സെൻകുമാറിനെ സംസ്ഥാന പോലീസ് മേധാവി ആക്കിയത് തന്റെ ജീവിതത്തിൽ പറ്റിയ ഏറ്റവും വലിയ തെറ്റെന്ന് രമേശ് ചെന്നിത്തല. ആ തീരുമാനം വലിയ അബദ്ധവും അപരാധവുമായി. ആ തീരുമാനം എടുത്തതിന്റെ ദുരന്തം ഇപ്പോൾ തങ്ങൾ അനുഭവിക്കുകയാണ്. അതിലിപ്പോൾ താൻ പശ്ചാത്തപിക്കുകയാണ്. മറ്റൊരു ഉദ്യോഗസ്ഥനെ മറികടന്നാണ് സെൻകുമാറിനെ താൻഡിജിപി ആക്കിയത്. രമേശ് ചെന്നിത്തല മാധ്യമങ്ങളോട് പറഞ്ഞ വാക്കുകളാണ് ഇത്.

സെൻകുമാറിനെ എക്കാലവും ന്യായീകരിച്ചിരുന്ന ആളായിരുന്നു ചെന്നിത്തല. പിണറായി വിജയൻ മുഖ്യമന്ത്രിയായതിനു ശേഷം സെൻകുമാറിനെ ഡിജിപി സ്ഥാനത്തു നിന്ന് നീക്കിയിരുന്നു. ഇതിനെതിരെ ശക്തമായ നിലപാടാണ് അന്ന് ചെന്നിത്തല സ്വീകരിച്ചത്. നിയമസഭയിൽ അരമണിക്കൂറോളം സെൻകുമാറിന് വേണ്ടി ചെന്നിത്തല വാദിച്ചിരുന്നു. അന്ന് മുഖ്യമന്ത്രി സെൻകുമാറിന്റെ സംഘപരിവാർ ബന്ധമടക്കം ചൂണ്ടിക്കാട്ടിയാണ് മറുപടി നൽകിയത്. അടുത്ത കാലം വരെ ചെന്നിത്തലയുടെ വിശ്വസ്തനായിരുന്നു സെൻകുമാർ.

ചെന്നിത്തലക്ക് മാത്രമല്ല ഉമ്മൻ ചാണ്ടിക്കും വിശ്വസ്തനായിരുന്നു സെൻകുമാർ. റ്റി.പി. ചന്ദ്രശേഖരൻ വധം കേരളത്തിൽ കത്തി പടർന്നത് സെൻകുമാറിന്റെ ഇടപെടൽ കാരണമാണ്. ഒരു പ്രാദേശിക നേതാവ് മാത്രമായിരുന്ന ചന്ദ്രശേഖരനെ വധിച്ചത് അർധരാത്രിയോടെയാണ്. പിറ്റേന്ന് ഇറങ്ങിയ ചുരുക്കം ചില പത്രങ്ങൾ മാത്രമാണ് അത് കവർ ചെയ്തത്. സംഭവത്തിന്റെ ഗൗരവം സർക്കാരിന്റെ ശ്രദ്ധയിലെത്തിച്ചത് സെൻകുമാറാണ്. അദ്ദേഹം അന്ന് രഹസ്യാന്വേഷണ വിഭാഗം മേധാവിയുമായിരുന്നു. സി പി എമ്മിലെ ഒരു പ്രമുഖ നേതാവിനെ റ്റി.പി യുടെ ഘാതകർ വിളിച്ച വിവരം കൈമാറിയതും സെൻകുമാറാണെന്ന് ആരോപണം ഉയർന്നിരുന്നു.

