ഇന്ത്യയുടെ കരുത്ത് ലോക രാഷ്ട്രങ്ങള്‍ക്ക് മുമ്പില്‍ കാട്ടിക്കൊടുക്കുന്ന സംഭവത്തിന് സാക്ഷ്യം വഹിച്ചിരിക്കുകയാണ്. നേരത്തെയുണ്ടായിരുന്ന പ്രധാനമന്ത്രിമാരില്‍ നിന്നും കരുത്തനായ പ്രധാനമന്ത്രിയായി നരേന്ദ്രമോദി വീണ്ടും കളം നിറയുകയാണ്. മലേഷ്യയില്‍ നിന്നുള്ള പാമോയില്‍ ഇറക്കുമതി റദ്ദാക്കിയ ഇന്ത്യന്‍ നടപടിയോട് പ്രതികരിച്ചുകൊണ്ട് മലേഷ്യന്‍ പ്രധാനമന്ത്രി മഹാദിര്‍ മുഹമ്മദ് രംഗത്തെത്തി. തങ്ങള്‍ ചെറിയ രാജ്യമാണെന്നും ഇന്ത്യയോട് വ്യാപാര പ്രതികാരനടപടി എങ്ങനെ സ്വീകരിക്കുമെന്നും അദ്ദേഹം ചോദിച്ചു. വ്യാപാരത്തിനായി പകരം മാര്‍ഗങ്ങള്‍ കണ്ടെത്താനാണ് ശ്രമിക്കുന്നതെന്നും അദ്ദേഹം മാധ്യമങ്ങളോട് പറഞ്ഞു.

കശ്മീര്‍ വിഷയത്തില്‍ മലേഷ്യന്‍ പ്രധാനമന്ത്രി ഇന്ത്യക്കെതിരെ നടത്തിയ പരാമര്‍ശത്തിനു പിന്നാലെയായിരുന്നു ഇന്ത്യന്‍ നടപടി. ലോകത്തെ ഏറ്റവും വലിയ ഭക്ഷ്യഎണ്ണ ഉപഭോക്തക്കാളായ ഇന്ത്യ മലേഷ്യയില്‍ നിന്നുള്ള പാമോയില്‍ ഇറക്കുമതി റദ്ദാക്കിയത് മലേഷ്യയെ പ്രതിസന്ധിയിലാക്കിയിട്ടുണ്ട്. ലോകത്തെ ഏറ്റവും വലിയ രണ്ടാമത്തെ പാമോയില്‍ ഉത്പാദകരാണ് മലേഷ്യ. ഉപരോധം ശക്തമാക്കുന്നതിന്റെ ഭാഗമായി പാമോയിലിനു പുറമേ ഇലക്ട്രോണിക്‌സ് ഉല്‍പ്പന്നങ്ങള്‍ക്കും കേന്ദ്രസര്‍ക്കാര്‍ നിയന്ത്രണം ഏര്‍പ്പെടുത്തിയിട്ടുണ്ട്. കശ്മീര്‍ വിഷയത്തിലാണ് മലേഷ്യ ആദ്യം ഇന്ത്യയ്‌ക്കെതിരെ രംഗത്ത് വന്നത്. പിന്നാലെ പൗരത്വ നിയമ ഭേദഗതിയിലും മലേഷ്യ വിമര്‍ശനം ഉയര്‍ന്നിരുന്നു.

സാക്കിര്‍ നായിക്കിനെ ഇന്ത്യക്ക് വിട്ടുനല്‍കണമെന്ന ആവശ്യവും മലേഷ്യ അംഗീകരിച്ചിരുന്നില്ല. ഇതേ തുടര്‍ന്നാണ് ഇന്ത്യ നിലപാട് ശക്തമാക്കിയത്. കേന്ദ്ര വാണിജ്യ മന്ത്രാലയമാണ് ഇതുസംബന്ധിച്ച് വിജ്ഞാപനം പുറത്തിറക്കിയത്. നിലവില്‍ സ്വതന്ത്രമായ ഇറക്കുമതിയുടെ വിഭാഗത്തിലാണ് പാമോയിലിനെ ഉള്‍പ്പെടുത്തിയിരിക്കുന്നത്. എന്നാല്‍, പുതിയ ഉത്തരവ് പ്രകാരം നിയന്ത്രിത വിഭാഗത്തിലേക്ക് പാമോയിലിനെ മാറ്റിയിരിക്കുകയാണ്. നിയന്ത്രണമാണെങ്കിലും ഫലത്തില്‍ സംസ്‌കരിച്ച പാമോയിലിന്റെ ഇറക്കുമതി നിരോധിക്കുന്നതിനു തുല്യമാണ്. ഇതോടെ, അസംസ്‌കൃത പാമോയില്‍ ഇറക്കുമതിക്കായിരിക്കും മുന്‍ഗണന.

