തിയായത് സർക്കാരിന്റെ നിരദ്ദേശാനുസരണം തന്നെയാണെന്ന് വ്യക്തം. ബുധനാഴ്ചത്തെ മന്ത്രിസഭാ യോഗം പോലും മാറ്റിവച്ചാണ് മുഖ്യമന്ത്രിയും മന്ത്രിമാരും സമരത്തിൽ പങ്കെടുത്തത്.

അതേസമയം കേരളം മാത്രമാണ് ഇത്തരമൊരു സമരാഭാസത്തിന് സാക്ഷ്യം വഹിച്ചത്. ഓരോ ജനുവരിയിലും വരുന്ന പണിമുടക്ക് അനുഷ്ഠാനം ഇന്ത്യയിൽ ദേശീയാവധിയായി പ്രഖ്യാപിക്കണം എന്ന് അഭ്യർത്ഥിക്കുന്ന രസികൻമാരും കേരളത്തിലുണ്ട്.