സെൻകുമാറിനെ ഉമ്മൻ ചാണ്ടിയുടെ കാലത്ത് കോൺഗ്രസുകാരൻ എന്നാണ് അറിയപ്പെട്ടിരുന്നത്. കേരള കോൺഗ്രസ്, കോൺഗ്രസ് സർക്കാരിനെ അട്ടിമറിക്കാൻ സാധ്യതയുണ്ടെന്ന വിവരം ഉമ്മൻ ചാണ്ടിക്ക് നൽകിയത് സെൻകുമാറാണെന്ന് അക്കാലത്ത് പറഞ്ഞുകേട്ടിരുന്നു. കെ.എം മാണിയെ സർക്കാർ അട്ടിമറിക്കാതിരിക്കാൻ ബാർകേസിൽപ്പെടുത്തിയതും സെൻകുമാറിന്റെ അറിവോടെയാണന്ന് ആരോപണം ഉയർന്നിരുന്നു. സെൻകുമാറിനെ ഡി ജി പി സ്ഥാനത്ത് നിന്ന് മാറ്റിയപ്പോൾ കെ എം മാണി അവലംബിച്ച മൗനം ഈ ആരോപണത്തെ ശരിവയ്ക്കുന്നതായിരുന്നു.

സെൻകുമാർ പറഞ്ഞാൽ അതിനപ്പുറം പ്രവർത്തിക്കുന്നവരായിരുന്നില്ല ഉമ്മൻ ചാണ്ടിയും ചെന്നിത്തലയും. അക്കാലത്ത് പോലീസിലെ പല തീരുമാനങ്ങളും നടപ്പിലാക്കിയത് സെൻകുമാറിന്റെ നിർദ്ദേശാനുസരണമാണ്. സെൻകുമാറിന്റെ തീരുമാനങ്ങൾ മാത്രമാണ് അക്കാലത്ത് നില നിന്നിരുന്നത്. ജേക്കബ് തോമസിന് ഉമ്മൻ ചാണ്ടി സർക്കാർ പണി കൊടുത്തതും സെൻകുമാറിന്റെ നിർദ്ദേശാനുസരണമാണ്. അത് ബാർകേസ് അന്വേഷിച്ചതു കൊണ്ടായിരുന്നില്ല.

പിണറായി സർക്കാർ സെൻകുമാറിനെ നീക്കിയ കാലത്ത് അദ്ദേഹത്തിന് സംഘപരിവാർ ബന്ധങ്ങളൊന്നും ഉണ്ടായിരുന്നില്ല. അത് പിന്നീട് വന്നു ചേർന്നതാണ്. അന്നും സർക്കാരുമായി മ്യദുസമീപനം സ്വീകരിച്ചിരുന്ന ചെന്നിത്തല സഹായിക്കാതെ വന്നപ്പോഴാണ് സെൻകുമാർ ബിജെപിയുമായി അടുത്തത്. അഡ്മിനിസ്ട്രേറ്റീവ് ട്രൈബ്യൂണലിലേക്ക് സെൻകുമാറിന്റ പേര് ബിജെപി സർക്കാർ കൈമാറിയത് അദ്ദേഹത്തിന് ബി ജെ പിയോട് താത്പര്യം വർധിച്ചു. പിണറായിയെ എതിർക്കാൻ ബിജെ പിക്ക് മാത്രമേ കഴിയുകയുള്ളുവെന്ന വിശ്വാസം സെൻകുമാറിനെ ബിജെപി ക്കാരനാക്കി.

മികച്ച ഉദ്യോഗസ്ഥനായിരുന്നു സെൻകുമാർ. അദ്ദേഹത്തിനെതിരെ ഇടതുസർക്കാർ നീങ്ങിയത് കോൺഗ്രസ് ഭരണകാലത്ത് സിപി എമ്മിനെ നോട്ടമിട്ടതു കൊണ്ടു മാത്രമാണ്. എന്നാൽ ഒപ്പം കൊണ്ടുനടന്ന സെൻകുമാറിനെ ചെന്നിത്തല കൈവിട്ടതാണ് അത്ദുതം. അത് പിണറായിയെ പ്രതീപ്പെടുത്താൻ വേണ്ടിമാത്രമാണ്.