ഇന്ത്യയിലേക്ക് സംസ്‌കരിച്ച പാമോയിലും പാമോലിനും ഇറക്കുമതി ചെയ്യുന്നതില്‍ ഭൂരിഭാഗവും മലേഷ്യയില്‍ നിന്നാണ്. അതുകൊണ്ടുതന്നെ കേന്ദ്രത്തിന്റെ ഈ തീരുമാനം മലേഷ്യയ്ക്ക് കനത്ത തിരിച്ചടിയാണ്. പൗരത്വ നിയമത്തിന്റെ ആവശ്യമെന്താണെന്നും, മതേതര രാജ്യത്തിന്റെ ഈ നടപടി ഖേദകരമാണെന്നുമാണ് മലേഷ്യന്‍ പ്രധാനമന്ത്രി മഹാതീര്‍ മുഹമ്മദിന്റെ പ്രതികരണം. സംഭവത്തെ ഇന്ത്യ ശക്തമായി അപലപിക്കുകയും, മലേഷ്യന്‍ പ്രധാന മന്ത്രി മഹാതീര്‍ മുഹമ്മദിന്റെ പരാമര്‍ശം വസ്തുതാ വിരുദ്ധമാണെന്നും ഇന്ത്യയുടെ ആഭ്യന്തര കാര്യത്തില്‍ മലേഷ്യ ഇടപെടേണ്ടെന്നും വിദേശകാര്യ മന്ത്രാലയം അറിയിക്കുകയും ചെയ്തു. കൂടാതെ മലേഷ്യന്‍ സ്ഥാനപതിയെ വിളിച്ചുവരുത്തിയും ഇന്ത്യ പ്രതിഷേധം അറിയിച്ചിരുന്നു.

ജമ്മു കശ്മീരിന്റെ വിശിഷ്ടപദവി എടുത്തു കളഞ്ഞതിനെയും, രാജ്യത്ത് എന്‍.ആര്‍.സി., പൗരത്വ നിയമ ഭേദഗതി തുടങ്ങിയവ നടപ്പിലാക്കുന്നതിനെയും അതിനിശിതമായി വിമര്‍ശിച്ചുകൊണ്ടുള്ള നിരവധി പ്രതികരണങ്ങളാണ് അടുത്തിടെ മലേഷ്യന്‍ പ്രധാനമന്ത്രി മഹാതിര്‍ മുഹമ്മദിന്റെ ഭാഗത്തുനിന്നുണ്ടായത്. ഇന്ത്യന്‍ ഗവണ്‍മെന്റ് പക്ഷേ, അതിനോട് പ്രതികരിച്ചത് മലേഷ്യയില്‍ നിന്നുള്ള പാമോയില്‍ ഇറക്കുമതിക്ക് ഏതാണ്ട് വിലക്കുതന്നെ ഏര്‍പ്പെടുത്തിക്കൊണ്ടാണ്. ഇന്ത്യന്‍ ഗവണ്‍മെന്റിന്റെ ഈ നടപടിയെ അപലപിച്ചുകൊണ്ട് മഹാതിര്‍ മുഹമ്മദ് വീണ്ടും പ്രതികരിച്ചു, രാജ്യത്തിന് സാമ്പത്തിക നഷ്ടങ്ങള്‍ നേരിടേണ്ടി വന്നാലും ശരി, തെറ്റ് കണ്ടാല്‍ ഇനിയും തെറ്റെന്നുതന്നെ ഉറക്കെ വിളിച്ചു പറയുമെന്നാണ്.

ഭക്ഷ്യ എണ്ണയുടെ ലോകത്തിലെതന്നെ ഏറ്റവും വലിയ ഉപഭോക്താവാണ് ഇന്ത്യ. നമ്മളെപ്പോലെ ഭക്ഷണത്തില്‍ എണ്ണ ചേര്‍ക്കുന്നവര്‍ വേറെ കാണില്ലല്ലോ. കഴിഞ്ഞയാഴ്ച തന്നെ ഇന്ത്യന്‍ വ്യാപാരികള്‍ മലേഷ്യയില്‍ നിന്ന് പാമോയില്‍ ഇറക്കുമതി ചെയ്യുന്നതില്‍ കാര്യമായ കുറവ് വരുത്തിയിട്ടുണ്ട്. ഇന്തോനേഷ്യ കഴിഞ്ഞാല്‍ ലോകത്തില്‍ ഏറ്റവും വലിയ പാമോയില്‍ കയറ്റുമതി രാജ്യമാണ് മലേഷ്യ. അതാണ് മലേഷ്യയുടെ നിലപാട് മാറ്റത്തിന് പിന്നില്‍.